Maika-12 a Paset

Ti Mision ni Samuel Smith

(Hunio 1830)

Ading ni Joseph Smith ni Samuel Smith. Kinuna ni Joseph a kayat ni Jesus a mapan ni Samuel iti mision. Ni Samuel Smith ti immuna a misionario ti Simbaan.

Napan ni Samuel tapno isurona kadagiti tao ti ebanghelio. Kayatna nga ibaga kadakuada ti maipapan iti Libro ni Mormon. Pinadasna nga ilako ti libro kadagiti tao. Ngem awan ti mayat a mangbasa iti daytoy. Nagladingit ni Samuel.

Narigat ti pinagmision ni Samuel. Adu a kanito a nabisinan. No dadduma awan lugar a pagturoganna. Natangsit ti sumagmamano a tao a kenkuana.

Nakalako ni Samuel iti Libro ni Mormon iti maysa a lalaki nga agnagan iti Phineas Young. Binasa ni Phineas ti libro. Intedna ti Libro ni Mormon iti kabsatna a lalaki. Brigham Young ti nagan ti kabsatna.

Binasa ni Brigham Young ti Libro ni Mormon. Namati a pudno daytoy. Nasursurona ti maipapan iti ebanghelio ni Jesucristo. Impadamag da Phineas ken Brigham Young iti sumagmamano a gagayyem ti maipapan iti Libro ni Mormon. Binasa dagiti gagayyemda daytoy. Nagkameng iti Simbaan da Phineas ken Brigham Young ken dagiti gagayyemda.

Iti di mabayag, nagbalin a propeta ti Simbaan ni Brigham Young. Tinulonganna dagiti Santo. Maysa isuna a naindaklan a dadaulo.

Nagawid ni Samuel Smith. Saanna a pinanunot a nakatulong ti misionna iti Simbaan. Dina ammo nga agbalinto ni Brigham Young a propeta iti maysa nga aldaw.

Maysa a rabii dimmagas ni Samuel iti maysa a pagdagusan. Kiniddawna iti akinkukua iti pagdagusan a gumatang iti Libro ni Mormon. Dinamag ti akinkukua no sadino ti nangalaan ni Samuel iti libro. Kinuna ni Samuel nga impatarus ti kabsatna daytoy manipud kadagiti sumagmamano a balitok a pinanid.

Nakapungtot ti akinkukua. Kinunana nga agul-ulbod ni Samuel. Imbagana a rummuar ni Samuel iti pagdagusan.

Iti dayta a rabii naturog ni Samuel iti sirok ti kayo ti mansanas.

Iti kamaudiananna nangted ni Samuel iti Libro ni Mormon iti maysa a dadaulo ti sabali a simbaan. Binasa ti dadaulo ken ti asawana ti libro. Ammoda a napateg daytoy.