“Maika-56 a Paset: Napapatay ti Propeta: Hunio 1844,” Dagiti Estoria iti Doktrina ken Katulagan (2002), 201–5
“Maika-56 a Paset,” Dagiti Estoria iti Doktrina ken Katulagan, 201–5
Maika-56 a Paset
Napapatay ti Propeta
(Hunio 1844)
Sumagmamano kadagiti tao ti nangpabasol ken ni Joseph Smith gapu ti riribuk iti Nauvoo. Naibalud ni Joseph. Kinuna ti ukom nga awan ti dakes nga inaramid ni Joseph Smith. Pinaruarna ni Joseph.
Kasta unay ti pungtot dagiti mangriribuk iti ukom. Kinunada a patayenda ti ukom. Nagbuteng dagiti Santo iti Nauvoo. Kiniddawda iti gobernador ti estado a tulonganna ida. Ngem dina kayat. Nangibaon kadagiti soldado a mangsapul ken ni Joseph Smith.
Ammo ni Joseph Smith nga amangan no maibalud manen. Nagbuteng ni Joseph amangan no maibalud met ni Hyrum a kabsatna. Imbaga ni Joseph ken ni Hyrum nga ipanawna ti kaamaanna ket mapanda iti sabali a siudad. Ngem saan a kayat a panawan ni Hyrum ni Joseph.
Kinuna ni Joseph Smith a nasken a pumanawda ken ni Hyrum iti Nauvoo. No aramidenda saan a dangran dagiti mangriribuk dagiti Santo. Isu a bimmallasiw da Joseph ken Hyrum iti karayan.
Sumagmamano kadagiti tao ti nagkuna a pumanaw ni Joseph Smith agsipud ta mabuteng. Nangibaon ni Emma nga asawa ni Joseph iti sumagmamano a gagayyem tapno dawatenda ti panagsublina. Impagarup ni Joseph Smith a mapatay no agsubli iti Nauvoo. Ngem inaramidna ti kayat dagiti gagayyemna nga aramidenna.
Nagsubli da Joseph ken Hyrum iti Nauvoo. Natiliwda. Impan dagiti soldado ida a kaduada da Willard Richards ken John Taylor iti maysa nga ili a maawagan iti Carthage. Impupokda ida iti Pagbaludan ti Carthage.
27 ti Hunio, 1844 ti sumaruno nga aldaw. Sumagmamano kadagiti gagayyem ni Joseph Smith ti simmarungkar kenkuana iti pagbaludan. Binasada dagiti nasantuan a kasuratan. Kinanta ni John Taylor ti maysa kadagiti paggugusto ni Joseph a kanta a maipapan ken ni Jesus.
Kellaat a nakangngegda iti ringgor iti ruar. Palpaltogan idi ti bunggoy dagiti mangriribuk ti pagbaludan. Nasurok a sangagasut a lallaki ti dagup ti bunggoy dagiti mangriribuk. Pinintaanda dagiti rupada tapno awan ti makailasin kadakuada.
Sumagmamano kadagiti bunggoy dagiti mangriribuk ti nagtaray a nanglabas iti agbambantay ket induronda a linukatan ti ridaw ti pagbaludan. Nagtarayda nga immuli. Pinaltoganda ti uneg ti siled. Pinaltoganda ni John Taylor, ngem saanda a napatay. Pinatayda ni Hyrum. Nakita ni Joseph a natayen ni Hyrum. Kinunana, “O, patpatgek a kabsatko a Hyrum!”
Nagtaray ni Joseph Smith a nagturong iti tawa. Pinaltogan ti bunggoy dagiti mangriribuk isuna. Nayebkasna, “ O Apo, Diosko.” Natnag iti ruar ti tawa. Natayen ti propeta ti Dios.
Naipan ti bangkay da Joseph Smith ken ti kabsatna a ni Hyrum iti Nauvoo. Kasta unay ti panagladingit dagiti Santo. Natayen ti dadaulo ken propetada. Intedna ti biagna gapu iti ebanghelio ni Jesucristo.
DkK 135
Adu ti napateg nga inaramid ni Propeta Joseph Smith. Impatarusna ti Libro ni Mormon. Inrugina ti pudno a Simbaan ni Jesucristo. Nangibaon kadagiti misionario a mangisuro iti ebanghelio kadagiti sabali a pagilian. Pinatakderna ti maysa a siudad a mabalin a pagnaedan dagiti Santo. Inayat ti Dios ni Joseph Smith. Inayat isuna dagiti Santo. Ad-adu dagiti naaramid ni Joseph Smith a makatulong kadatayo ngem ti naaramidan ti asino man a tao malaksid ken ni Joseph Smith a panangtulong kadatayo ngem iti asino man a tao, malaksid ken ni Jesucristo.