Jun eetalil re k’utuk

Sa’ li hu a’in, taataw li k’utb’il eetalil a’in sa’ li junjunq chi tusb’il aatin: xkanab’ankileb’ chi wotzok, xk’utb’al li tzol’leb’, ut xb’oqb’aleb’ chi tzolok sa’ kab’l. K’iila sut naq yookat chi k’utuk, eb’ li oxib’ raqal a’in te’xjunaji rib’, malaj te’xjal xna’aj. Jo’ jun eetalil, k’e reetal naq rik’in li wotzok naru na’ux xk’utb’al li tzol’leb’, ut naq nakak’ut li tzol’leb’, tento taa’uxq xkanab’ankileb’ chi wotzok. Jo’kan ajwi’, naru taab’oqeb’ chi tzolok sa’ kab’l naq yooqex chi aatinak jo’ tzoleb’aal. Kanab’ a’in chi k’ulmank jo’ chanru eek’asinb’il xb’aan li Musiq’ej, re te’tenq’aaq li ani tzolb’ileb’ aab’aan.

Xkanab’ankileb’ chi wotzok

Jo’ jun raqal sa’ li junjunq tzoleb’aal, kanab’eb’ li kok’al chixwotzb’al li neke’reek’a ut li k’a’ru xe’xk’ul chirix li na’leb’ yookat chixk’utb’al. Sa’ li raatineb’ naru neke’xye li xe’xk’ul chaq naq yookeb’ chaq chi tzolok sa’ li rochocheb’. Jo’kan ajwi’ naru nakanumsi li k’a’ru xe’xtzol sa’ li xamaan xnume’ ut nakapatz’ reheb’ chan ru naq nak’anjelak sa’ lix yu’ameb’.

Xk’utb’al li tzolʼlebʼ

Kim, Taaqehin—Choq’ reheb’ li komon ut li junkab’al naru nakatxtenq’a chixtawb’al ru li tzol’leb’ li taak’ut chiruheb’ li kok’al. K’oxla k’a’ chi raqal reheb’ li loq’laj hu, ch’ol aatin, numsihom, patz’om, ut xkomon chik li k’anjeleb’aal naru taawotz re xtenq’ankileb’ li kok’al chixtzolb’al li na’leb’ re li evangelio ut xb’aanunkil jo’ chanru neke’xye. Tenq’aheb’ chixk’eeb’al reetal lix toch’om li Santil Musiq’ej naq yooq chixch’olob’ankil li yaal sa’ xch’ooleb’. Sik’ xyaalal xtenq’ankileb’ re naq sahaqeb’ xch’ool rik’in li yookeb’ chixtzolb’al.

Wi nakawaj xnawb’al chi us chan ru roksinkil li b’ich re xk’utb’al li tzol’leb’, chi’ilmanq li raqal “Roksinkileb’ li b’ich re xk’utb’al li tzol’leb’ ut “Xtenq’ankileb’ li kok’al chixtzolb’aleb’ ut chixjultikankileb’ li b’ich sa’ li Tzoleb’aal reheb’ li Kok’al ut sa’ Eb’ li B’ich” li wan sa’ “Xch’olob’ankil li hoonal re b’ichank ut li k’anjel reheb’ li kok’al sa’ li ch’utam re li loq’laj wa’ak” sa’ xraqik li manual a’in.

Xb’oqb’aleb’ chi tzolok sa’ kab’l

Xb’aan naq li kab’l a’an tz’aqal li na’ajej re tzolok chirix li evangelio, jun reheb’ laa wajom jo’ aj k’utunel re li Tzoleb’aal reheb’ li Kok’al a’an xb’oqb’aleb’ chi tzolok sa’ kab’l. Chan ru nakatru chixtenq’ankileb’ li kok’al chixwotzb’al rik’ineb’ lix junkab’al li k’a’ru neke’xtzol sa’ li tzoleb’aal? Chan ru taawaklesiheb’ xch’ool li kok’al ut eb’ lix junkab’al re naq te’tzoloq sa’ li Najter Chaq’rab’ sa’ kab’l?

Wi nakawaj xnawb’al chi us chan ru roksinkil li b’ich re xk’utb’al li tzol’leb’, chi’ilmanq li raqal “Roksinkileb’ li b’ich re xk’utb’al li tzol’leb’ ” ut “Xtenq’ankileb’ li kok’al chixtzolb’aleb’ ut chixjultikankileb’ li b’ich sa’ li Tzoleb’aal reheb’ li Kok’al ut sa’ Eb’ li B’ich” li wan sa’ “Xch’olob’ankil li hoonal re b’ichank ut li k’anjel reheb’ li kok’al sa’ li ch’utam re li loq’laj wa’ak” sa’ xraqik li manual a’in.