“Maika-44 a Paset: Apagkapullo: Hulio 1838,” Dagiti Estoria iti Doktrina ken Katulagan (2002), 165–66
“Maika-44 a Paset,” Dagiti Estoria iti Doktrina ken Katulagan, 165–66
Maika-44 a Paset
Apagkapullo
(Hulio 1838)
Adda dagiti Santo iti Far West, Missouri. Imbaga ti Apo ken ni Joseph Smith a nasken nga agbayad dagiti tao iti apagkapullo. Nagkararag ni Joseph iti Nailangitan nga Ama. Dinamagna no mano ti apagkapullo a nasken a bayadan dagiti Santo. Adda impaltiing ti Apo kenkuana. Kinuna ti Apo a nasken nga agbayad dagiti Santo iti maysa nga apagkapullo.
No makateggedda iti sangapulo a pisos nasken nga itedda ti pisos a kas apagkapullo. No makateggedda iti sangagasut a pisos nasken nga itedda ti sangapulo a pisos.
Makapagbayad dagiti Santo iti apagkapulloda iti sabali a wagas. Binayadan dagiti Santo ti apagkapulloda iti naapitda kadagiti mulada. Intedda ti maysa nga apagkasangapulo ti bukbukel ken pagayda. Intedda ti apagkasangapulo dagiti manok ken dadduma pay a tarakenda nga ayup. Binayadanda ti apagkapullo dagiti gatas ken natnateng.
Maaramat ti kuarta nga apagkapullo a pangtulong kadagiti kameng ti Simbaan. Makatulong ti apagkapullo a panggatang iti taraon ken pagan-anay para kadagiti agkasapulan a tao.
Maaramat ti apagkapullo a pangpatakder kadagiti templo ken pangtulong iti aramid ti misionario. Maaramat pay a pangtulong kadagiti tao a mangipaay amin iti panawenda nga agtrabaho para iti Apo.
Itedtayo ti apagkapullotayo iti obispo. Ited ti obispo daytoy kadagiti dadaulo ti Simbaan. Isuda ti mangikeddeng no kasano a maaramat ti apagkapullo.
Mangted ti Nailangitan nga Ama kadagiti naisangsangayan a bendision kadagiti Santo nga agbayad iti apagkapullo. Saan a maaddaan iti amin dagitoy a bendision dagiti Santo a saan nga agbayad iti apagkapullo. Kuna ti Biblia a dagiti Santo a saan nga agbayad iti apagkapullo ket taktakawanda ti Dios.