“Maika-37 a Paset: Dagiti Dadaulo ti Kinasaserdote: Pebrero 1835,” Dagiti Estoria iti Doktrina ken Katulagan (2002), 140–44
“Maika-37 a Paset,” Dagiti Estoria iti Doktrina ken Katulagan, 140–44
Maika-37 a Paset
Dagiti Dadaulo ti Kinasaserdote
(Pebrero 1835)
Adda napateg a taripnong ni Joseph Smith iti Kirtland, Ohio. Indawatna kadagiti lallaki a kameng ti Kampo ti Zion a mapanda. Imbaga ni Joseph kadagiti lallaki a kayat ni Jesus a tumulong dagiti sangapulo-ket-dua nga Apostol a mangidaulo iti Simbaaanna.
Imbaga ti Apo a mangpili da Oliver Cowdery, David Whitmer, ken Martin Harris kadagiti Apostol. Iti dayta a taripnong binendisionan ti Umuna a Panguluen ti Simbaan da Oliver, David, ken Martin. Kalpasanna nagkararagda a sangkamaysa. Nangpilida iti sangapulo-ket-dua a nasayaat a lallaki.
Naordenan dagiti lallaki. Isuda dagiti Sangapulo-ket-dua nga Apostol.
Napateg unay a tao dagiti Apostol iti Simbaan. Ammoda a ni Jesus ti Mangisalakantayo. Isuroda ti ebanghelio iti amin a paset ti lubong.
Kalpasan ti sumagmamano nga aldaw, napili pay dagiti dadduma a lallaki nga agbalin a dadaulo ti Simbaan. Maawaganda iti Umuna a Korum ti Pitupulo. Tumulong ti Umuna a Korum ti Pitupulo kadagiti Apostol. Isuda dagiti dadaulo ti aramid a panagmisionario iti Simbaan.
Maysa nga aldaw, adda iti maysa a taripnong dagiti Sangapulo-ket-dua nga Apostol. Agsagsaganada a mapan kadagiti mision. Ikarkarigatanda ti agbalin a nalinteg. Kayatda ti agpatulong iti Nailangitan nga Ama.
Kiniddaw dagiti Apostol ken ni Joseph Smith a mangikararag iti paltiing a tumulong kadakuada kadagiti misionda. Nangted ni Jesus ken ni Joseph ken kadagiti Apostol iti naindaklan a paltiing. Imbagana kadakuada ti maipapan iti kinasaserdote.
Ti kinasaserdote isu ti bileg ti Dios. Daytoy ti kaindaklanan a bileg iti daga. Ited ti Dios ti kinasaserdote kadagiti nalinteg a lallaki. Aramaten dagiti lallaki ti kinasaserdote iti panangaramidda iti trabaho ti Dios.
Adda dua a kinasaserdote iti Simbaan. Maysa ti Kinasaserdote a Melchizedek. Adda Kinasaserdote a Melchizedek dagiti dadaulo ti Simbaan. Dadaulo ti Presidente ti Simbaan ken dagiti dua a mamagbagana, dagiti Sangapulo-ket-dua nga Apostol, ken ti Umuna a Korum ti Pitupulo.
Ti Presidente ti Simbaan isu ti propeta ti Dios, Ibagana kadagiti tao ti kayat ni Jesus nga aramidenda. Adda lallaki a katulongan ti propeta. Isuda dagiti mamagbagana. Ti propeta ken dagiti mamagbagana ti Umuna a Panguluen ti Simbaan.
Addaan iti Kinasaserdote a Melchizedek dagiti dadduma pay a lallaki iti Simbaan. Maawaganda iti nangato a saserdote, pitupulo, ken elder. Mabalin dagiti nangato a saserdote ti agbalin a patriarka, presidente ti istaka, kameng ti nangato a konseho, ken obispo.
Sumagmamano kadagiti lallaki ti napili nga agbalin a pitupulo.
Mapili met nga elder dagiti dadduma a lallaki. Mapan dagiti elder iti mision.
DkK 107:7; 133:8
Makabendision amin a lallaki nga addaan iti Kinasaserdote a Melchizedek kadagiti tao. Maitedda kadagiti tao ti Espiritu Santo.
Ti Kinasaserdote nga Aaron ti sabali pay a kinasaserdote. Addaan iti Kinasaserdote nga Aaron dagiti saserdote, maestro, ken diakono. Makabuniag dagiti saserdote iti tao. Bendisionanda ti sakramento. Tulonganda dagiti elder.
Tumulong dagiti maestro a mangisagana iti sakramento. Mapanda mangisuro iti pagtaengan. Tulonganda dagiti kameng ti Simbaan nga agbiag a nasayaat.
Dagiti diakono ti agibunong iti sakramento. Tulonganda ti obispo. Agkolektada kadagiti daton iti panagayuno.
Kinuna ni Jesus a nasken a masursuro amin dagiti lallaki nga addaan iti kinasaserdote no ania ti kayat ti Dios nga aramidenda. Masapul nga agtrabahoda a nasayaat. Iti kasta bendisionan ida ti Nailangitan nga Ama.