“Maika-62 a Paset: Napan Dagiti Nagkauna a Kameng iti Tanap ti Salt Lake: Hunio 1846–Hulio 1847,” Dagiti Estoria iti Doktrina ken Katulagan (2002), 224–29
“Maika-62 a Paset,” Dagiti Estoria iti Doktrina ken Katulagan, 224–29
Maika-62 a Paset
Napan Dagiti Nagkauna a Kameng iti Tanap ti Salt Lake
(Hunio 1846–Hulio 1847)
Adda pay la dagiti nagkauna a kameng iti Council Bluffs. Kasapulanda ti adu a napigsa a lallaki a tumulong kadakuada iti panagdaliasatda. Kaaduan kadagiti agtutubo a lallaki ti simmurot iti Batalion ti Mormon. Isu nga inkeddeng dagiti nagkauna a kameng a dida pay mapan iti Rocky Mountains agingga ti panawen ti panagsusulbod.
Binay-an dagiti Indian dagiti Santo a maaddaan iti sumagmamano a daga iti ballasiw ti karayan. Idiay ti nangipasdekan dagiti Santo iti maysa nga ili a ninagananda iti Winter Quarters. Nagaramidda kadagiti kalsada ken nagipatakderda kadagiti balbalay. Sumagmamano kadagiti balay ti naaramid iti tabla. Adda dagiti dadduma a balay iti rukib iti igid dagiti turod. Nagmula dagiti nagkauna a kameng kadagiti bukbukel.
Biningbingay ni Brigham Young ti siudad iti purpurok. Nangpili kadagiti lallaki nga agbalin nga obispo. Sumagmamano nga Indian ti nangriribuk kadagiti nagkauna a kameng. Inaladan dagiti nagkauna a kameng ti aglawlaw ti siudad tapno saanen a makastrek dagiti Indian a nangriribuk.
Bayat ti kaadda dagiti nagkauna a kameng iti Winter Quarters, adda paltiing ken ni Brigham Young. Imbaga ti Apo kenkuana no kasano nga agsagana dagiti tao iti ipapanawda. Imbagana ken ni Brigham Young no ania ti nasken nga aramiden dagiti tao bayat ti panagdaliasatda.
Kinuna ti Apo a nasken a mabingaybingay dagiti tao iti babassit a grupo. Tunggal grupo adda koma dadaulona. Nasken a tungpalen dagiti tao ti dadauloda. Nasken nga agtitinnulongda. Nasken nga aywananda dagiti kaamaan nga awanan iti ina wenno ama.
Tunggal grupo nasken nga adda bukodna a karison ken taraon. Tunggal grupo nasken nga adda taona a makaammo a mangtarimaan iti karison, agipatakder kadagiti balay, agmula kadagiti bukbukel, ken agaramid kadagiti rangtay.
Adda pay dagiti dadduma a banag nga imbaga ti Apo a nasken nga aramiden dagiti Santo. Nasken a tungpalenda dagiti bilinna. Nasken a tungpalenda dagiti karida iti tungpal maysa. Nasken a dida agpipinnadakes iti tunggal maysa. Nasken nga agbalinda a napudno. Nasken nga isublida dagiti banag a nabulodda wenno nasarakanda.
Kayat ti Apo nga agragsak dagiti nagkauna a kameng. Imbagana kadakuada nga agkakanta ken agsasalada a sangkamaysa. Nasken a saanda nga agbuteng. Tulongannanto ida. Imbagana kadakuada nga addanto dagiti parikutda. Ngem dagiti parikutda ti mamagbalinto kadakuada a nasaysayaat a tao. Maparaburandanto.
Inaramid ni Brigham Young ti imbilin ti Apo nga aramidenna. Biningayna dagiti tao iti tunggal grupo. Tunggal grupo adda amin dagiti kasapulanna a mangipasdek iti maysa a siudad kadagiti bantay.
Adda komperensia dagiti Santo. Kalpasanna nangpili ni Brigham Young iti grupo nga umuna a pumanaw. Adda 143 a lallaki, tallo a babbai, ken dua nga ubbing. Iti kabigatanna, pimmanaw ti umuna a grupo iti Winter Quarters.
Adda trabaho ti tunggal maysa iti dalanda. Inaywanan dagiti babbai dagiti ubbing. Naglutoda iti kanenda. Adda paltog dagiti lallaki a pangsalaknibda kadagiti tao ken ayup.
Nagmalmalem a nagdaliasat dagiti nagkauna a kameng. Nagkampoda iti rabii. Inyurnosda a nagtimbukel dagiti karisonda. Agyan dagiti tao ken ayup iti uneg ti timbukel. Agaramidda ditoy iti apuy a paglutuanda kadagiti kanenda.
Nagkakanta ken nagsasalada. Maysa kadagiti kantada ti “Umaykayo, Umaykayo, Dakayo a Sasanto.” Limmag-an ti rikna dagiti tao.
Maysa a lalaki ti nagtangguyob a mangipakaammo kadakuada nga orasen ti pannaturogda. Nagkararag dagiti nagkauna a kameng ket naturogda.
Atiddog ti dinaliasat dagiti nagkauna a kameng iti ballasiw dagiti tanap. Uppat a bulan a nagdaldaliasatda. Adu dagiti tao a nasabatda iti dalan. Sumagmamano kadagiti tao ti managpalab-og. Imbagada ken ni Brigham Young a di mapmapan iti Rocky Mountains. Kinunada nga awan ti agtubo a bukel sadiay.
Imbaga dagiti dadduma a tao ken ni Brigham Young nga ipanna dagiti Santo iti California. Ngem kinuna ni Brigham Young nga impakita kenkuana ti Apo no sadino ti nasken a papanan dagiti Santo. Tungpalenna ti Apo.
Iti kamaudiananna, nakadanon dagiti nagkauna a kameng iti kabambantayan. Narigat ti agdaliasat idiay.
Nagsakit ni Brigham Young. Dina kabaelan ti napartak a panagdaliasat. Nangpili kadagiti sumagmamano a lallaki a mapan nga umuna. Imbagana a mapanda iti Great Salt Lake Valley. Nasken nga irugidan ti agitukit kadagiti bukel.
Innala dagiti lallaki dagiti karisonda kadagiti tuktok ti bantay. Bimmabada a nagturong iti tanap. Nagkampoda iti igid ti maysa a karayan.
Nagkararagda iti Apo. Indawatda a bendisionanna dagiti itukitda a bukel. Intukit dagiti lallaki dagiti bukel.
Iti simmaruno nga aldaw, napan ni Brigham Young a kaduana dagiti nagkauna a kameng iti tanap. Kimmita ni Brigham Young iti tanap manipud iti karisonna. Ammona a daytoy ti lugar a kayat ti Apo a pagnaedan dagiti Santo. Kinuna ni Brigham Young, “Daytoy ti umisu a lugar. Ipagnayon.” Impagna nga impababa dagiti Santo dagiti karisonda nga agturong iti tanap. 24 ti Hulio 1847 idi.