“Maika-22 a Paset: Dagiti Santo iti Missouri: Hulio–Agosto 1831,” Dagiti Estoria iti Doktrina ken Katulagan (2002), 84–88
“Maika-22 a Paset,” Dagiti Estoria iti Doktrina ken Katulagan, 84–88
Maika-22 a Paset
Dagiti Santo iti Missouri
(Hulio–Agosto 1831)
Napan da Propeta Joseph Smith, Sidney Rigdon, Edward Partridge, ken dadduma pay iti Missouri. Naragsakda unay a napan. Kayatda nga ipatakder ti siudad ti Zion. Kayatda nga ipakita ti Apo kadakuada ti umno a lugar.
Nagluganda iti bilog iti dadduma a paset ti pannagnada. Idi nakadanonda iti Missouri, tinarigagayan ni Joseph ti magna. Ammona a sagrado ti daga ti Missouri. Kayatna a makita daytoy.
Nagna da Joseph ken dagiti gagayyemna iti 300 a milia a napan iti Jackson County. Napudot, ngem dida inkankano. Kayatda ti mapan sadiay tapno ipatakderda ti Zion.
Napan ti propeta ken dagiti gayyemna iti Jackson County, Missouri. Sinabat ida dagiti misionario iti Kirtland.
Kalpasan ti sumagmamano nga adlaw, napan met dagiti Santo a naggapu iti Nueva York iti Jackson County. Naragsakan ti tunggal maysa iti kaaddada sadiay.
Imbaga da Propeta Joseph ken ni Obispo Edward Partridge no ania ti aramiden dagiti tao. Sumagmamano kadakuada ti nasken a gumatang iti daga iti Missouri. Nasken a rugian da Oliver Cowdery ken William W. Phelps ti mangipatakder kadagiti eskuela. Nasken nga agsuratda kadagiti libro a kabaelan a basaen dagiti babassit nga ubbing.
Kayat a maammuan ni Joseph no sadino ti pakaipatakderan ti siudad ti Zion. Nagkararag iti Nailangitan nga Ama. Nasungbatan ti kararagna.
Imbaga ti Apo a maipatakderto ti Zion iti asideg ti siudad ti Independence iti Jackson County, Missouri. Imbaga ti Apo ken ni Joseph no sadino ti pakaipatakderan ti templo. Imbagana a saan pay a marugian ti Zion iti mabiit. Adu pay a pannubok ti paglasatan dagiti Santo. Ngem maipatakderda ti Zion no addaanda iti umdas a pammati.
Imbaga ti Apo ken ni Joseph a nasken a tungpalen dagiti Santo ti linteg ti Missouri. Nasken a tungpalenda dagiti bilin ti Dios. Nasken nga agaramidda kadagiti nasayaat a banag nga awan ti mangibagbaga kadakuada. Nasken nga agbabawi dagiti Santo kadagiti basolda. Saanen a malagip ti Apo dagiti basol ti tao no agbabawida.
Imbaga ti Apo a nasken nga idaton ni Sidney Rigdon ti daga. Dinamag ni Sidney Rigdon kadagiti Santo no agyamanda para iti daga. Dinamagna no tungpalenda met la amin dagiti bilin ti Dios. Simmungbat dagiti Santo iti “Wen.” Ket nagkararag ni Sidney Rigdon ken indatonna ti daga.
Nagmiting iti sumaruno nga aldaw da Joseph Smith, Oliver Cowdery, Sidney Rigdon ken sumagmamano kadagiti gagayyemda. Nagsasarakda iti naisangsangayan a lugar iti Independence. Binasada dagiti nasantuan a kasuratan. Nagkararagda kalpasanna. Indaton ni Joseph Smith ti lugar a pakaipatakderanto ti templo.
Napan amin dagiti Santo iti Missouri iti maysa a komperensia. Napnuanda iti Espiritu Santo. Imbaga ni Joseph kadagiti Santo a bendisionan ida ti Dios no tungpalenda la ketdi dagiti karida.
Kalpasan ti sumagmamano nga aldaw, inikkan ni Jesus ni Joseph iti sabali pay a paltiing. Kinunana a naisangsangayan nga aldaw ti Domingo. Ti Domingo ti aldaw a nasken a panagaramidtayo kadagiti banag a pakalagipantayo ken ni Jesus. Nasken a saantayo nga agtrabaho iti Domingo. Nasken a mapantayo iti Simbaan ket awatentayo ti sakramento. Nasken nga agbabawitayo kadagiti basoltayo. Nasken a sarungkarantayo dagiti masakit. Nasken nga agyamantayo kadagiti naawattayo a parabur. Nasken a tungpalentayo a kanayon dagiti bilin ti Dios.
Addanto amin kadagiti Santo a mangaramid kadagitoy a banag dagiti nasayaat a banag a kasapulanda. Addaandanto iti taraon, pagan-anay, balay, ken minuyongan. Naragsakdanto. Addaandanto iti talna iti daytoy a biag. Addaandanto iti biag nga agnanayon.