“Maika-13 a Paset: Da Joseph ken Emma: Hulio 1830,” Dagiti Estoria iti Doktrina ken Katulagan (2002), 51–55
“Maika-13 a Paset,” Dagiti Estoria iti Doktrina ken Katulagan, 51–55
Maika-13 a Paset
Da Joseph ken Emma
(Hulio 1830)
Nagnaed da Joseph ken Emma Smith iti Pennsylvania. Adda bassit a bangkagda. Agpimpinnateg da Joseph ken Emma. Nagtrabahoda a nasayaat tapno matulonganda ti tunggal maysa.
Adu ti parikut da Joseph ken Emma. Marigrigatda. Kayatda ti maaddaan iti annak. Naaddaan ni Emma iti maladaga a lalaki, ngem natay. Nagladingit ni Emma. Idi agangay naaddaanda ken Joseph iti ad-adu pay nga annak.
Nariribukan ni Joseph maipapan iti kaamaanna. Kayatna nga aywanan ida. Kayatna ti agmula iti bukbukel tapno adda taraon ti kaamaanna.
Nariribukan pay ni Joseph maipapan iti Simbaan. Rirriribuken dagiti dakes a tao dagiti Santo. Sumagmamano kadagiti dadaulo ti Simbaan ti naglemmeng tapno mayadayoda kadagiti dakes a tao. Nasken nga agtrabaho a nasayaat ni Joseph tapno matulonganna dagiti Santo.
No dadduma nasken a panawan ni Joseph ti kaamaanna tapno matulongana dagiti Santo. Naldaangan ni Joseph a mangpanaw iti kaamaanna. Naladingitan ni Emma idi pimmanaw ni Joseph. Nadanagan maipapan kenkuana.
Dinamag ni Joseph ken ni Jesus no ania ti nasken nga aramidenna. Imbaga ni Jesus ken ni propeta Joseph a saan a madanagan maipapan kadagiti parikutna. Imbaga ni Jesus kenkuana a saan nga agbuteng kadagiti dakes a tao. Kinuna ni Jesus a kanayon a tulonganna ni Joseph.
Kinuna ni Jesus a nasken nga agmula ni Joseph iti bukbukel para iti kaamaanna. Kalpasanna nasken a mapan ket tulonganna dagiti Santo. Imbaga ni Jesus ken Joseph a saan nga agdanag maipapan iti kanen, pagan-anay, wenno kuarta. Ited dagiti Santo ken ni Joseph no ania ti kasapulanna.
Inikkan ni Jesus ni Joseph Smith iti paltiing para ken Emma. Imbaga ni Jesus a naisangsangayan a babai ni Emma Smith. Pinilinan daytoy a mangaramid iti napateg a trabaho.
Kinuna ni Jesus a nasken a mannakaawat ni Emma no kasta nga adda parikut ni Joseph. Nasken a tulonganna nga agbalin a naragsak ken saan nga agdanag.
Imbaga ni Jesus a nasken nga isuro ni Emma Smith dagiti Santo. Nasken nga isurona ida nga agadal kadagiti nasantuan a kasuratan. Kinunana a tulonganto ti Espiritu Santo a mangammo no ania ti isurona.
Kinuna ni Jesus a nasken nga aramaten ni Emma ti panawenna nga agadal. Nasken nga agsursuro ken agsurat iti adu a banag.
Kiniddaw ni Jesus ken ni Emma a mangpili kadagiti kanta a kantaen dagiti Santo. Masapul a maimaldit dagiti kanta iti pagkantaan a libro.
Magustuan ti Dios a denggen ti panagkanta dagiti nalinteg a tao. Kararag kenkuana dagiti kantada. Mabendisionan dagiti nalinteg a tao nga agkanta para iti Dios.
Imbaga ni Jesus ken ni Emma nga agbalin a napakumbaba. Imbagana kenkuana nga ipategna ti asawana. Imbagana kenkuana nga agragsak gapu ta maaddaanto ni Joseph iti adu a naindaklan a bendision.
Imbaga ni Jesus ken ni Emma a saan a madanagan maipapan iti daytoy a lubong. Nasken nga agsagana para iti nasaysayaat a lubong idiay langit. Nasken nga agragsak ken agtungpal kadagiti bilin ti Dios. Iti kasta makapanto iti langit.
Kinuna ni Jesus a para amin kadagiti babbai dagiti banag nga imbagana ken ni Emma Smith.