Disyembre 5–11

Hageo; Zacarias 1–3; 7–14

“Balaan alang sa Ginoo”

Basaha sa mainampoong paagi ang Hageo ug Zacarias, nga mamalandong sa mga impresyon nga imong madawat. Sa unsang paagi ang mga kamatuoran niini nga mga basahon makatabang sa pagtubag sa mga panginahanglan sa mga bata nga imong gitudloan?

Irekord ang Imong mga Impresyon

Dapita ang Pagpaambit

Pagdrowing og malipayon nga nawong diha sa usa ka piraso nga papel, ug papuli-puliha ang mga bata sa paggunit niini. Atol sa ilang turno, dapita sila sa pagpaambit og usa ka butang nga ilang nakat-onan mahitungod sa Langitnong Amahan ug ni Jesukristo nga makapalipay kanila.

Itudlo ang Doktrina: Mas Gagmay nga mga Bata

Hageo 1:6–8

Mahimo nakong unahon ang Dios sa akong kinabuhi.

Ang pagkat-on mahitungod sa tambag sa Ginoo nga “hunahuna[on] ang inyong kahimtang” usa ka oportunidad alang sa mga bata sa pagseguro nga gibuhat nila ang importante nga mga butang nga gipabuhat sa Dios sa ilaha.

Posible nga mga Kalihokan

• Ipasabot ngadto sa mga bata nga gusto sa Ginoo nga tukoron sa mga Israelihanon ang templo, apan hinoon lahi nga mga butang ang ilang gibuhat. Basaha og kusog ang Hageo 1:7, ug ipasabot nga ang “hunahunaa ang inyong kahimtang” nagpasabot nga gusto sa Ginoo nga hunahunaon sa mga Israelihanon kon gibuhat ba nila ang labing importante nga mga butang. Basaha ang bersikulo 8 ngadto sa mga bata, ug dapita sila nga magpakaaron-ingnon nga “[mo]tungas … sa kabungtoran,” “[mo]kuha [og] kahoy,” ug “[mo]tukod pag-usab sa … Templo [sa Ginoo].” Unsa ang importanteng mga butang nga gustong ipabuhat sa Dios kanato?

• Ibutang sa lamesa nga magkulob ang mga litrato nga nagrepresentar sa pipila ka butang nga importante ngadto sa Dios, sama sa mga kasulatan, pag-ampo, ug ang templo. Papuli-puliha ang mga bata sa pagpili og litrato ug sa pagpakita niini ngadto sa klase. Tabangi sila nga makasabot kon nganong importante ang pagseguro nga kita mogahin og panahon sa matag usa sa mga butang diha sa mga litrato.

Zacarias 3:1–7

Makahimo si Jesukristo sa paglimpyo sa akong espiritu.

Ang hugaw nga mga sinina sa pangulong pari nga si Josue, nga gihulagway sa Zacarias 3:1–7, nagsimbolo unsay mahitabo kon kita makasala. Pinaagi sa Pag-ula ni Jesukristo, mahimo kitang malimpyo, sama nga gihimong limpyo si Josue sa dihang nakadawat siya og bag-o nga mga sinina.

Posible nga mga Kalihokan

• Ipapasa-pasa sa mga bata ang usa ka hugaw nga sinina, ug basaha ang Zacarias 3:3. Dayon ipapasa-pasa ang usa limpyo nga sinina, ug basaha ang bersikulo 4. Hisgoti sa mga bata mahitungod kon sa unsang paagi ang paghimo og sayop nga mga pagpili sama ra sa pagkahimong hugaw sa espirituhanon nga paagi, apan ang Manluluwas makahimong limpyo kanato pag-usab. Unsay atong bation kon kita limpyo? Ipaambit ang imong pagpamatuod nga tungod si Jesukristo nag-antos ug namatay alang kanato, kita mahimong limpyo gikan sa atong mga sala kon kita maghinulsol.

• Kon posible, ipakita sa mga bata ang usa ka litrato sa usa ka tawo nga nailhan nila nga nagsul-ob og puti sa iyang bunyag (o tan-awa sa Libro sa mga Hulagway sa Ebanghelyo, mga nu. 103, 104). Nganong magsul-ob kita og puti sa atong mga bunyag? Kantaha ang awit mahitungod sa bunyag, sama sa “Kon Ako Bunyagan” (Songbook sa mga Bata, 53). Dapita ang mga bata sa pagdrowing sa ilang kaugalingon nga gibunyagan ug sa pagpaambit kon unsay ilang gibati nga sila mabunyagan unya sa umaabot.

Zacarias 2:10; 9:9; 14:3–9

Ang mga propeta nagtudlo kanato mahitungod ni Jesukristo.

Sama sa ubang mga propeta sa Daang Tugon, si Zacarias nanagna kang Jesukristo. Unsay matudlo sa mga panagna sa Zacarias 2:10; 9:9; 14:3–9 sa mga bata mahitungod Kaniya?

Posible nga mga Kalihokan

• Ipakita ang usa ka hulagway ni Jesukristo nga misulod sa Jerusalem nga nagsakay og asno (tan-awa sa Libro sa mga Hulagway sa Ebanghelyo, nu. 50). Sultihi ang mga bata nga daghang tuig sa wala pa si Jesus mianhi sa yuta, si Zacarias nanagna nga si Jesukristo mosakay og usa ka asno pasulod sa Jerusalem sa dili pa Siya mamatay alang kanato. Samtang imong basahon ang Zacarias 9:9, hangyoa ang mga bata nga itudlo ang mga tawo diha sa litrato kinsa “[n]agmaya pag-ayo” ug itudlo usab ang “Hari.” Kinsa man ang Hari? Hangyoa ang mga bata sa pagpaambit kon nganong mapasalamaton sila alang kang Jesus.

• Basaha ngadto sa mga bata ang pipila ka panagna nga gihimo ni Zacarias mahitungod sa Ikaduhang Pag-anhi sa Manluluwas, sama niadtong anaa sa Zacarias 2:10; 14:9. Hangyoa ang mga bata sa pagdrowing og mga hulagway sa unsay ilang hunahuna kon unsa ka sama ang pag-anhi og usab ni Jesus, o kantaha og dungan ang usa ka awit mahitungod sa Ikaduhang Pag-anhi, sama sa “Kon Siya Moanhi Pag-usab” (Songbook sa mga Bata, 46–47).

Itudlo ang Doktrina: Mas Dagko nga mga Bata

Hageo 1:2–8

“Hunahunaa ang inyong kahimtang.”

Importante alang kanatong tanan nga mahibalo sa atong mga prayoridad ug mogahin og panahon nga “hunahuna[on] [ang atong] kahimtang.” Sa unsang paagi nimo madasig ang mga bata nga mogahin og panahon sa ilang kinabuhi alang sa mga butang sa Dios?

Posible nga mga Kalihokan

• Dapita ang mga bata sa pagbasa sa Hageo 1:2–5 aron mahibaloan kon nganong wala nahimuot ang Ginoo sa mga Israelihanon. Hangyoa ang mga bata sa pagpili og pulongan gikan sa bersikulo 6 ug sa pagdrowing og hulagway niini. Patag-ana ang klase kon unsa nga pulongan ang girepresentar sa matag drowing. Hisgoti kon sa unsang paagi ang paggahin og panahon sa mga butang gawas niadtong unsay gusto sa Ginoo sama ra sa pagkaon apan dili mabusog, pagsul-ob og sinina apan dili mobati nga mainiton, ug uban pa. Nganong importante ang paggahin og panahon alang sa mga butang nga importante ngadto sa Ginoo?

• Isulat ang “Hunahunaa ang inyong kahimtang” diha sa pisara (bersikulo 7). Dapita ang matag bata nga mohimo og lista sa mga butang nga tingali maoy buhaton niya sa kasagaran nga adlaw, lakip sa mga butang nga gipabuhat sa Ginoo kanato. Hangyoa ang mga bata nga “hunahuna[on] ang ilang kahimtang” pinaagi sa paglingin sa unsa kaha ang isulti sa Ginoo nga mao ang labing importanteng mga butang sa ilang lista. Unsaon nato nga maseguro nga kita mogahin og panahon matag adlaw alang sa mga butang nga gustong ipabuhat sa Ginoo kanato?

Magsul-ob kita og puti sa atong mga bunyag aron sa pagpakita nga si Jesukristo makahimo kanato nga limpyo kon kita maghinulsol sa atong mga sala (tan-awa sa Zacarias 3:3–4).

Zacarias 3:1–7

Ang paghimo ug pagtuman sa mga pakigsaad makatabang kanako nga mahimong mas sama sa Langitnong Amahan ug ni Jesukristo.

Sa usa ka panan-awon, si Zacarias nakakita sa usa ka pangulong pari nga ginganlan og Josue, nga “nagsul-ob ug hugaw nga bisti” (Zacarias 3:3). Usa ka anghel mihatag kaniya og limpyo nga sinina ug mipasabot nga kini nagsimbolo nga nalimpyohan gikan sa iyang mga sala. Mahimo nimong gamiton kini nga panan-awon aron matabangan ang mga bata nga makasabot sa mga pakigsaad ug mga panalangin nga may kalabotan sa bunyag.

Posible nga mga Kalihokan

• Basaha og dungan ang Zacarias 3:1–7 ug hisgoti ang mga pangutana sama niini: Unsay girepresentar sa “hugaw nga bisti” ni Josue? Sa unsang paagi nga kita mahimong limpyo gikan sa atong mga sala? Sa unsang paagi nga ang atong mga pakigsaad sa bunyag makatabang kanato nga “maglakaw diha sa … mga dalan [sa Ginoo]”?

• Pipila ka adlaw sa dili pa ang klase, dapita ang usa ka bata nga motambong nga andam sa paghisgot mahitungod sa iyang bunyag. Rebyoha og dungan ang pakigsaad nga atong himoon sa bunyag (tan-awa sa Doktrina ug mga Pakigsaad 20:37). Sa unsang paagi nga ang pagtuman sa atong mga pakigsaad makatabang kanato nga mahimong mas sama sa Langitnong Amahan ug ni Jesukristo? Sa unsang paagi ang pag-ambit sa sakramento matag semana makatabang kanato sa pagtuman sa atong mga pakigsaad sa bunyag?

Zacarias 9:9–11; 11:12; 13:6–7

Si Jesukristo mao ang gisaad nga Mesiyas.

Unsa ang makat-onan sa mga bata gikan sa mga panagna ni Zacarias mahitungod ni Jesukristo?

Posible nga mga Kalihokan

• Pares-paresa ang mga bata. Hatagi ang matag pares og usa sa mosunod nga mga panagna gikan kang Zacarias, uban sa mga bersikulo sa Bag-ong Tugon nga naghulagway sa katumanan niini: Zacarias 9:9 ug Mateo 21:5–9; Zacarias 9:11 ug 1 Pedro 3:18–19; Zacarias 11:12 ug Mateo 26:14–16; Zacarias 13:7 ug Mateo 26:31. Hangyoa ang matag pares sa pagpaambit sa klase kon unsay ilang nakat-onan mahitungod ni Jesukristo gikan sa ilang mga bersikulo ug kon nganong mapasalamaton sila alang Kaniya.

• Ipakita ang mga litrato 50, 60, ug 64 gikan sa Libro sa mga Hulagway sa Ebanghelyo. Isulat ang mosunod nga mga pakisayran sa kasulatan diha sa pisara, ug dapita ang mga bata sa pagpares sa mga pakisayran ngadto sa mga litrato: Zacarias 9:9; 13:6; 13:7. Dapita ang mga bata sa pagpaambit sa ilang mga pagbati mahitungod ni Jesukristo.

Awhaga ang Pagkat-on diha sa Panimalay

Dapita ang mga bata sa pagsulat og usa ka kamatuoran nga ilang nakat-onan diha sa klase. Dapita sila sa paghisgot ngadto sa ilang mga pamilya kon sa unsang paagi sila makaangkon og lig-on nga pagpamatuod niana nga kamatuoran.

Pagpalambo sa Atong Pagtudlo

Gamita ang imong pagkamamugnaon. Tugoti nga ang mga ideya niini nga latid makapasiugda sa imong kaugalingong pagkamamugnaon. Hunahunaa kon unsay makapalingaw sa mga bata sa imong klase ug unsay makatabang kanila nga makakita og mga koneksyon tali sa mga kasulatan ug sa ilang kinabuhi.