“Maika-2 a Paset: Ti Umuna a Parmata ni Joseph Smith: 1820,” Dagiti Estoria iti Doktrina ken Katulagan (2002), 9–12
“Maika-2 a Paset,” Dagiti Estoria iti Doktrina ken Katulagan, 9–12
Maika-2 a Paset
Ti Umuna a Parmata ni Joseph Smith
(1820)
Namati ni Joseph Smith ken ti kaamaanna iti Dios. Sangkamaysada nga agbasa idi iti Biblia. Insuro ti ama ken ti ina ni Joseph dagiti annakda nga agbalin a nasayaat.
Adu dagiti simbaan iti Palmyra. Kinuna ti amin a tattao a ti simbaanda ti umno a simbaan. Kinunada a palso ti dadduma a simbaan. Di ammo ni Joseph no ania a simbaan ti pagkamenganna. Kayatna a maammuan no ania ti pudno a Simbaan ni Jesucristo.
Maysa nga aldaw, basbasaen idi ni Joseph ti Biblia. Sangapulo-ket-uppat ti tawenna idi. Nabasana a nasken nga agsaludsodtayo iti Dios no kayattayo a maammuan ti maysa a banag. Inkeddeng ni Joseph ti nagkararag. Sinaludsodna iti Dios no ania a simbaan ti pagkamenganna.
Napintas nga aldaw ti panagsusulbod idi. Napan ni Joseph iti kakaykaywan iti asideg ti pagtaenganna. Nagparintumeng. Nagkararag iti napigsa. Adda pammatina a sungbatan ti Nailangitan nga Ama ti kararagna.
Saan a kayat ni Satanas nga agkararag ni Joseph. Pinadas ni Satanas a lapdan isuna. Pinasipnget ni Satanas ti aglawlaw ni Joseph. Saanen a makasao. Nagbuteng isuna.
Saan a nagsardeng ni Joseph a nagkararag. Saan a kabaelan ni Satanas a pinagsardeng isuna.
Kalpasanna naaddaan iti parmata ni Joseph. Nakitana ti napintas, naraniag a lawag. Nalikmutan isuna iti lawag. Nakitana ti Nailangitan nga Ama ken ni Jesucristo. Agtaktakderda iti ngatuenna a yan ti lawag. Intudo ti Nailangitan nga Ama ni Jesucristo ket kinunana, “Daytoy ti Ay-ayatek nga Anakko. Dumngegka Kenkuana!”
Dinamag ni Joseph ken ni Jesus no ania a simbaan ti pudno. Dinamagna no ania a simbaan ti nasken a pagkamenganna. Imbaga ni Jesus ken ni Joseph a saan nga agkameng iti ania man kadagiti simbaan. Kinuna ni Jesus a palso amin dagiti simbaan. Awan kadagitoy ti Simbaanna. Adu pay dagiti dadduma nga imbagana ken ni Joseph. Kalpasanna naggibus ti parmata. Nagmaymaysa ni Joseph.
Nagawid ni Joseph. Dinamag ti inana no nasayaat met la ti riknana. Kinuna ni Joseph a wen. Imbagana iti inana a nakakita isuna iti parmata. Imbagana no ania ti naammuanna iti parmatana.
Imbaga ni Joseph ti maipapan iti parmatana kadagiti sumagmamano a tao iti ili. Saan a namati dagiti tao kenkuana. Impagarupda nga agibagbaga iti inuulbod daytoy. Nakapungtotda kenkuana. Natangsitda kenkuana.
Kanayon a kinapudno ti ibagbaga ni Joseph maipapan iti parmatana. Ammona a nakitana ti Nailangitan nga Ama ken ni Jesucristo. Ammona nga awan ti pudno kadagiti simbaan iti daga.