“Maika-19 a Paset: Ti Maikadua a Yaay ni Jesucristo: Pebrero–Marso 1831,” Dagiti Estoria iti Doktrina ken Katulagan (2002), 70–76
“Maika-19 a Paset,” Dagiti Estoria iti Doktrina ken Katulagan, 70–76
Maika-19 a Paset
Ti Maikadua a Yaay ni Jesucristo
(Pebrero–Marso 1831)
Sumagmamano kadagiti tao iti Kirtland, Ohio ti agsasao iti inuulbod maipapan kadagiti Santo. Dagitoy a tao ti di mangayat nga agsursuro iti ebanghelio.
DkK 45: Pakauna
Imbaga ni Jesus ken ni Joseph Smith nga agsublinto ditoy daga iti saan a mabayag. Sakbay nga agsubli, nasken a nangngegan ti amin ti ebanghelio. Nasken nga agtrabaho a sipapasnek dagiti Santo a mangisuro iti ebanghelio. Nasken nga agbalinda a nalalaing a misionario.
Idi nagnaed ni Jesus ditoy daga, imbagana kadagiti Apostolna no anianto ti mapasamak sakbay nga agsubli manen.
Imbaga ni Jesus kadagiti Apostolna a madadaelto ti templo iti Jerusalem. Agnaedto dagiti Judio kadagiti sabali a pagilian. Adunto ti matay a Judio. Adunto ti gubat. Saanto nga agpipinnateg dagiti tao. Awanto ti pudno a Simbaan ditoy daga.
Kalpasanna rugianto manen ti Nailangitan nga Ama nga ipatakder ti pudno a Simbaan ditoy daga. Kayariganto ti silaw iti kasipngetan ti ebanghelio ni Jesucristo.
Adun a bambanag nga insalaysay ni Jesus ti napasamaken. Adu pay dagiti banag nga insalaysayna ti mapasamakto. Adunto ti tao nga agririnnanget. Adunto dagiti agsakit. Addanto ginggined. Aglidemto ti init. Kayariganto ti dara ti bulan. Agtinnagto dagiti bituen.
No mapasamakto dagitoy a banag, ammonto dagiti nalinteg a tao nga asidegen ti yaay ni Jesus. Kayatdanto nga umay isuna. Adunto a Judio ti agsubli iti Jerusalem. Mangngegandanto ti ebanghelio.
Buklento manen dagiti nalinteg a Santo ti baro a siudad ti Zion. Natalgeddanto iti Zion. Saandanto nga agririnnanget. Naragsakdanto unay. Agkantadanto iti kanta a makaparag-o. Saanto a makapan dagiti dakes a tao iti Zion.
Agsublinto manen ni Jesus ditoy daga. Makitanto isuna dagiti nalinteg a tao. Umayto babaen ti nalawag nga ulep. Agungarto amin dagiti nalinteg a tao a natayen. Sabatendanto ni Jesus iti ulep. Kakuyogdanto iti panagsublina ditoy daga.
Umayto ni Jesus iti Jerusalem. Agtakderto iti rabaw ti bantay sadiay. Agguduanto ti bantay. Magunggonto ti daga. Magunggonto dagiti langit. Madadaelto dagiti dakes a tao.
Makitanto dagiti tao iti Jerusalem ni Jesus. Damagendanto: “Ania dagiti sugat iti ima ken sakam?” Kunananto: “Siak ni Jesus a nailansa iti krus. Siak ti Anak ti Dios.” Ket agsangitto dagiti tao. Maladingitandanto ta mailansa ni Jesus iti krus.
Kasta unayto ti ragsak dagiti nalinteg a tao a makakita ken ni Jesus. Kukuadanto ti sibubukel a lubong. Didanto paallilaw ken ni Satanas. Natibkerdanto. Maaddaandanto iti adu nga annak. Dumakkelto dagiti annakda ket agtungpalda iti Dios. Makipagnaedto ni Jesus kadagiti nalinteg a tao iti uneg ti sangaribu a tawen. Isunto ti arida.
Imbaga ni Jesus ken ni Joseph Smith a mangipatulod kadagiti misionario a mangisuro iti tunggal maysa maipapan iti panagsublina. Kinunana a nasken nga agsagana dagiti Santo. Nasken nga agkararag ken agayunoda. Nasken nga agsisinnuroda maipapan kadagiti bilin.
Kinuna ni Jesus a nasken nga agkalikagum nga umasideg dagiti Santo kenkuana. Iti kasta asidegto isuna kadakuada. No agkiddaw dagiti Santo iti tulong ti Dios, tulongannanto ida.
Nasken nga aramiden dagiti Santo ti amin a kabaelanda a makatulong ken ni Jesus. No tulongan dagiti tao ni Jesus, agbalinda a kas kenkuana. Iti kasta nakasaganadanto para iti maikadua a yaayna.