“Maika-27 a Paset: Ti Trabaho ni Propeta Joseph Smith: Marso 1832,” Dagiti Estoria iti Doktrina ken Katulagan (2002), 104–7
“Maika-27 a Paset,” Dagiti Estoria iti Doktrina ken Katulagan, 104–7
Maika-27 a Paset
Ti Trabaho ni Propeta Joseph Smith
(Marso 1832)
Adda singin a maladaga da Joseph Smith ken ti asawana a ni Emma. Nagsakit ket natay dagiti maladaga. Adda met singin a maladaga dagiti gayyem ni Joseph, ngem natay ti ina dagitoy a singin. Inampon da Joseph ken Emma dagiti maladaga ket inaywananda ida.
Imbaga ni Jesus ken ni Joseph a basaenna ti Biblia. Binalbaliwan dagiti tao ti sumagmamano a balikas iti Biblia. Imbaga ni Jesus ken ni Joseph dagiti umno a balikas a maisurat iti Biblia. Tinulongan ni Sidney Rigdon ni Joseph a nangisurat kadagiti balikas a kayat ni Jesus iti Biblia.
Saan a naawatan ni Joseph Smith ti sumagmamano a paset ti Biblia. Nagsaludsod iti Dios. Sinungbatan amin ni Apo Jesucristo dagiti saludsod. Insurat ni Joseph dagiti sungbat tapno mabasa dagiti Santo.
Naragsakan ni Jesus iti trabaho ni Joseph. Naindaklan a propeta ni Joseph. Ngem saan a naragsakan ni Satanas. Kayat ni Satanas a maisardeng ti trabaho ni Joseph. Kayat ni Satanas a guraen dagiti tao ni Joseph.
Maysa a rabii, napan iti pagtaengan ni Joseph ti bunggoy dagiti mangriribuk a tattao a kasta unay ti pungtotda. Dinadaelda ti ridaw ti balayna. Simrekda. Ub-ubbaen ni Joseph ti maysa kadagiti maladaga. Masakit unay ti maladaga.
Ginutad dagiti dakes a lallaki ni Joseph. Nabati nga agmaymaysa ti maladaga. Natay ti maladaga iti saan a nabayag. Kinugtaran dagiti lallaki nga inruar ni Joseph iti nalam-ek a rabii. Binekkel dagiti lallaki ni Joseph.
Sumagmamano a lallaki ti nagtarigagay a mangdangran ken ni Joseph. Kayat dagiti dadduma a lallaki a patayen isuna. Pinadasda a bukbokan ti ngiwatna iti sabidong. Pinurida ti maysa kadagiti ngipenna. Inuram ti sabidong ti bagina.
Pinigis dagiti lallaki ti kawes ni Joseph ket binuyatanda iti alkitran. Binungonda ti bagina kadagiti dutdot. Dimket dagiti dutdot iti alkitran.
Kalpasanna pimmanaw ti bunggoy dagiti mangriribuk. Impagarupda a matay ni Joseph. Inkarigatan ni Joseph ti timmakder. Ngem dina kabaelan. Naginana iti sumagmamano a kanito. Kalpasanna nagkaradap a simrek iti balayna.
Inikkat dagiti gagayyem ni Joseph ti alkitran a dimket iti bagina. Narigat a maikkat ti alkitran. Nauram ken naglupsit ti kudilna. Naut-ot daytoy.
Saan nga impalubos ni Joseph Smith a pagsardengen dagiti mangriribuk ti aramidna. Domingo ti simmaruno nga aldaw. Napan ni Joseph iti simbaan. Sumagmamano kadagiti lallaki iti bunggoy a mangriribuk ti dimteng iti taripnong ti simbaan. Nasdaawda a nakakita ken ni Joseph. Nagsarita ni Joseph iti simbaan. Saan a mapagsardeng ni Satanas ti trabaho ti Propeta.