Maika-36 a Paset

Kampo ti Zion

(Pebrero–Hunio 1834)

Bayat ti kaadda ni Joseph Smith iti Kirtland, Ohio, nangngegna ti pannakariribuk dagiti Santo iti Missouri. Pinapanaw ida ti bunggoy dagiti mangriribuk kadagiti pagtaenganda. Inkararag dagiti Santo a tulongan koma ida ti Nailangitan nga Ama.

Nangted ni Jesus iti paltiing ken ni Joseph Smith. Kinunana a masapul a mapan ti sumagmamano a lallaki iti Simbaan iti Missouri a tumulong kadagiti Santo. Ni Joseph Smith ti agbalin a dadauloda. Nasken a mangitugotda iti kuarta a paggatang iti daga. Kayat ti Apo a lima gasut a lallaki ti mapan.

DkK 103:21–23, 31–32

Nagtungpal ni Joseph iti Apo. Imbagana kadagiti Santo a nasken a lima gasut a lallaki ti mapan iti daga ti Zion iti Missouri. Kiniddawna a mapan dagiti lallaki iti Kirtland. Sangagasut laeng a lallaki ti napan. Saan a tinungpal dagiti dadduma a lallaki ti Apo.

Naawagan dagiti sangagasut a lallaki iti Kampo ti Zion. Nagrugida iti daga ti Zion. Sumagmamano kadagiti lallaki ti nagna. Naglugan iti karison dagiti dadduma. Maymaysa ti kampoda iti rabii. Iti dalanda, sangagasut pay a lallaki ti simmurot kadakuada.

Nagdaliasat dagiti lallaki iti sangaribu a milia. Atiddog ken narigat ti dalan. Awan ti umdas a nasayaat a taraon dagiti lallaki.

Sumagmamano kadagiti lallaki ti nagkuna a narigat unay ti panagdaliasatda. Saanda a kayat ti taraon. Kinunada a saan a nasayaat a dadaulo ni Joseph Smith. Imbaga ni Joseph kadagitoy a lallaki nga agbabawida. No dida agbabawi, agsakit ket matayda.

Sumagmamano kadagiti lallaki ti nalinteg. Tinulonganda ni Joseph Smith. Tinungpalda dagiti bilin ti Dios. Impakitada no kasano ti panangipategda iti Simbaan ni Jesucristo. Kanayonto a malaglagip ni Joseph Smith no kasano ti panangtulongda kenkuana.

Iti kamaudiananna, nakadanon met laeng dagiti lallaki iti Kampo ti Zion iti Missouri. Nagkampoda iti igid ti karayan.

Ammo ti bunggoy dagiti mangriribuk nga adda dagiti lallaki sadiay. Iti rabii napan ti bunggoy dagiti mangriribuk iti asideg ti kampo. Kayatda a patayen dagiti lallaki a kameng ti Kampo ti Zion.

Nangibaon ti Dios iti nakaam-amak a bagyo. Rinungrungdo ti napigsa nga angin dagiti kayo. Nagtinnag dagiti dadakkel a tinukel ti niebe manipud iti langit. Nakimat dagiti kayo. Linayus ti danum ti karayan ti daga. Maysa kadagiti lallaki iti bunggoy dagiti mangriribuk ti pinatay ti kimat. Nasugatan dagiti dadduma a lallaki ti bunggoy dagiti mangriribuk.

Nagbuteng dagiti lallaki iti bunggoy dagiti mangriribuk. Ammoda a tultulongan ti Dios dagiti lallaki a kameng ti Kampo ti Zion. Nagtataray ti bunggoy dagiti mangriribuk. Dida nadangran dagiti lallaki a kameng ti Kampo ti Zion. Saan a dinangran ti bagyo dagiti lallaki a kameng ti Kampo ti Zion.

Kalpasan ti dua nga aldaw, nangted ti Apo iti paltiing ken ni Joseph Smith. Kinuna ti Apo a mabalin dagiti lallaki a kameng ti Kampo ti Zion ti agtalinaed iti Missouri wenno agsublida iti Kirtland.

DkK 105:20–21

Kinuna ni Jesus a sumagmamano kadagiti lallaki ti saan a nagtungpal kenkuana. Saan a maragsakan kadakuada. Ngem sumagmamano met kadagiti lallaki ti nagtungpal. Naragsakan ti Apo kadakuada. Kinunana a paraburanna dagitoy iti ad-adu pay a bileg.

DkK 105:2–4, 18–19

Kalpasan ti sumagmamano nga aldaw, adu a lallaki a kameng ti Kampo ti Zion ti nagsakit. Sangapulo-ket-uppat kadakuada ti natay. Imbaga idi ni Joseph kadakuada a mataydanto no saanda nga agbabawi.

Nakipagkita ni Joseph Smith kadagiti Santo iti Missouri. Nangpili kadagiti lallaki ti agkameng iti nangato a konseho. Kalpasanna nagsubli ni Joseph ken dagiti gagayyemna iti Kirtland.

Saan a tinulongan dagiti lallaki a kameng ti Kampo ti Zion dagiti Santo iti Missouri. Saan a makatulong dagiti lallaki agsipud ta saanda a tinungpal ti Dios. Kinuna ti Dios a dagiti laeng nalinteg a tao ti mabalin a mangbangon iti Zion.

DkK 105:2–10