“Maika-29 a Paset: Ti Paltiing Maipapan iti Kinasaserdote: Septiembre 1832,” Dagiti Estoria iti Doktrina ken Katulagan (2002), 113–16
“Maika-29 a Paset,” Dagiti Estoria iti Doktrina ken Katulagan, 113–16
Maika-29 a Paset
Ti Paltiing Maipapan iti Kinasaserdote
(Septiembre 1832)
Adu a lallaki iti Simbaan ti napan kadagiti mision. Idi nagawidda, napanda kinita ni Joseph Smith Iti Kirtland.
Insalaysay dagiti lallaki ken ni Joseph ti maipapan iti misionda. Binuniaganda ti adu a tao. Naragsakanda maipapan iti panagmisionda. Naragsakan met ni Propeta Joseph.
Addaan amin dagitoy a misionario iti kinasaserdote. Bileg ti Dios ti kinasaserdote. Adu pay ti kayat a maammuan dagiti misionario maipapan iti kinasaserdote.
Nangted ni Jesus iti maysa a paltiing ken ni Joseph para kadakuada. Imbaga ni Jesus ken ni Joseph ti maipapan iti sumagmamano a lallaki nga addaan iti Kinasaserdote a Melchizedek. Adda kinasaserdote ni Adan. Isu ti immuna a lalaki a nagbiag ditoy daga.
Adda amin kinasaserdote dagiti propeta iti Daan a Tulag. Maibilang iti sumagmamano a propeta da Enoc, Noe, Moises, Melchizedek, ken Abraham. Inted ni Melchizedek ti kinasaserdote ken ni Abraham.
Kinuna ni Jesus a dagiti lallaki nga addaan iti kinasaserdote ti mangidaulo iti Simbaanna. Mabalinda ti mangbuniag ken mangted iti sagut ti Espiritu Santo. Mabalinda ti mangbendision iti sakramento. Mabalinda ti mangbendision kadagiti masakit a tao. Makatulong amin dagitoy kadagiti Santo nga agsagana a mangkita iti Dios.
Imbaga ni Jesus ken ni Joseph a nasken nga agbalin a nalinteg dagiti lallaki. Iti kasta maaddaanda iti kinasaserdote. Agaramid ti Dios iti maysa a katulagan kadakuada. Ti katulagan ket maysa a kari. Ikari ti Dios a paraburanna dagiti lallaki nga addaan iti kinasaserdote. Ikari dagiti lallaki nga aramatenda ti bileg ti kinasaserdote a tumulong iti sabali a tao. Makapagbalin dagiti lallaki nga addaan iti kinasaserdote a naisangsangayan nga annak ti Dios. Maysa nga aldaw, ibinglayto ti Nailangitan nga Ama kadakuada dagiti amin nga adda kenkuana.
Imbaga ni Jesus ken ni Joseph no kasano nga aramaten dagiti lallaki iti Simbaan ti kinasaserdote. Maaramat laeng dagiti nalinteg a lallaki ti kinasaserdote. Nasken a saan nga aramaten iti kaano man dagiti lallaki ti kinasaserdote tapno pagpangas wenno pagtangsit. Saan nga ikkan ti Dios iti bileg ti kinasaserdote dagiti lallaki a natangsit.
Nasken nga aramaten dagiti lallaki ti kinasaserdote nga addaan ayat ken panangngaasi. Nasken a dumngegda iti Espiritu Santo. Iti kasta agnanayonto nga adda kadakuada ti bileg ti kinasaserdote. Kaduaento nga agnanayon ida ti Espiritu Santo.
Imbaga ni Jesus ken ni Joseph Smith a nasken nga ad-adu koma dagiti lallaki a mapan iti mision. Nasken nga ikasabada ti ebanghelio iti amin a paset ti lubong. Nasken nga isuroda a ti Dios ti mangukomto iti amin a tao. Nasken nga isuroda nga agbabawi dagiti tao. Nasken a buniaganda dagiti tao ket itedda kadakuada ti Espiritu Santo.
Kinuna ni Jesus a maparaburan dagiti misionario no agtrabahoda a sipapasnek. Tulonganto ida dagiti anghel. Ited ti Nailangitan nga Ama dagiti banag a kasapulanda.
Naggibus ti paltiing. Naragsakan ni Joseph ken dagiti misionario iti pannakaammoda iti ad-adu pay maipapan iti kinasaserdote. Kayatda nga aramaten ti bileg ti kinasaserdote iti rumbeng a wagas. Kayatda nga isuro dagiti dadduma maipapan iti Simbaan.