“Maika-8 a Paset: Panagsagana para iti Simbaan ni Jesucristo: Marso–Abril 1830,” Dagiti Estoria iti Doktrina ken Katulagan (2002), 34–39
“Maika-8 a Paset,” Dagiti Estoria iti Doktrina ken Katulagan, 34–39
Maika-8 a Paset
Panagsagana para iti Simbaan ni Jesucristo
(Marso–Abril 1830)
Umadanin ti panawen a pannakabangon manen ti pudno a Simbaan ni Jesucristo ditoy daga. Nangted ni Jesus ken ni Joseph Smith iti paltiing para kadagiti tao. Kayat ni Jesus nga agsagana dagiti tao para iti Simbaanna. Imbagana kadakuada dagiti banag a nasken a maammuanda sakbay nga irugida ti Simbaanna. Imbagana kadakuada ti ad-adu pay maipapan iti ebangheliona.
Kinuna ni Jesus a ti Libro ni Mormon ti mangisuro iti ebangheliona. Kinunana a pudno ti Libro ni Mormon. Kayat ni Jesus a patien dagiti tao ti Libro ni Mormon. Makatulong daytoy kadakuada nga agtungpal iti Dios.
Insalaysay ni Jesus ti maipapan iti biagna. Imbaon ti Dios ni Jesus a tumulong kadagiti tao ditoy daga. Pinadas ni Satanas a pagaramiden isuna kadagiti dakes a banag. Ngem saan a dimngeg ni Jesus ken ni Satanas.
Nagladingit ni Jesus kadagiti dakes a banag nga inaramid dagiti tao. Nagpadara ken nagsagaba para iti amin a tao. Saanto nga agsagaba dagiti tao no agbabawida.
Inlansa iti krus dagiti dakes a tao ni Jesus ket pinatayda.
Dagiti gagayyem ni Jesus ti nangikali kenkuana iti tanem.
Nagungar ni Jesus kalpasan ti tallo nga aldaw. Nagbiag manen (kalpasan ti ipapatayna).
Inaramid ni Jesus dagitoy a banag tapno makatulong kadagiti tao nga agbabawi. Natay tapno makatulong kadagiti tao nga addaan iti pammati ken nabuniagan. Saandanto a madusa. Makapandanto iti langit. Madusanto dagiti tao a saan nga agbabawi.
Insalaysay ni Jesus ti maipapan iti panagbuniag. Nasken nga agbabawi dagiti tao nga agtarigagay a mabuniagan. Nasken nga ayaten ken tungpalenda ni Jesucristo. Nasken a walo ti tawenda wenno nasursurok pay. Iti kasta mabuniaganda ket agbalinda a kameng ti Simbaan.
Insuro ni Jesus ti umno a wagas ti panagbuniag. Imbagana a ti saserdote iti Kinasaserdote nga Aaron wenno ti tao nga addaan iti Kinasaserdote a Melchizedek ti mabalin a mangbuniag iti maysa a tao. Ipan ti lalaki nga addaan iti kinasaserdote ti tao (a buniaganna) iti danum. Sawenna ti naisangsangayan a kararag.
Irarem ti lalaki nga addaan iti kinasaserdote ti tao (a buniaganna) iti danum. Kalpasanna, ilung- awna ti tao iti danum.
Kinuna ni Jesus nga agkari dagiti tao nga agtungpal kenkuana no agbuniagda. Nasken nga agsarita ken agaramidda kadagiti nasayaat a banag.
Insalaysay ni Jesus ti maipapan iti panangbendision kadagiti maladaga. Mabalin dagiti lalaki nga addaan iti Kinasaserdote a Melchizedek ti mangbendision kadagiti maladaga. Sarapaen dagiti lallaki ti maladaga. Maysa a lalaki ti mangted iti nagan ken mangbendision iti maladaga.
Insalaysay ni Jesus ti maipapan iti sakramento. Kinunana a nasken a masansan nga umawat dagiti tao iti sakramento. No nakaaramidtayo iti maysa a banag a dakes, nasken a saantayo nga umawat iti sakramento. Nasken nga agbabawitayo. Kalpasanna mabalintayo ti umawat iti sakramento.
DkK 20:75; 46:4
Awatentayo ti sakramento tapno malagiptayo ni Jesus. Tulongannatayo ti tinapay a manglagip iti bagi ni Jesucristo. Malagiptayo a natay iti krus para kadatayo.
Tumulong ti danum a mangipalagip kadatayo iti dara ni Jesus. Malagiptayo a nagpadara ken nagsagaba para kadatayo iti Minuyongan ti Getsemani.
Agaramidtayo kadagiti katulagan no umawattayo iti sakramento. Maysa a kari ti katulagan. Agkaritayo nga ikarigatantayo ti agbalin a kas kenkuana. Agkaritayo a lagipentayo a kanayon isuna. Agkaritayo a tungpalentayo dagiti bilinna. Addanto kadatayo ti Espirituna no tungpalentayo dagiti katulagantayo.