“Maika-48 a Paset: Dagiti Misionario Kadagiti Sabali a Lugar: Hunio 1837–Oktubre 1841,” Dagiti Estoria iti Doktrina ken Katulagan (2002), 180–82
“Maika-48 a Paset,” Dagiti Estoria iti Doktrina ken Katulagan, 180–82
Maika-48 a Paset
Dagiti Misionario Kadagiti Sabali a Lugar
(Hunio 1837–Oktubre 1841)
Kayat ti Apo a makasursuro iti ebanghelio dagiti tao kadagiti sabali a pagilian. Imbagana ken ni Joseph Smith a nasken nga agmision ti sumagmamano kadagiti Santo iti Inglatera. Napili ni Elder Heber C. Kimball ken tallo a sabali pay a lallaki a mapan. Nagluganda iti bapor a napan iti Inglatera.
Naam-ammoda ti maysa a lalaki a dadaulo ti sabali a simbaan. Pinalubosan ti lalaki dagiti misisonario a mangasaba iti simbaanna. Adu kadagiti tao iti namati kadagiti misionario. Tinarigagayanda ti mabuniagan. Daytoy ti nagpungtotan ti dadaulo. Kinunana a saanen a makaikasaba pay dagiti misionario iti simbaanna.
Nangasaba dagiti misionario iti pagtaengan dagiti tao. Adu kadagiti tattao ti nagkameng iti Ti Simbaan ni Jesucristo dagiti Santo iti Ud-udina nga Aldaw.
Iti saan a nabayag nagmision dagiti sabali a lallaki iti Inglatera. Sumagmamano kadakuada ti Apostol. Kinasarita ni Joseph ida sakbay a napanda. Imbagana kadakuada no ania ti nasken nga isuroda kadagiti tao.
Imbaga ni Joseph kadagiti Apostol a tungpalenda ti amin a bilin ti Dios. Imbagana kadakuada ti maipapan iti kinasaserdote. Kinunana a ti laeng pudno a Simbaan ni Jesucristo ti addaan iti kinasaserdote.
Sisasagana dagiti lallaki a mapan iti misionda. Awan a pulos ti kuartada. Adu kadakuada ti masakit. Sumagmamano kadagiti assawa ken annakda ti masakit. Ngem ammo dagitoy a lallaki a tulongan ida ti Nailangitan nga Ama ket paraburanna dagiti kaamaanda.
Napan dagiti misionario iti Inglatera. Nangasabada iti adu nga ili. Rinibu kadagiti nasayaat a tattao ti namati iti ebanghelio. Nagkamengda iti Simbaan ni Jesucristo. Binendisionan ti Nailangitan nga Ama dagiti misionario. Nakasublida a sitatalged kadagiti pagtaenganda kalpasan ti misionda.
Maysa ni Orson Hyde kadagiti Sangapulo-ket-dua nga Apostol. Kinuna ni Joseph Smith nga adda naisangsangayan a trabaho ni Orson para kadagiti Judio. Napan ni Orson iti daga a Palestina. Idi Oktubre 24, 1841, nangisao iti kararag a pangidatonna iti daga ti Palestina.
Dinawatna iti Nailangitan nga Ama a bendisionanna ti daga. Inkararagna nga adda koma danum tapno dumakkel dagiti mula. Inkararagna a makapan koma amin dagiti annak ni Abraham tapno agnaed iti Palestina. Makaipatakderda koma kadagiti balay ken makapagmulada sadiay.
Binendisionan ti Dios ti daga a Palestina. Ita, maawagan daytoy iti Israel. Idi 1979, nagkararag ni Presidente Spencer W. Kimball a pangidaton iti minuyongan iti Israel. Maawagan daytoy iti The Orson Hyde Memorial Garden.