Dagiti Estoria iti Nasantuan a Kasuratan

Maika-53 a Paset: Ti Dios ken Dagiti Anghel: Pebrero–Abril 1843

“Maika-53 a Paset: Ti Dios ken Dagiti Anghel: Pebrero–Abril 1843,” Dagiti Estoria iti Doktrina ken Katulagan (2002), 194–97

“Maika-53 a Paset,” Dagiti Estoria iti Doktrina ken Katulagan, 194–97

Maika-53 a Paset

Ti Dios ken Dagiti Anghel

(Pebrero–Abril 1843)

Maysa nga aldaw, maysa a lalaki ti napan nakipagkita ken ni Joseph Smith. Kinuna ti lalaki a nakakita isuna iti anghel. Imbagana ken ni Joseph Smith no kasano nga agkawes ti anghel. Kinuna ni Joseph Smith a nagbiddut ti lalaki. Imbagana a saan nga agkawes dagiti anghel iti wagas a kas iti kinuna ti lalaki.

Kasta unay ti pungtot ti lalaki. Imbilinna nga adda koma agtinnag nga apuy manipud iti langit tapno mapuoran ti Propeta ken ti balayna. Ngem awanan ti lalaki iti bileg ti Dios. Awan apuy a nagtinnag manipud iti langit.

Nangted ni Jesus iti paltiing ken ni Joseph Smith maipapan kadagiti anghel. Imbaga ni Jesus a tao dagiti anghel a nagbiag iti daga. Natayda ken napagungarda. Adda bagida a nagtagilasag ken tulang. Ita agbiagda a kadennada ti Dios.

Kinuna ni Jesus a padpadasen ni Satanas nga allilawen dagiti tao. No dadduma pagbalinenna a panunoten dagiti tao nga isu ket maysa nga anghel. Padasenna nga allukoyen dagiti tao nga agaramid kadagiti dakes a banag. Ngem ammo dagiti nalinteg a tao no padpadasen ni Satanas ida nga allilawen.

Iti saan a nabayag, imbaga ni Joseph Smith kadagiti tao ti dadduma pay a banag maipapan iti langit. Dagiti tao a nagbiag a nalinteg ditoy daga ket agbiagdanto iti langit a kadenna ni Jesucristo. Iti langit ammodanto amin a banag a nasursuroda iti daga.

Imbaga ni Joseph Smith nga amin dagiti paglintegan ti Dios ket naaramid iti langit sakbay nga immaytayo ditoy daga. Adda parabur ti tunggal paglintegan. Nasken nga agtungpaltayo iti paglintegan tapno adda kadatayo ti parabur.

Imbaga ni Joseph Smith kadagiti Santo ti maipapan ken ni Jesucristo ken ti Nailangitan nga Ama. Kalanglanga ni Jesus ti tao. Nagbiag isuna iti daga. Natay ken nagungar. Adda bagina a nagtagilasag ken tulang.

Addaan iti bagi a nagtagilasag ken tulang ti Nailangitan nga Ama. Agnaed isuna iti napintas, agrimrimat a lugar.

Kinuna pay ni Joseph Smith a maysa nga espiritu ti Espiritu Santo. Awanan iti bagi a nagtagilasag ken tulang ti Espiritu Santo.