“Maika-31 a Paset: Ti Nainsiriban a Balikas: Pebrero 1833,” Dagiti Estoria iti Doktrina ken Katulagan (2002), 119–22
“Maika-31 a Paset,” Dagiti Estoria iti Doktrina ken Katulagan, 119–22
Maika-31 a Paset
Ti Nainsiriban a Balikas
(Pebrero 1833)
Nangirugi ni Joseph Smith iti pagadalan para kadagiti lallaki iti Simbaan. Naawagan daytoy iti Pagadalan dagiti Propeta.
Adda ti pagadalan iti maysa a siled iti paglakuan ni Newel Whitney iti Kirtland, Ohio. Insuro ni Joseph kadagiti lallaki ti maipapan iti Simbaan. Insurona ida maipapan iti kinasaserdote ken maipapan kadagiti nasantuan a kasuratan.
Adu kadagiti lallaki ti nakasuako wenno nakasigarilio. Napunno ti siled iti asuk. Sumagmamano pay kadagiti lallaki ti nagmuskada. Narugit ti datar (gapu iti muskada ken tuprada). Nasken a madalusan ti siled no nakaawiden dagiti lallaki.
Nasken nga agdalus idi ni Emma nga asawa ni Joseph iti siled kalpasan ti tunggal taripnong. Pinampanunot ni Joseph no nasken nga agsigarilio wenno agmuskada dagiti lallaki.
Nagkakarag ni Joseph ket dinamagna iti Dios no ania ti rumbeng. Nangted ni Jesus ken ni Joseph iti maysa a paltiing. Naawagan daytoy iti Nainsiriban a Balikas. Kinuna ni Jesus a sumagmamano a tao ti agaramid kadagiti dakes a banag. Kayatda nga agaramid dagiti dadduma a tao kadagiti banag a saan a nasayaat para iti bagida. Iti Nainsiriban a Balikas, imbaga ni Jesus kadagiti Santo maipapan kadagiti banag a nasayaat para iti bagida. Imbagana maipapan kadagiti banag a dakes para iti bagida. Maparaburan dagiti Santo no tungpalenda ti Nainsiriban a Balikas.
Imbaga ni Jesus a saan a nasayaat ti alkohol para iti tao. Nasken a saanda nga uminum kadagiti mainum nga adda alkoholna. Nasken a maaramat laeng ti alkohol iti ruar ti bagi.
Kinuna ni Jesus a nasken a saan nga agaramat dagiti tao iti tabako. Nasken a saanda nga agsigarilio, agtabako, wenno agsuako. Nasken a saanda nga agmuskada. Kinuna ni Jesus, “Saan a para iti bagi ti tabako ken saan a nasayaat para iti tao.”
Kinuna ni Jesus a nasken a saan nga uminum dagiti Santo kadagiti napudot a mainum. Napudot a mainum ti tsaa ken kape. Saan a nasayaat dagitoy para iti bagi.
Kinuna ni Jesus nga adu dagiti mula ken ayup a nasayaat a taraon para kadagiti tao. Nasken nga agyaman dagiti tao iti Nailangitan nga Ama iti nasayaat a taraon.
Kinuna ni Jesus a nasken a saan a kaaduen dagiti tao ti agsida iti karne. Agsida laeng dagiti tao iti karne no nalamiis ti panawen. Agsidada laeng iti karne no awan ti umdas a taraon.
Kinuna ti Apo a nasayaat amin dagiti bukbukel nga agpaay iti bagitayo. Sumagmamano kadagiti bukbukel ti trigo, bagas, mais, ken oat meal. Nasayaat unay ti trigo para kadatayo. Nasayaat amin dagiti prutas ken nateng para kadagiti tao.
Kinuna ni Jesus a nasken a tungpalen dagiti Santo ti Nainsiriban a Balikas. Iti kasta paraburanto ti Dios ida. Maaddaandanto iti nasalun-at a bagi. Agbalinda a masirib. Adu dagiti banag a masursuroda. Mabendisionandanto no manganda kadagiti umno a taraon.