“Maika-4 a Paset: Ni Martin Harris ken Dagiti Napukaw a Panid: 1824–1828,” Dagiti Estoria iti Doktrina ken Katulagan (2002), 17–21
“Maika-4 a Paset,” Dagiti Estoria iti Doktrina ken Katulagan, 17–21
Maika-4 a Paset
Ni Martin Harris ken Dagiti Napukaw a Panid
(1824–1828)
Marigrigat ti kaamaan ni Joseph Smith. Kasapulanda ti kuarta. Kayat ni Joseph a tulongan ti kaamaanna. Napan nagtrabaho iti estado ti Pennsylvania. Nakipagnaed iti lalaki nga agnagan iti Mr. Hale.
Adda balasang nga anak ni Mr. Hale nga agnagan iti Emma. Naam-ammo ni Joseph ni Emma. Naginnayatda ket nagkallaysada. Napanda nakipagnaed iti denna ti kaamaan ni Joseph. Tinulongan ni Joseph ti amana a nagtrabaho iti talon.
Adu dagiti tao a makaammo nga adda ken ni Joseph dagiti balitok a pinanid. Pinadasda a takawen dagitoy. Riniribuk dagiti tao ni Joseph. Inuulbod ti imbagada maipapan ken ni Joseph ken ti kaamaanna.
Nakaro unay dagiti riribuk isu nga inkeddeng da Joseph ken Emma ti umakar. Kayatda ti mapan iti Pennsylvania. Agnaedda iti asideg ti kaamaan ni Emma. Ngem awan ti umdas a kuarta da Joseph ken Emma tapno umakar.
Joseph Smith—Pakasaritaan 1:61
Maysa a lalaki a managan iti Martin Harris ti nagnaed iti asideg da Joseph Smith. Addaan ni Martin Harris iti nalawa a talon. Adu ti kuartana. Naasian ni Martin Harris kada Joseph ken Emma. Inikkanna ida iti kuarta tapno makatulong kadakuada iti yaakarda. Napan da Joseph ken Emma iti Pennsylvania.
Rinugian ni Joseph nga impatarus ti sinurat kadagiti balitok a pinanid. Saan nga ammo ni Joseph ti kaipapanan dagiti nakasurat. Tinulongan ti Dios isuna. Inaramat ni Joseph ti Urim ken Tumim tapno maawatanna dagiti balikas. Mabasatayo no ania dagiti impatarusna. Maawagan daytoy iti Libro ni Mormon.
Napan ni Martin Harris iti Pennsylvania. Tinulonganna ni Joseph nga agipatarus. Binasa ni Joseph dagiti balikas manipud kadagiti balitok a pinanid. Insurat ni Martin dagitoy iti papel. Nakaipatarus da Joseph ken Martin iti 116 a panid ti Libro ni Mormon.
Kayat a yawid ni Martin dagiti 116 a panid iti pagtaenganna. Kayatna a makita daytoy ti kaamaanna. Dinamag ni Joseph iti Apo no mabalin a yawid ni Martin dagiti panid. Kinuna ti Apo a saan a mabalin. Nagdamag manen ni Joseph. Kinuna ti Apo a saan latta a mabalin.
Kayat latta a yawid ni Martin dagiti panid iti pagtaenganna. Nagdamag manen ni Joseph. Iti daytoy a gundaway kinuna ti Apo a mabalinen a yawid ni Martin dagiti panid. Kinuna ti Apo ken ni Martin a mabalinna nga ipakita dagiti panid iti kaamaanna. Ngem nasken a dina ipakpakita dagitoy kadagiti sabali a tao.
Nagkari ni Martin a tungpalenna ti Apo. Inyawidna dagiti panid iti pagtaenganna. Impakitana dagitoy iti kaamaanna. Ngem dina tinungpal ti karina. Impakitana dagiti panid kadagiti sabali a tao. Kalpasanna inwarangna lattan dagiti panid.
Idi agangay sinapul ni Martin dagiti panid. Sinapulna iti amin a lugar. Ngem dina masarakan dagitoy. Napukaw dagiti panid.
Nadanagan unay ni Joseph maipapan kadagiti napukaw a panid. Saan a nakaturog.
Kinasao ni Jesus ni Joseph. Kinunana a nakaaramid ni Martin Harris iti dakes a banag. Inkari ni Martin a tungpalenna ti Apo. Ngem dina tinungpal ti karina. Ita napukawen dagiti panid ti Libro ni Mormon. Saanen a makatulong pay ni Martin Harris a mangipatarus iti libro.
DkK 3:12–14
Kinuna ni Jesus a kayat ni Satanas a mapukaw dagiti 116 a panid. Adda kadagiti dakes a lallaki dagiti panid. Kayat ni Satanas ken dagiti dakes a lallaki a pagsardengen ti aramid ti Dios. Saanda a kayat a patien dagiti tao ti Libro ni Mormon. Kinuna ni Jesus a saan a mapagsardeng ni Satanas ti aramid ti Dios. Saan a mapagsardeng dagiti dakes a lallaki ti aramid ti Dios.
DkK 10: Pakauna, 8, 12, 22–29, 33, 43
Imbaga ni Jesus ken ni Joseph a saan nga agdanag maipapan kadagiti estoria nga adda kadagiti napukaw a panid. Nakasurat dagiti isu met laeng nga estoria iti sabali pay a paset dagiti balitok a pinanid. Kinuna ni Jesus a nasken nga ipatarus ni Joseph ti sabali pay a paset dagiti pinanid. Iti kasta kabaelan a basaen dagiti nasayaat a tao ti Libro ni Mormon. Patienda a pudno ti libro. Masursuroda ti ebanghelio.