“Maika-38 a Paset: Ti Perlas a Kapatgan,” Dagiti Estoria iti Doktrina ken Katulagan (2002), 145–50
“Maika-38 a Paset,” Dagiti Estoria iti Doktrina ken Katulagan, 145–50
Maika-38 a Paset
Ti Perlas a Kapatgan
Maysa a libro ti Perlas a Kapatgan. Tinulongan ti Dios dagiti propeta a nangisurat iti Perlas a Kapatgan. Maysa daytoy kadagiti nasantuan a kasuratantayo. Adda uppat a benneg iti Perlas a Kapatgan. Dagitoy ti Libro ni Moises, Libro ni Abraham, dagiti sinurat ni Joseph Smith, ken ti Pagannurotan ti Pammati.
Ti Libro ni Moises
Paltiing a naited ken ni Joseph Smith ti adda iti umuna a paset ti Perlas a Kapatgan. Maawagan daytoy iti Libro ni Moises. Maysa a propeta ti Dios ni Moises. Nagbiag daytoy iti nabayagen a panawen.
Isalaysay ti Libro ni Moises no ania ti kinuna ti Dios ken ni Moises iti nangato a bantay. Nakita ni Moises ti Dios ket nakisao kenkuana. Kinuna ti Dios nga adda naisangsangayan a trabaho nga aramiden ni Moises.
Impakita ti Dios ken ni Moises ti lubong. Nakita ni Moises dagiti amin a mapasamakto iti lubong. Nakitana amin dagiti annak ti Dios nga agbiagto iti lubong.
Pinanawan ti Dios ni Moises. Dimteng ni Satanas. Imbagana ken ni Moises nga agrukbab kenkuana. Saan a kayat ni Moises ti agrukbab ken ni Satanas. Kinuna ni Moises, “Anaknak ti Dios.” Indawat ni Moises iti Dios a tulonganna daytoy. Kalpasanna imbagana a pumanaw ni Satanas. Napalalo ti pungtot ni Satanas gapu ta saan a sumurot ni Moises kenkuana. Pinanawan ni Satanas ni Moises.
Napno ni Moises iti Espiritu Santo. Dimteng ti Dios ket kinasaritana manen ken ni Moises. Kinuna ti Dios nga anak ti Dios ni Jesucristo a Mangisalakan. Imbaga ti Dios nga adu dagiti lubong. Inaramid dagitoy ni Jesus. Adunto pay ti aramidenna a lubong. Adunto latta dagiti lubong. Agindegto kadagitoy dagiti annak ti Dios.
Nasursuro ni Moises ti maipapan kadagiti aramid ti Dios. Agtrabaho ti Dios a makatulong kadagiti tao tapno makapagnaeddanto nga agnanayon kenkuana. Agtrabaho isuna a mangtulong kadagiti tao nga agbalin a kas kenkuana. Isalaysay pay ti Libro ni Moises ti maipapan ken ni propeta Enoc ken ti siudad ti Zion.
Ti Libro ni Abraham
Ti Libro ni Abraham ti maikadua a paset ti Perlas a Kapatgan. Iti maysa nga aldaw idi Hulio 1835, maysa a lalaki nga agnagan iti Mr. Chandler ti dimteng iti Kirtland. Ipakpakita ni Mr. Chandler kadagiti tao ti sumagmamano a napreserba a bangkay [mummies] a naggapu iti Egipto. No matay dagiti tao iti Egipto, mabungon ti bagida iti lupot. Maawagan dagiti bangkay iti mummies.
Sumagmamano a nalukot a nakadadaanen a papel ti naikuyog kadagiti napreserba a bangkay. Sumagmamano a karkarna a sinurat ti adda kadagiti papel. Agsapsapul ni Mr. Chandler iti maysa a tao a makabasa iti sinurat. Nangngegna a kabaelan ni Joseph Smith nga iparatus ti sinurat.
Kinita ni Joseph ti naisurat iti papel. Mabasana dagiti naisurat. Imbagana ken ni Mr. Chandler no ania ti kayatna a sawen. Sumagmamano kadagiti Santo ti gimmatang kadagiti nalukot a papel ken ni Mr. Chandler.
Impatarus ni Joseph ti naisurat iti papel. Da Oliver Cowdery ken William Phelps ti nagisurat kadagiti impatarus ni Joseph.
Gapuanan ti maysa a naindaklan a propeta a ni Abraham dagiti sinurat. Nagindeg ni Abraham iti nabayagen a panawen iti Egipto. Kinasao ni Jesus ken ni Abraham.
Imbaga ni Jesus ken ni Abraham ti maipapan iti biagtayo sakbay nga immaytayo ditoy daga. Kinuna ni Jesus a pinarsuana ti daga. Inaramidna ti init, bulan, ken dagiti bituen. Inaramidna dagiti mula, ayup, ken tao.
Insurat ni Abraham ti maipapan iti ebanghelio ni Jesucristo. Makatulong kadatayo ti Libro ni Abraham nga umawat iti maipapan kadagiti propeta ken ti kinasaserdote.
Abraham 1:31
Dagiti Sinurat ni Joseph Smith
Sinurat ni Joseph Smith ti maikatlo a paset ti Perlas a Kapatgan. Iti Joseph Smith—Pakasaritaan, insalaysay ni Joseph ti maipapan iti umuna a parmatana. Insalaysayna no kasano a naalana dagiti balitok a pinanid. Insalaysay pay ni Joseph no kasano nga inted dagiti anghel ti kinasaserdote kenkuana ken ni Oliver Cowdery. Iti Joseph Smith—Mateo, inatur ni Joseph ti dadduma a paset ti Biblia.
Ti Pagannurotan ti Pammati ti maikapat a paset ti Perlas a Kapatgan. Maysa nga aldaw, maysa a lalaki ti napan nakipagkita ken ni Joseph Smith. Agsursurat ti lalaki iti maysa a libro. Kayatna nga adda maisurat a paset ti librona a maipapan iti Simbaan. Kiniddawna nga isalaysay ni Joseph Smith no kasano a nangrugi ti Simbaan.
Insurat ni Joseph Smith ti maipapan iti punganay ti Simbaan. Insalaysayna ti pammati dagiti tao ti Simbaan. Tinulongan ti Dios ni Joseph Smith no ania ti isuratna. Nakaisurat ni Joseph iti sangapulo-ket-tallo a napapateg a banag. Inawaganna dagitoy iti Pagannurotan ti Pammati.
Naimaldit ti Pagannurotan ti Pammati iti pagiwarnak ti Simbaan idi Marso 1, 1842. Nabasa dagiti Santo ti Pagannurotan ti Pammati. Namatida kadagiti insurat ni Joseph.
TI PAGANNUROTAN TI PAMMATI
Joseph Smith
Mamatikami iti Dios, ti Agnanayon nga Ama, ken ti Anakna a ni Jesucristo, ken ti Espiritu Santo.
Mamatikami a madusanto dagiti tao gapu kadagiti bukodda a basol a saan a gapu iti nagbasolan ni Adan.
Mamatikami a babaen ti Pannubbot ni Cristo, maisalakan amin a sangkataw-an, babaen ti panagtungpal kadagiti paglintegan ken ordinansa ti Ebanghelio.
Mamatikami a dagiti umuna a pagbatayan ken ordinansa ti Ebanghelio: umuna, Pammati ken Apo a Jesucristo; maikadua, Panagbabawi; maikatlo, Panagbuniag babaen ti pannakairarem iti danum para iti pannakaugas dagiti basol; maikapat, Pannakaipatay dagiti dakulap para iti sagut ti Espiritu Santo.
Mamatikami a nasken nga awagan ti Dios ti tao babaen iti padto, ken babaen ti panangipatay kadagiti dakulap dagiti naikkan iti turay a mangikasaba iti Ebanghelio ken mangannong kadagiti ordinansa.
Mamatikami iti timpuyog a kapada ti Nagkauna a Simbaan a buklen dagiti apostol, propeta, pastor, maestro, mangaskasaba, ken dadduma pay.
Mamatikami iti sagut ti pagsasao, padto, paltiing, parmata, panagagas, panagipatarus ti pagsasao, ken dadduma pay.
Mamatikami a sao ti Dios ti Biblia no husto la ketdi ti pannakaipatarusna; mamatikami met a sao ti Dios ti Libro ni Mormon.
Mamatikami iti amin nga impalgak ti Dios, amin nga ipalpalgakna, ken mamatikami nga adu pay ti ipalgakna a naindaklan ken napateg a banag maipapan iti Pagarian ti Dios.
Mamatikami iti makita a panaguummong ti Israel ken ti pannakaisubli ti kasisigud ti Sangapulo a Tribu; a mabangonto ti Zion (ti Baro a Jerusalem) iti kontinente ti America; nga agturayto a mismo ni Cristo iti daga; a mapabaronto ti daga ken awatennanto ti kangayedan a pannakaitan-okna.
Itandudomi ti karbengan nga agrukbab iti Mannakabalin a Dios babaen ti panangibagnos ti konsensiami, ken ipalugodmi iti amin a tao ti umasping a karbengan, bay-anmi nga agrukbabda iti wagas no kasano, sadino, ken no ania pay.
Mamatikami nga agtungpalkami kadagiti ari, presidente, mangituray, mahistrado, iti panagtungpal, panagdayaw, ken panangkanunog iti paglintegan.
Mamatikami iti kinalinteg, kinapudno, kinadalus ti dayaw, kinamanangngaasi, kinasaguday ken iti panagaramid iti naimbag iti amin a tao; ngarud, masaomi a sursurotenmi ti pannursuro ni Pablo—Mamatikami iti amin a banag, mangnamnamakami iti amin a banag, adun a banag ti inibturmi, ken mangnamnamakami a kabaelanmi pay nga ibturan ti amin a banag. No adda nadalus, makaay-ayo, wenno addaan iti nasayaat a pakasaritaan wenno pakaidayawan, tun-oyanmi dagitoy a banag.