“Maika-47 a Paset: Dimmawat ni Joseph Smith iti Tulong iti Presidente: Marso–Nobiembre 1839,” Dagiti Estoria iti Doktrina ken Katulagan (2002), 176–79
“Maika-47 a Paset,” Dagiti Estoria iti Doktrina ken Katulagan, 176–79
Maika-47 a Paset
Dimmawat ni Joseph Smith iti Tulong iti Presidente
(Marso–Nobiembre 1839)
Imbaga ni Joseph kadagiti Santo nga isuratda ti nagan dagiti dakes a tao a nangdangran kadakuada. Nasken nga ibagada no kasano a nadadael dagiti pagtaengan ken talonda.
Maysa nga aldaw sumagmamano nga agbambantay ti nangyakar ken ni Joseph ken dagiti uppat a gagayyemna iti sabali a pagbaludan. Gimmatang da Joseph ken dagiti gagayyemna iti dua a kabalio manipud kadagiti agbambantay. Nangtedda kadakuada iti lupot a kas bayad ti maysa a kabalio. Inkarida a maud-udi ti bayad ti maysa a kabalio.
Maysa a rabii, uppat kadagiti agbambantay ti nabartek ket nakaturog. Sabali nga agbambantay ti timmulong ken ni Joseph ken dagiti gagayyemna nga aglibas.
Nagsisinnublat a pinagsakayan da Joseph ken dagiti gagayyemna ti kabalio. Napanda iti Quincy, Illinois. Sangapulo nga aldaw a nagdaliasatda sakbay a nakadanonda sadiay.
Nasarakan ni Joseph ken dagiti gagayyemna dagiti kaamaanda. Naragsakanda a makadenna manen ida.
Kayat dagiti Santo ti mangbirok iti lugar iti Illinois a pangbangonanda iti maysa a siudad. Gimmatangda iti sumagmamano a daga iti asideg ti Karayan Mississippi. Nabasa ken napitak ti daga. Immakar da Joseph ken dagiti Santo sadiay. Sipapasnekda a nagtrabaho a nangpamaga iti daga. Nagipatakderda kadagiti pagtaengan ken nagitukitda kadagiti mula. Nangipatakderda iti maysa napintas a siudad. Ninagananda ti siudad iti Nauvoo. Kayat a sawen ti Nauvoo ket napintas a lugar.
Idi agangay, napan nakipagkita ni Joseph Smith iti presidente ti Estados Unidos. Imbaga ni Joseph iti presidente ti maipapan kadagiti bunggoy a mangriribuk iti Missouri. Imbagana no kasano ti panangpuor dagiti dakes a tao iti pagtaengan dagiti Santo ken panangtakawda kadagiti tarakenda nga ayup.
Kinuna ni Joseph a sumagmamano kadagiti Santo ti napapatay. Naibalud dagiti dadduma a Santo. Impakitana iti presidente no ania ti insurat dagiti Santo. Kinuna ni Joseph a saan a tulongan dagiti dadaulo iti Missouri dagiti Santo. Kiniddawna iti presidente a tulonganna koma dagiti Santo ket dusaenna dagiti kabusorda.
Kinuna ti presidente nga ammona a nagsagaba dagiti Santo. Ngem awan ti maaramidna a tulong kadakuada. No tulonganna dagiti Santo, agunget dagiti tao iti Missouri.
Nagladingit ni Joseph agsipud ta saan a matulongan ti presidente dagiti Santo. Ti laeng Nailangitan nga Ama ti makatulong kadakuada.