Maika-64 a Paset

Ti Simbaan ni Jesucristo Ita

Adu a tawenen ti napalabas manipud idi nairugi ti Simbaan iti Fayette, Nueva York. Dakkel nga amang ti dinur-asan ti Simbaan kadagidiay a tawen. Idi tawen ti 1830, innem a tao ti nangirugi iti Simbaan, idinto a nagbuya dagiti dadduma.

Napan dagiti misionario iti adu a pagilian tapno isuroda ti ebanghelio. Dimngeg dagiti tao kadagiti misionario. Namatida iti ebanghelio ket nagkamengda iti Simbaan. Ita minilionen a kameng ti Simbaan ti agnanaed iti amin a suli ti lubong. Agsasaoda iti adu a pagsasao. Naragsakda nga agbalin a kameng ti Simbaan.

Idi 6 ti Abril 1980, nagkasangay ti Simbaan. Sangagasut-ket-limapulo a tawennan. Adda naisangsangayan a komperensia ti Simbaan iti dayta a panagkasangayna. Adda dua a taripnong a naggiddan. Naangay ti maysa a taripnong iti Fayette, Nueva York. Adda ni Propeta Spencer W. Kimball iti maysa a balay a nabangon a kalanglanga iti pagtaengan ni Peter Whitmer.

Naangay ti sabali a taripnong iti tabernakulo iti Siudad ti Salt Lake. Rinibu a tattao ti adda iti taripnong. Nagsarita ni Presidente Kimball kadagiti Santo iti telebision. Indatonna ti balay ni Peter Whitmer. Naragsakan unay dagiti amin a kameng ti Simbaan a nakakita ken nakangngeg iti propeta. Nagasat unay dagiti kameng ti Simbaan. Nasken nga agyamantayo agsipud ta kamengtayo ti Ti Simbaan ni Jesucristo dagiti Santo iti Ud-udina nga Aldaw. Addaantayo iti propeta a mangibagnos kadatayo.