“Maika-16 a Paset: Nasursuro da Joseph Smith ken Sidney Rigdon ti Maipapan iti Zion: 1830,” Dagiti Estoria iti Doktrina ken Katulagan (2002), 61–63
“Maika-16 a Paset,” Dagiti Estoria iti Doktrina ken Katulagan, 61–63
Maika-16 a Paset
Nasursuro da Joseph Smith ken Sidney Rigdon ti Maipapan iti Zion
(1830)
Bayat ti kaadda iti misionda da Oliver Cowdery ken dagiti gagayyemna, nagsardengda iti asideg ti Kirtland, Ohio. Naam-ammoda ti maysa a lalaki nga agnagan iti Sidney Rigdon. Maysa a dadaulo iti sabali a simbaan daytoy.
Inikkan dagiti misionario ni Sidney iti Libro ni Mormon. Insuroda kenkuana ti ebanghelio. Binasa ni Sidney Rigdon ti Libro ni Mormon. Nagkararag maipapan iti daytoy. Imbaga kenkuana ti Nailangitan nga Ama a pudno ti ebanghelio. Nabuniagan ni Sidney Rigdon.
Imbaga ni Sidney Rigdon kadagiti kameng ti simbaanna a dumngegda kadagiti misionario. Adu kadakuada ti nagpabuniag. Iti saan a mabayag, nabuniagan ti sangaribu a tao iti Kirtland.
Kayat ni Sidney Rigdon a maam-ammo ni Joseph Smith. Napan iti Nueva York tapno sarungkaranna ti propeta. Nangted ni Jesus iti paltiing ken ni Joseph Smith para ken ni Sidney Rigdon. Kinuna ni Jesus nga agaramidto ni Sidney Rigdon iti napapateg a banag. Isuronanto ti ebanghelio iti adu a tao. Buniagannanto ida ket itednanto kadakuada ti sagut ti Espiritu Santo.
Imbaga ni Jesus kada Joseph ken Sidney a nabalbaliwanen ti sumagmamano a paset ti Biblia adun a tawen ti napalabas. Awan iti Biblia dagiti sumagmamano a napapateg nga estoria. Ibaganto ni Jesus ken ni Joseph dagiti estoria nga awan iti Biblia. Nasken nga isurat ni Sidney Rigdon dagitoy.
Insalaysa ti maysa kadagiti estoria ti maipapan ken ni Enoc. Maysa a naindaklan a propeta ni Enoc. Insurona dagiti taona nga agbalin a nalinteg unay. Inawagan ti Apo dagiti nalinteg a tao ni Enoc iti Zion. Nangbangon dagiti tao ni Enoc iti maysa a siudad. Ninagananda daytoy a siudad iti Zion. Iti Zion, agpipinnateg dagiti tao. Agiinnaywanda iti tunggal maysa. Awan ti marigrigat wenno saan a naragsak.
Tinungpal ti tunggal maysa iti Zion dagiti bilin ti Nailangitan nga Ama. Nalinteg unay dagiti tao ta immay ni Jesus nakipagnaed kadakuada. Kalpasanna innala ti Dios dagiti tao iti Zion a makipagnaed kenkuana idiay langit.
Imbaga ni Jesus ken ni Joseph Smith a suruanna dagiti taona nga agbalin a nalinteg. Nasken nga ikarigatanda ti mangbangon iti sabali pay a siudad a maawagan iti Zion. Napintasto ti siudad. Ipategto ti tunggal maysa ti Nailangitan nga Ama idiay. Agpipinnategto ti tunggal maysa. Naragsakto ti tunggal maysa iti Zion. Umayto makipagnaed ni Jesus kadakuada.