Maika-58 a Paset

Pimmanaw Dagiti Immuna a Santo iti Nauvoo

(Septiembre 1845–Pebrero 1846)

Kalpasan ti ipapatay ni Joseph Smith, impagarup ti bunggoy dagiti mangriribuk nga aggibusen ti Simbaan. Dida ammo a mangpili manen ti Apo iti baro a dadaulo. Kayat ti bunggoy dagiti mangriribuk a dadaelen ti Simbaan. Pinadpadakes dagiti pagiwarnak dagiti Santo. Impadamagda nga agtatakaw ken mammapatay iti tao dagiti Santo.

Saan a tulongan ti Gobernador ti estado dagiti Santo. Kinunana a kagura dagiti bunggoy a mangriribuk ida. Imbagana nga umakar dagiti Santo iti Laud. Kinuna ni Brigham Young a mapan dagiti Santo iti Laud. Ngem kasapulanda ti panawen nga agsagana. Kasapulanda ti kuarta a panggatang iti kanen ken lupotda. Nasken nga agaramidda idi iti karison ken gumatangda iti baka. Nasken nga ilakoda dagiti balayda.

Saan a kayat ti bunggoy dagiti mangriribuk nga ikkan iti panawen dagiti Santo nga agsagana. Saan a kayat a gatangen dagiti tao ti pagtaengan dagiti Santo. Sumagmamano kadagiti Santo ti pinapanaw dagiti mangriribuk kadagiti pagtaenganda. Nagtakawda kadagiti banag nga adda iti uneg dagiti balayda. Kalpasanna pinuoranda dagiti balay.

Sipapasnek a nagtrabaho dagiti Santo tapno makapagsaganada a pumanaw iti Nauvoo. Nagpukanda kadagiti kayo ket inaramidda a karison. Nanggatangda kadagiti ayup. Nagurnongda iti taraon. Kayat dagiti Santo a maileppasda ti templo sakbay a pumanawda.

Nangted dagiti Santo iti kuarta a pangbangon iti templo. Nagtrabahoda iti templo. Nalpasda ti kaaduan kadagiti kuarto. Indatonda ti tunggal siled tunggal malpasda daytoy. Inaramatda ti maysa a kuarto a pagbuniagan iti tao para kadagiti natay. Adda komperensiada iti templo a para amin kadagiti kameng ti Simbaan.

Dimteng ti panawen ti lamiis. Kasta unay ti lamiisna. Adu a Santo ti pinapanaw ti bunggoy dagiti mangriribuk kadagiti pagtaenganda. Inkarga amin dagiti Santo dagiti gargaretda iti uneg dagiti karisonda. Induronda dagiti karison nga inlugan kadagiti balsa. Binallasiwda ti Karayan Mississippi.

Gapu iti napalalo a lamiis nagbalin a yelo ti karayan. Pinataray da Brigham Young ken sumagmamano kadagiti Santo dagiti karisonda iti rabaw dagiti yelo ket napanda iti ballasiw ti karayan.

Nagkampo dagiti Santo iti igid ti karayan. Sumagmamano kadagiti tao ti awan umdas a kawesda. Kasta unay ti lamminda. Sumagmamano pay kadakuada ti awan umanay a taraonda. Nangibinglay iti dadduma dagiti Santo nga aduan iti taraon ken kawes. Nagtalinaed dagiti Santo iti igid ti karayan iti uneg ti sumagmamano nga aldaw. Kalpasanna immakarda a nagkampo iti sabali a disso. Nangpili ni Brigham Young kadagiti dadaulo. Tinulongan dagiti dadaulo dagiti tao nga agsagana nga agdaliasat a mapan kadagiti bantay iti Laud.