Dagiti Estoria iti Nasantuan a Kasuratan

Maika-40 a Paset: Dagiti Parmata iti Templo ti Kirtland: Abril 1836

“Maika-40 a Paset: Dagiti Parmata iti Templo ti Kirtland: Abril 1836,” Dagiti Estoria iti Doktrina ken Katulagan (2002), 155–57

“Maika-40 a Paset,” Dagiti Estoria iti Doktrina ken Katulagan, 155–57

Maika-40 a Paset

Dagiti Parmata iti Templo ti Kirtland

(Abril 1836)

Maysa a malen ti Domingo, adda taripnong dagiti Santo iti Templo ti Kirtland. Binendisionan dagiti Apostol ti sakramento. Imbunong ni Joseph Smith ken dagiti dua a mamagbagana ti sakramento kadagiti Santo.

Kalpasanna napan da Joseph Smith ken Oliver Cowdery iti maysa a lugar iti templo nga is-isuda laeng. Nagparintumeng ken nagkararagda. Kalpasan ti panagkararagda, maysa a nakaskasdaaw a banag ti napasamak. Nakitada ti Apo a Jesucristo. Kasla dumardarang nga apuy dagiti matana. Kasla niebe ti kinapuraw ti buokna. Naranraniag ngem iti init ti rupana.

Adu ti nakaskasdaaw a banag nga imbaga ni Jesus kada Joseph ken Oliver. Kinunana nga isu ti Mangisalakanda. Natay gapu kadakuada. Nagungar isuna. Kinuna ni Jesus a nasken a maragsakan unay dagiti tao a nangipatakder iti templo. Kinuna ni Jesus a naragsakan iti templo. Daytoy ti nasantuan a balayna. Kinuna ni Jesus nga umayto iti templo iti mamin-adu a gundaway. Makisaonto kadagiti Santo. Ngem no saan nga aramiden dagiti Santo a nasantuan ti templo, saanto nga umay.

Kalpasanna nakita da Joseph ken Oliver dagiti anghel iti Templo ti Kirtland. Immuna a nakitada ni Moises. Maysa a propeta ni Moises a nagbiag iti nabayagen a panawen. Indauluanna dagiti Israelita a pimmanaw iti Egipto. Adda iti Daan a Tulag ken iti Perlas a Kapatgan ti pakasaritaan ni Moises. Nangted ni Moises iti naisangsangayan a bileg ti kinasaserdote kada Joseph ken Oliver. Iti kasta matulonganda a maummong a sangkamaysa dagiti Israelita manipud kadagiti amin a paset ti lubong.

Kalpasanna nakita da Joseph ken Oliver ni Elias. Inyeg ni Elias ti bileg ti kinasaserdote ni Abraham iti Simbaan ni Jesucristo. Nagbiag ni Abraham iti nabayagen a panawen. Binendisionan ti Dios ni Abraham. Intedna ken ni Abraham ti naisangsangayan a bileg ti kinaserdote. Addanto a kanayon ti kinasaserdote iti kaamaan ni Abraham. Maibilang a kaamaan ni Abraham dagiti nalinteg a kameng ti Simbaan.

Kalpasanna nakita da Joseph ken Oliver ni Elias. Maysa a propeta ni Elias a nagbiag iti nabayagen a panawen. Imbaga ni Elias a maammuanto dagiti tao maipapan kadagiti kapuonanda. Nasken nga agtrabaho dagiti tao iti templo nga agpaay kadagiti kapuonanda. Nangted ni Elias iti naisangsangayan a bileg ti kinasaserdote kada Joseph ken Oliver. Matulongan ti bileg ti kinasaserdote dagiti nalinteg a kaamaan. Mabalin a mapaglantipda iti tunggal maysa. Kalpasanna makapagbiagdanto nga agdedenna iti agnanayon.