“Maika-51 a Paset: Ti Gimong ti Kaasi: Marso 1842,” Dagiti Estoria iti Doktrina ken Katulagan (2002), 186–89
“Maika-51 a Paset,” Dagiti Estoria iti Doktrina ken Katulagan, 186–89
Maika-51 a Paset
Ti Gimong ti Kaasi
(Marso 1842)
Patpatakderen idi dagiti kameng ti Simbaan ti templo ti Nauvoo. Rutroten dagiti bado dagiti lallaki. Kayat dagiti babbai a tulongan ida. Maysa a babai ti nagkuna nga idaitanna iti bado dagiti lallaki. Ngem awan met ti kuarta nga igatangna iti lupot.
Kinuna ni Sarah M. Kimball nga ikkanna dagiti babbai iti sumagmamano a lupot. Kiniddaw ni Sister Kimball a tumulong dagiti dadduma a babbai. Adda taripnong dagiti babbai iti pagtaengan ni Sister Kimball. Inkeddengda ti mangbukel iti gimong dagiti babbai iti Simbaan.
Kiniddaw dagiti babbai ken ni Eliza R. Snow a mangisurat iti sumagmamano nga alagaden para iti gimong. Impanna ken ni Joseph Smith dagiti alagaden. Kinuna ni Joseph Smith a napintas unay dagiti alagaden. Ngem kinunana nga adda nasaysayaat a plano ti Apo para kadagiti babbai.
Kiniddaw ni Joseph Smith kadagiti babbai a dumar-ay iti taripnong iti 17 ti Marso 1842. Kinunana a tumulong dagiti dadaulo ti kinasaserdote kadagiti babbai iti gimongda. Adda sangapulo-ket-walo a babbai iti taripnong. Napili ni Emma Smith a dadaulo dagiti babbai. Inawaganda ti gimongda iti Gimong ti Kaasi.
Imbaga ni Joseph Smith kadagiti babbai a tumulongda kadagiti tao a masakit wenno nakurapay. Nasken nga ipaayanda koma dagiti tao iti ania man a tulong a kasapulanda. Tumulong ti obispo kadagiti babbai a mangammo no ania ti aramidenda.
Nagtataripnong dagiti babbai tapno masursuroda dagiti banag a nasken a maammuanda. Naragsakanda unay ta makatulongda kadagiti kameng ti Simbaan.
Nagaramid dagiti babbai kadagiti banag a para iti templo. Nagdaitda kadagiti bado para kadagiti lallaki a mangipatpatakder iti templo.
Mangted dagiti babbai iti taraon dagiti tao a makasapul iti daytoy. Inaywananda dagiti tao a masakit. Adu dagiti banag nga inaramidda a makatulong kadagiti Santo.
Makapan dagiti babbai ti Simbaan iti Gimong ti Kaasi. Tulonganda dagiti tao. Sursuruenda ti maipapan iti ebanghelio. Sursuruenda ti maipapan kadagiti tao iti dadduma a pagilian. Sursuruenda ti maipapan kadagiti nasayaat a libro, musika, ken arte. Sursuruenda no kasano ti mangpasayaat kadagiti bukodda a pagtaengan.