“Maika–26 a Paset: Dagiti Tallo a Pagarian ti Langit: 16 Pebrero 1832,” Dagiti Estoria iti Doktrina ken Katulagan (2002), 97–103
“Maika–26 a Paset,” Dagiti Estoria iti Doktrina ken Katulagan, 97–103
Maika–26 a Paset
Dagiti Tallo a Pagarian ti Langit
(16 Pebrero 1832)
Agbasbasa da Joseph Smith ken Sidney Rigdon iti Baro a Tulag iti maysa nga aldaw. Ibaga ti Baro a Tulag a mapan dagiti nasayaat a tao iti langit kalpasan ti panagungarda. Pampanunoten ni Joseph no mapan amin dagiti tao iti maymaysa a lugar iti langit. Nagkararag da Joseph ken Sidney. Dinawatda iti Nailangitan nga Ama nga ibagana kadakuada ti maipapan iti Langit.
DkK 76: Pakauna
Sinungbatan ti Nailangitan nga Ama ti kararagda. Adda naipaltiing kadakuada. Maysa a napintas a parmata. Iti parmata, nakita da Joseph ken Sidney ti langit. Nakitada ni Jesus a nabungon iti lawag. Kalpasanna nakitada dagiti anghel a nanglikmut ken ni Jesus ken ti Nailangitan nga Ama.
DkK 76: Pakauna DkK 76:19–21
Kinuna da Joseph ken Sidney nga ammoda a nagbiag ni Jesus. Nakitada isuna! Nakangngeg da Joseph ken Sidney iti maysa a timek. Imbaga ti timek a ni Jesus ti Anak ti Dios. Immay isuna ditoy lubong. Impakita ni Jesus kadagiti amin a tao no kasano ti agbiag tapno makadennadanto manen iti Nailangitan nga Ama.
Kalpasanna nakita da Joseph ken Sidney ti lugar a papanan dagiti tao kalpasan ti panagungarda. Adda tallo a lugar a papanan dagiti tao iti langit. Mapan dagiti nalinteg a Santo iti celestial a pagarian iti langit kalpasan ti panagungarda. Ti celestial a pagarian ti lugar a pagnaedan ti Nailangitan nga Ama ken ni Jesus.
Adda pammati dagiti nalinteg a Santo ken ni Jesus idi nagnaedda iti daga. Nabuniaganda. Insuro ida ti Espiritu Santo no kasano ti agbiag.
Adu ti parikut dagiti nalinteg a Santo, ngem adda pammatida. Tinulongan ida ni Jesus idi adda parikutda. Nagtrabahoda a sipapasnek. Nagbabawida ket tinungpalda dagiti bilin ti Dios. Sinulisog ida ni Satanas, ngem dina sinurot ni Satanas.
Agbalinto a kas iti Nailangitan nga Ama ken ni Jesus dagiti nalinteg a Santo. Maammuandanto ti amin a banag. Agbalindanto a naan-anay. Agbalindanto a dios.
Kalpasanna nakakita manen da Joseph ken Sidney iti sabali a lugar. Maawagan daytoy iti terestrial a pagarian ti langit. Sumagmamanonto a tao ti mapan iti terestrial a pagarian kalpasan ti panagungarda.
Nasayaat a tao idi addada iti daga dagiti tao iti terestrial a pagarian. Ngem saanda a nalinteg a Santo. Awan ti pammatida ken ni Jesus. Tinungpalda dagiti dadduma a bilin ti Dios. Ngem dida tinungpal amin dagiti bilin.
Saanda a namati iti ebanghelio idi nangngeganda daytoy ditoy daga. Namatida iti ebanghelio kalpasan ti ipapatayda.
Makitanto dagiti tao iti terestrial a pagarian ni Jesus. Ngem didanto makapagnaed iti sidong ti Nailangitan nga Ama wenno ni Jesus. Saandanto nga agbalin a dios.
Nakita da Joseph ken Sidney ti maikatlo a lugar. Maawagan daytoy iti telestial a pagarian ti langit. Saan a nalinteg idi addada ditoy daga dagiti tao a mapan iti telestial a pagarian.
Saan a namati ken ni Jesus dagitoy a tao. Saanda a namati kadagiti propeta. Saanda a nabuniagan. Saanda a tinungpal dagiti bilin ti Dios.
Saan a makita dagiti tao a mapan iti telestial a pagarian ni Jesus wenno ti Nailangitan nga Ama. Sarungkaranto ida dagiti anghel. Isuronto ida ti Espiritu Santo. Maammuanto dagiti tao iti telestial a pagarian ti maipapan ken ni Jesus ken ti Nailangitan nga Ama. Ngem saandanto a pulos makapagnaed kadakuada.
Agungarto dagiti tao a mapan iti celestial ken iti terestrial a pagarian no umayto manen ni Jesus. Saanto nga agungar dagiti tao a mapan iti telestial a pagarian inton umay manen ni Jesus. Masapul nga agurayda iti sangaribu a tawen sakbay nga agungarda.
Nakita da Joseph ken Sidney no sadino ti papanan dagiti dakes a tao. Kaduadanto ni Satanas. Saanda a mabalin ti makidenna iti Nailangitan nga Ama, ken ni Jesus wenno iti Espiritu Santo.
Nasuruan iti ebanghelio iti daga dagiti tao a kaduanto ni Satanas. Insuro ti Espiritu Santo ida iti maipapan ken ni Jesucristo.
Ammoda a nagbiag ni Jesus. Ammoda a natay ni Jesus gapu kadatayo. Ngem sinulisog ni Satanas dagitoy a tao. Inallukoyna ida nga agaramid kadagiti dakes a banag. Tinungpalda ni Satanas. Insardengda ti dimngeg iti Espiritu Santo. Insardengda ti namati ken ni Jesus. Nagbalinda a nadakes unay. Kadennadanto nga agnanayon ni Satanas.
Nakakita pay iti dadduma a banag da Joseph ken Sidney iti parmatada. Imbaga ni Jesus kadakuada a saanda nga isurat amin a banag a nakitada. Masaksian dagiti nalinteg unay a Santo iti mismo a bagida dagitoy a banag. Isuronto ida ti Espiritu Santo. Nagyaman da Joseph ken Sidney iti Dios iti daytoy napintas a parmata.