“Maika-46 a Paset: Ni Joseph iti Pagbaludan ti Liberty: Marso 1839,” Dagiti Estoria iti Doktrina ken Katulagan (2002), 173–75
“Maika-46 a Paset,” Dagiti Estoria iti Doktrina ken Katulagan, 172–75
Maika-46 a Paset
Ni Joseph iti Pagbaludan ti Liberty
(Marso 1839)
Adu nga aldaw a naibalud da Joseph Smith ken dagiti gagayyemna. Sada nayakar iti sabali a pagbaludan. Masarakan daytoy iti Liberty, Missouri.
Nalamiis ken narugit ti Pagbaludan ti Liberty. Nagsagaba ti kasta unay ni Joseph ken dagiti gagayyemna. No dadduma mapungoda iti kadena. Nasken a maturogda iti datar.
Saan a naimas ti kanenda. No dadduma adda sabidong daytoy a gapu ti pagsakitanda.
Nagladingit ni Joseph. Nabayagdan kadagiti gayyemna a nakapupok iti pagbaludan. Saan nga ammo ni Joseph no makaruarda pay. Madanagan isuna maipapan iti Simbaan.
Nagkararag ni Joseph iti Nailangitan nga Ama. Dinamagna no kasano ti kapaut ti panagsagabana ken dagiti Santo. Kiniddawna iti Nailangitan nga Ama a tulonganna koma ida. Kiniddaw ni Joseph iti Nailangitan nga Ama a dusaenna koma dagiti kabusorda.
Imbaga ni Jesus ken ni Joseph a mabiit laengen a kanito ti panagsagabana. Imbagana ken ni Joseph nga agbalin a natured. Iti kasta bendisionanto ti Dios isuna. Kinuna ni Jesus a mabiit laengen a panawen a makadennanton ni Joseph dagiti gagayyemna. Inay-ayat dagiti gagayyemna ni Joseph ket maragsakandanto a makakita kenkuana.
Ammo ni Jesus no ania ti inaramid dagiti dakes a tao. Imbagana ken ni Joseph no kasano a dusaennanto ida. Saanto a kaano man maaddaan iti kinasaserdote dagiti a dakes a tao. Saanto a kaano man maaddaan dagiti annakda iti kinasaserdote. Agsagaba ken matayto dagiti dakes a tao.
Imbaga ni Jesus ken ni Joseph nga adunto ti nasayaat a banag a mapasamak kadagiti Santo. Awan makalapped iti Dios iti panagparaburna kadakuada. Ibaganto ti Espiritu Santo dagiti nakaskasdaaw a banag maipapan iti bileg ti Dios. Masursurodanto ti maipapan iti langit ken daga.
Kinuna ni Jesus a nasken a saan nga agbuteng ni Joseph no kasapulanna ti agsagaba. Nasken a di mariribukan ni Joseph no adda dagiti pannubokna. Kinuna ni Jesus a para iti bukodtayo a pagsayaatan dagiti pannubok. Tulongannatayo a makasursuro dagiti pannubok. Ad-adu pay ti sinagaba ni Jesus ngem iti asino man.