“Maika-33 a Paset: Ti Paltiing Maipapan ken ni Jesucristo: Mayo 1833,” Dagiti Estoria iti Doktrina ken Katulagan (2002), 126–27
“Maika-33 a Paset,” Dagiti Estoria iti Doktrina ken Katulagan, 126–27
Maika-33 a Paset
Ti Paltiing Maipapan ken ni Jesucristo
(Mayo 1833)
Kinasao ni Jesus ken ni Propeta Joseph Smith iti maysa nga aldaw. Imbagana ken ni Joseph Smith ti maipapan kenkuana. Kinuna ni Jesus a makita dagiti tao ti rupana ket mailasinda. Umuna, masapul nga isardengdan ti agaramid kadagiti dakes a banag. Nasken nga agkararagda ken tungpalenda dagiti bilin ti Dios. Iti kasta dumtengto ti aldaw a makitada ni Jesus.
Kinuna ni Jesus nga isu ti silaw ti lubong. Ipakita kadatayo ti silaw ti umno a dalan a suroten. Ni Jesus ti silaw ti lubong gapu ta ipakitana kadatayo ti umno a dalan ti panagbiag.
Nagnaed ni Jesus iti sidong ti Nalangitan nga Ama sakbay a naaramid ti daga. Inaramid ni Jesus ti daga. Inaramidna ti amin a banag nga adda iti rabaw ti daga.
Ni Jesus ket saan a kas iti Nailangitan nga Amana idi damo. Dina ammo dagiti banag nga ammo ti Amana. Awan kenkuana ti amin a bileg ken gloria nga adda iti Amana. Inkarigatanna a sipapasnek ti nagbalin a kas iti Amana. Kalpasanna nagbalin a kas iti Dios, ti Ama. Adda bileg ken gloria ni Jesus.
Kinuna ni Jesus a nasken a tungpalentayo dagiti bilin ti Dios. Iti kasta maammuantayonto ti kinapudno. Maammuantayonto ti amin a banag. Iti kasta makapagbalintayto a kas iti Dios, ti Ama. Maaddaantayo iti bileg ken gloria.
Kinuna ni Jesus a saan a kayat ni Satanas nga agbalin dagiti tao a kas iti Dios. Saanna a kayat a maammuanda ti kinapudno. Imbaga ni Jesus ken ni Joseph nga isurona ti kaamaanna iti kinapudno.
Kinuna ni Jesus a nasken nga isuro da Sidney Rigdon ken Frederick G. Williams dagiti kaamaanda tapno agtungpalda kadagiti bilin ti Dios. Iti kasta saan a malapdan ni Satanas ti kaamaanda a mangammo iti kinapudno.