“Introduksion: Sakbay ti Doktrina ken Katulagan,” Dagiti Estoria iti Doktrina ken Katulagan (2002), 1–5
“Introduksion,” Dagiti Estoria iti Doktrina ken Katulagan, 1–5
Introduksion
Sakbay ti Doktrina ken Katulagan
Nagnaedtayo idiay langit sakbay nga immaytayo ditoy daga. Inikkannatayo ti Nailangitan nga Amatayo ti plano ti pannakaisalakan. Tulongannatayo ti plano ti pannakaisalakan a makapagsagana nga agbiag manen iti langit. No tungpalentayo ti plano, makapagindegtayo iti sidong ti Nailangitan nga Ama kalpasan ti panagungartayo.
Nagindeg ni Jesus a kaduatayo idiay langit. Kayatna a tungpalen ti plano ti Nailangitan nga Ama. Kinuna ni Jesus nga umayto ditoy daga ket agbalin a Mangisalakantayo. Aramidennanto ti aramid ti Nailangitan nga Ama.
Nagindeg met ni Satanas a kaduatayo idiay langit. Ngem nadangkes daytoy. Saanna a tungpalen ti plano ti Nailangitan nga Ama. Pinapanaw ti Nailangitan nga Ama ni Satanas idiay langit. Kayat a dadaelen ni Satanas ti plano ti pannakaisalakan. Kayatna a maisardeng ti aramid ti Nailangitan nga Åma.
Inaramid ni Jesus ti daga. Immay nagnaed ditoy dagiti annak ti Nailangitan nga Ama. Nangibaon ni Jesus kadagiti propeta a mangisuro kadakuada nga agbalin a nalinteg. Sumagmamano kadagiti tao ti nagtungpal kadagiti propeta.
Saan a dumngeg kadagiti propeta dagiti dadduma a tao iti daga. Tinungpal dagitoy a tao ni Satanas. Nagbalinda a nadangkes.
Isalaysay ti Daan a Tulag ti maipanggep kadagiti tao a nagnaed idiay Palestina iti nabayagen a panawen. Ammo dagitoy a tao ti maipapan ken ni Jesus. Addaan dagiti nalinteg a tao iti ebangheliona. Addaan dagiti nalinteg a lallaki iti kinasaserdote. Insuro dagiti propeta kadagiti tao nga umayto ni Jesus iti daga. Isunto ti agbalin a Mangisalakanda.
Isalaysay ti Libro ni Mormon ti maipapan kadagiti tao a nagnaed iti America iti nabayagen a panawen. Ammoda ti maipapan ken ni Jesus. Addaanda iti ebangheliona. Addaan dagiti nalinteg a lallaki iti kinasaserdote. Insuro dagiti propeta dagiti tao iti America a ninto Jesus ti Mangisalakanda. Sarungkarannanto ida kalpasan ti panagungarna.
Immay nagnaed ditoy daga ni Jesucristo. Isalaysay ti Baro a Tulag ti maipapan iti biagna ditoy daga. Insuro ni Jesus ti ebangheliona kadagiti tao. Insurona ida nga agtungpal kadagiti bilin ti Nailangitan nga Ama.
Nangpili ni Jesus iti sangapulo-ket-dua a lallaki nga agbalin nga Apostol. Intedna kadakuada ti kinasaserdote. Inrugina ti Simbaanna. Adu a tattao ti nangipateg ken ni Jesus. Nalintegda ken nagtungpalda kadagiti pannursurona.
Saan a kinayat ni Satanas a tungpalen dagiti tao ni Jesus. Sinulisog ni Satanas dagiti tao, ket nagbalinda a nadakes. Saanda a namati ken ni Jesus. Kinagurada ni Jesus. Pinatayda isuna.
Nagungar ni Jesus kalpasan ti tallo nga adlaw. Nakisarita kadagiti Apostolna. Imbagana kadakuada nga isuroda ti ebanghelio iti amin a tao. Sinarungkaran met ni Jesus dagiti nalinteg a tao iti America. Kalpasanna, napan iti langit tapno agindeg iti sidong ti Amana.
Dagiti Apostol ti dadaulo ti Simbaan ni Jesucristo. Napanda kadagiti adu a pagilian. Insuroda kadagiti tao ti ebanghelio. Adu a tattao ti namati ken ni Jesucristo ket nabuniaganda. Inted dagiti Apostol kadagiti nalinteg a lallaki ti kinasaserdote. Adu dagiti kameng ti pudno a Simbaan ni Jesucristo.
Kayat a dadaelen idi ni Satanas ti Simbaan ni Jesucristo. Sinulisogna dagiti tao, ket nagtungpalda kenkuana. Adu a tao ti nagsardeng a namati ken ni Jesus. Pinatay dagiti nadangkes a tao dagiti nalinteg a kameng ti Simbaan. Pinatayda dagiti Apostol. Awanen dagiti dadaulo iti Simbaan. Awanen ti asino man ditoy daga ti mangted iti kinasaserdote kadagiti lallaki.
Sumagmamano a tattao ti nangbalbaliw kadagiti pannursuro ti Simbaan ni Jesucristo. Binaliwanda dagiti bilin ti Dios. Awanen daydi pudno a Simbaan nga inrugi a binangon ni Jesus. Nangrugi a nangbangon dagiti tao iti bukodda a simbaan. Ngem awan kadagitoy a simbaan ti pudno a Simbaan.
Naglabas ti ginasgasut a tawen. Adun ti agduduma a simbaan ditoy daga. Ngem awan kadagitoy ti pudno a Simbaan ni Jesucristo. Namati dagiti kameng ti simbaan ken ni Jesucristo. Ngem awanan iti pudno nga ebanghelio dagiti simbaan. Awan kadakuada ti kinasaserdote ti Dios. Awananda kadagiti propeta wenno Apostol.
Kinuna ni Jesus nga agsublinto manen ditoy daga. Kinunana a nasken nga addanton ditoy daga ti pudno a Simbaanna sakbay nga umayto manen. Nasken nga ammo dagiti tao ti pudno nga ebangheliona. Nasken nga adda kinasaserdote kadagiti lallaki. Nasken nga adda dagiti propeta ken Apostol. Nasken nga adda dagiti paltiing.
Aggapu ken Jesus dagiti paltiing. Ibaga kadatayo dagiti paltiing dagiti banag a kayat ni Jesus a maammuantayo. Ibagada kadatayo no ania ti kayatna nga aramidentayo. Ited ni Jesus dagiti paltiing kadagiti propetana. Agpaay dagiti paltiing iti pudno a Simbaanna.
Libro dagiti paltiing ti Doktrina ken Katulagan. Isalaysay ti Doktrina ken Katulagan ti maipapan iti pudno a Simbaan ni Jesucristo. Isalaysay daytoy ti maipapan iti kinasaserdote. Isalaysay daytoy ti maipapan kadagiti propeta ken Apostol. Isalaysay ti Doktrina ken Katulagan no ania ti nasken nga aramidentayo tapno makapagsaganatayo inton umay manen ni Jesus.
Maipapan iti Doktrina ken Katulagan ti libro a basbasaenyo. Isalaysay daytoy a libro ti maipapan iti sumagmamano kadagiti paltiing. Isalaysay daytoy no kasano a napasubli ditoy daga ti pudno a Simbaan ni Jesucristo. Isalaysay pay daytoy ti maipapan iti sumagmamano kadagiti tao a nagbiag idi mairugi ti Simbaan.