dagiti ubbing nga agar-aramid kadagiti tignay bayat ti panagkanta iti simbaan

Dagiti Pangiturong para iti Oras ti Panagkanta ken Pabuya dagiti Ubbing iti Miting iti Sakramento

Patpatgenmi a Dagiti Panguluen iti Primary ken Lider iti Musika,

Dagiti kanta iti Primary ket nabileg a ramit a makatulong kadagiti ubbing a masursuruan maipapan iti plano ti Nailangitan nga Ama iti kinaragsak ken dagiti pundasion iti kinapudno ti ebanghelio ni Jesucristo. Kabayatan ti panagkanta dagiti ubbing maipapan kadagiti pagbatayan ti ebanghelio, paneknekanto ti Espiritu Santo maipapan iti kinapudno dagitoy. Agtalinaedto dagiti balikas ken musika iti pampanunot ken puspuso dagiti ubbing iti unos ti panagbiagda.

Ikarigatanyo a gun-oden ti tulong ti Espiritu bayat ti panagsaganayo a mangisuro iti ebanghelio babaen iti musika. Ibinglayyo ti pammaneknekyo maipapan kadagiti kinapudno a kantaenyo. Tulonganyo dagiti ubbing a mangkita no kasano a mainaig ti musika iti no ania dagiti masursuro ken mapadpadasanda iti pagtaengan ken kadagiti klase iti Primary. Maparaburanto dagiti ubbing ken dagiti pamiliada babaen kadagiti napasnek a panagkagumaanyo.

Ay-ayatendakayo ket agyamankami iti naanep a panagserbiyo tapno mapapigsa ken masaluadan dagiti napapateg nga annaktayo.

Ti Sapasap a Panguluen ti Primary

Dagiti Pangiturong para iti Oras ti Panagkanta

5 minuto (panguluen iti Primary): Panglukat a kararag, nasantuan a kasuratan wenno pagannurotan ti pammati, ken maysa a bitla [talk]

20 minuto (lider iti musika): Oras ti panagkanta

Pumili ti panguluen iti Primary ken lider iti musika kadagiti kanta para iti tunggal bulan tapno mapatibker dagiti pagbatayan a sursuruen dagiti ubbing kadagiti klaseda ken iti pagtaengan. Nairaman iti daytoy a pangiwanwan ti maysa a listaan dagiti kanta a mangpatibker kadagitoy a pagbatayan. Naisingasing pay kadagitoy a kanta kadagiti balabala iti Umaykayo, Sumurot Kaniak—Para iti Primary ken Umaykayo, Sumurot Kaniak—Para kadagiti Indibidual ken Pamilia.

No isuroyo dagiti kanta kadagiti ubbing, awisenyo ida a mangibinglay no ania ti nasursurodan maipapan kadagiti estoria ken pagbatayan iti doktrina iti kanta nga isuroyo. Mabalin a kayatyo nga irebyu dagiti balabala iti Umaykayo, Sumurot Kaniak—Para iti Primary nga ad-adalen dagiti ubbing kadagiti klaseda. Daytoy ti mangtulongto kadakayo nga agbalin a mannakaammo kadagiti estoria ken pagbatayan a sursuruenda tapno maibilangyo no kasano a masuportaranyo ti panagsursuroda iti musika.

Kabayatan ti oras ti panagkanta, mabalinyo met nga irebyu dagiti kanta a nasursurodan iti kallabes ken dagiti kanta a paggugustoda a kankantaen. Kabayatan ti panangrebyuyo, awisenyo dagiti ubbing a mangibinglay kadagiti kapanunotan ken riknada maipapan kadagiti kinapudno a masarakan kadagiti kanta.

Ti Children’s Songbook ti pangrugian a resource para iti musika iti Primary. Dagiti himno manipud iti hymnbook ken dagiti kanta manipud iti Friend wenno Liahona ti maitutop pay. Sagpaminsan a mabalin a kantaen dagiti ubbing dagiti kanta a mainaig iti kinabannuar wenno piesta opisial a mayannatup para iti Domingo ken maibagay iti tawen dagiti ubbing. Ti panangusar iti sabali pay a musika iti Primary ket nasken nga aprobaran ti bishopric (kitaen iti Sapasap a Hanbuk: Panagserbi iti Ti Simbaan ni Jesucristo dagiti Santo iti Ud-udina nga Aldaw, 12.3.4, ChurchofJesusChrist.org).

Pakagupgopan ti Primary

Tunggal lawas, iraman ti Primary ti:

Oras ti panagkanta:25 a minuto

Transision:5 a minuto

Dagiti klase:20 a minuto

Mabalin a bingayen dagiti lider ti daddadakkel a Primary dagiti ubbing iti dua a grupo ket adda ti maysa a grupo kadagiti klase ti Primary idinto nga adda ti sabali pay a grupo iti oras ti panagkanta. Kalpasanna agsinnukat dagiti dua a grupo iti lugarda. Kadagiti kasta a kasasaad, mabalin a kasapulan dagiti lider ti Primary ti mangbalbaliw kadagiti oras a naipakita iti ngato tapno maibagay kadagiti kasasaadda.

Naisingasing a Musika para iti Oras ti Panagkanta

Enero

• “I Am a Child of God,” Children’s Songbook, 2–3

• “I Know My Father Lives,” Children’s Songbook,5

• “When He Comes Again,” Children’s Songbook, 82–83

Pebrero

• “Follow the Prophet,” Children’s Songbook, 110–11 (berso 3)

• “He Sent His Son,” Children’s Songbook, 34–35

• “Choose the Right,” Hymns, no. 239

Marso

• “Love One Another,” Children’s Songbook, 136–37

• “Help Me, Dear Father,” Children’s Songbook,99

• “‘Give,’ Said the Little Stream,” Children’s Songbook,236

Abril

• “Redeemer of Israel,” Hymns, no. 6

• “Did Jesus Really Live Again?” Children’s Songbook,64

• “Keep the Commandments,” Children’s Songbook, 146–47

Mayo

• “I Will Walk with Jesus” (music.ChurchofJesusChrist.org)

• “Search, Ponder, and Pray,” Children’s Songbook,109

• “I Love to See the Temple,” Children’s Songbook,95

Hunio

• “I Will Be Valiant,” Children’s Songbook,162

• “A Child’s Prayer,” Children’s Songbook, 12–13

• “I’m Trying to Be Like Jesus,” Children’s Songbook, 78–79

Hulio

• “The Holy Ghost,” Children’s Songbook,105

• “I Know My Father Lives,” Children’s Songbook,5

• “I Love to See the Temple,” Children’s Songbook,95

Agosto

• “My Redeemer Lives,” Hymns, no.135

• “I Feel My Savior’s Love,” Children’s Songbook, 74–75

• “Teach Me to Walk in the Light,” Children’s Songbook,177

Septiembre

• “Kindness Begins with Me,” Children’s Songbook,145

• “Keep the Commandments,” Children’s Songbook, 146–47

• “I Will Walk with Jesus” (music.ChurchofJesusChrist.org)

Oktubre

• “I Feel My Savior’s Love,” Children’s Songbook, 74–75

• “I Hope They Call Me on a Mission,” Children’s Songbook,169

• “Families Can Be Together Forever,” Children’s Songbook,188

Nobiembre

• “Follow the Prophet,” Children’s Songbook, 110–11 (berso 7)

• “We Thank Thee, O God, for a Prophet,” Hymns, no.19

• “I Want to Live the Gospel,” Children’s Songbook,148

Disiembre

• “When He Comes Again,” Children’s Songbook, 82–83

• “Seek the Lord Early,” Children’s Songbook,108

• “Away in a Manger,” Children’s Songbook, 42–43

tallo nga ubbing nga agig-iggem iti ladawan ni Jesus iti sango ti siled a simbaan

Panangusar iti Musika a Mangisuro iti Doktrina

Naisangrat ti oras ti panagkanta a mangtulong kadagiti ubbing a makarikna iti impluensia ti Espiritu Santo bayat ti panagsursuroda kadagiti kinapudno ti ebanghelio. Mabalin a mangparegta kadakayo dagiti sumaganad a kapanunotan kabayatan ti panagplanom kadagiti wagas a pakaisuruan dagiti pagbatayan ti ebanghelio a masarakan kadagiti himno ken kanta iti Primary.

Basaen dagiti mainaig a nasantuan a kasuratan. Iti Children’s Songbook ken Hymns, nairaman dagiti reperensia a mainaig iti nasantuan a kasuratan nga addaan iti adu a kanta ken himno. Tulongam dagiti ubbing a mangbasa iti sumagmamano kadagitoy a binatog iti nasantuan a kasuratan, ket isaritam no kasano a mainaig dagiti nasantuan a kasuratan iti kanta. Mabalin met nga ilistam iti pisarra ti sumagmamano a reperensia iti nasantuan a kasuratan ket awisem dagiti ubbing a mangiparis iti tunggal reperensia iti maysa a kanta wenno maysa a berso manipud iti maysa a kanta.

Punnuen ti blangko. Mangisurat iti maysa a berso ti kanta iti pisarra nga awan dagiti sumagmamano a kangrunaan a balikas [key words]. Kalpasanna kiddawen kadagiti ubbing nga agkansion iti maysa a kanta, a dumdumngeg kadagiti balikas a mangpunno kadagiti blangko. Bayat ti panangpunnoda iti tunggal blangko, ilawlawagmo no ania dagiti pagbatayan ti ebanghelio a masursuroda manipud kadagiti awan a balikas.

Usarem dagiti adaw manipud kadagiti lider iti Simbaan. Awisem dagiti ubbing a dumngeg iti maysa nga adaw manipud iti maysa a lider ti Simbaan a mangisuro iti isu met laeng a pagbatayan ti ebanghelio a kas iti kanta iti Primary. Idawatmo kadakuada a mangingato iti imada no mangngeganda ti maysa a banag a mangtulong kadakuada a makaawat iti kinapudno a kankantaenda. Idawatmo kadakuada a mangibinglay no ania ti nangngeganda.

Agpaneknek. Mangiburay iti ababa a pammaneknek kadagiti ubbing maipapan kadagiti kinapudno ti ebanghelio a masarakan iti kanta iti Primary. Tulongam dagiti ubbing a makaawat a ti panagkanta ket maysa a wagas a mabalin a pangiburayanda iti pammaneknek ken pakariknaanda iti Espiritu.

Agtakder a kas maysa a saksi. Awisem dagiti ubbing nga agsisinnublatda iti panagtakder ken panangibinglay iti no ania ti masursuroda manipud iti kanta a kankansionenda wenno no kasano ti mariknada maipapan kadagiti kinapudno a naisuro iti kanta. Saludsodem kadakuada no ania ti riknada bayat ti panagkansionda iti maysa a kanta, ken tulongam ida a mangbigbig iti impluensia ti Espiritu Santo.

Agusar kadagiti ladawan. Kiddawen kadagiti ubbing a tulongandaka nga agsapul wenno agaramid kadagiti ladawan a maikadua kadagiti napapateg a balikas wenno ragup ti balikas iti kanta. Awisen ida a mangibinglay no kasano a mainaig dagiti ladawan iti kanta ken no ania ti isuro ti kanta. Kas pagarigan, no isursurom ti kanta a “When He Comes Again” (Children’s Songbook, 82–83), mabalinmo nga ikabil dagiti ladawan iti intero a siled a mangiladawan kadagiti napapateg a balikas manipud iti kanta (kas dagiti anghel, niebe,, ken bituen). Kiddawen kadagiti ubbing a mangummong kadagiti ladawan ken mangingato kadagitoy iti husto nga urnos bayat ti aggigiddan a panagkantayo.

Ibinglay ti maysa a banag nga adalen [object lesson]. Mabalinmo nga usaren ti maysa a banag a mangparegta iti panaglilinnawag maipapan iti maysa a kanta. Kas pagarigan, ti mensahe dagiti kanta a “Seek the Lord Early” (Children’s Songbook,108) maipapan iti panagsapsapul iti Apo. Mabalinmo nga ilemmeng ti maysa a ladawan ti Mangisalakan iti siled ket awisem ti maysa nga ubing a mangsapul iti daytoy. Kalpasan a nasarakan ti ubing ti ladawan, paglilinnawagan dagiti banag nga inaramidna a nangsapul iti daytoy. Makaiturong daytoy iti panaglilinnawag maipapan kadagiti banag a nadakamat iti kanta a mabalintayo nga aramiden a mangsapul iti Apo.

Yawis ti panagbibinninglay kadagiti bukod a padas. Tulongam dagiti ubbing a manginaig kadagiti pagbatayan a maisursuro iti kanta kadagiti padasda kadagita a pagbatayan. Kas pagarigan, sakbay iti panagkanta iti “I Love to See the Temple” (Children’s Songbook,95), mabalinmo a kiddawen kadagiti ubbing a mangingato kadagiti imada no nakakitadan iti maysa a templo. Awisem ida nga agpanunot bayat ti panagkantada maipapan iti no kasano ti mariknada no makitada ti maysa a templo.

Agdamag kadagiti saludsod. Adu dagiti saludsod a mabalinmo a damagen no agkansionkayo kadagiti kanta. Kas pagarigan, mabalinmo a saludsoden kadagiti ubbing no ania ti masursuroda manipud iti tunggal berso iti kanta. Mabalinmo pay a kiddawem kadakuada nga agpanunot kadagiti saludsod a sungbatan dayta a kanta. Makaiturong daytoy iti panaglilinnawag maipapan kadagiti kinapudno a naisuro iti kanta.

Dumngeg kadagiti sungbat. Kiddawem kadagiti ubbing a dumngeg kadagiti sungbat. Kas pagarigan, ti kanta nga “He Sent His Son” (Children’s Songbook, 34–35) naglaon iti sumagmamano a saludsod ken sungbat. Mabalinmo a damagen kadagiti ubbing dagiti saludsod ket ipadengngegmo kadakuada dagiti sungbat bayat ti panagkantada.

Panangtulong kadagiti Ubbing a Mangsursuro ken Manglagip kadagiti Kanta iti Primary ken Himno

Masursuro dagiti ubbing ti maysa a kanta babaen ti panangdengngeg ken panangulit a panangkanta iti daytoy. Kanayonmo a kantaen dagiti balikas ti maysa a baro a kanta kadagiti ubbing—saan laeng a basaen wenno isao dagitoy. Daytoy ti mangtulong kadagiti ubbing a manginaig iti ayug [melody] kadagiti balikas. Kalpasan a naisuro ti maysa a kanta, irebyum daytoy iti nadumaduma a naragsak a wagas iti unos ti makatawen. Iti baba ti sumagmamano a kapanunotan a mangtulong kadagiti ubbing a makasursuro ken mangrebyu kadagiti kanta.

Agpartuat kadagiti poster. Ipakitam dagiti poster nga addaan kadagiti balikas manipud iti tunggal berso wenno ladawan a mangibagi kadagiti balikas. Kabayatan ti panagkanta dagiti ubbing, abbongan ti sumagmamano kadagiti balikas wenno ladawan agingga a makansionda ti sibubukel a berso nga awan ti poster. Mabalinmo met nga awisen dagiti ubbing a tumulong kenka nga agaramid kadagiti poster.

Ipakitam ti tono. Tapno masursuro dagiti ubbing ti ayug ti maysa a kanta, ipuestom ti imam iti posision a paidda, ken bayat ti panagkantam kadagiti balikas, ingatom ti imam tapno mangipakita iti nangato a tono ken ibabam ti imam tapno mangipakita iti nababa a tono.

Aweng. Awisem dagiti ubbing nga agbalin nga awengmo babaen ti panangulitda iti kantaem. Kantaam dagiti ubbing iti ababa a ragup ti balikas wenno linia, ket kalpasanna ipakantam kadakuada kenka daytoy.

Agusar iti panagduduma. Agkansion kadagiti kanta iti agduduma a wagas, kas iti panagarasaas, panagdayyeng, panagsipat iti beat, panagduduma iti tempo, wenno panagkanta kabayatan ti panagtugaw wenno panagtakder. Mabalinmo met ti agaramid iti maysa a kubiko manipud iti papel ken, iti agsumbangir iti kubiko, isurat ti sabali a wagas iti panagkanta. Awisem ti maysa nga ubing a mangitulid iti kubiko tapno maikeddeng no kasano a kantaento dagiti ubbing ti kanta.

Agkanta iti kada grupo. Ikkam ti tunggal klase wenno tunggal tao iti maysa a ragup ti balikas a kantaen bayat ti panagtakderda, ken kalpasanna pagsisinnukatem ida kadagiti ragup ti balikas agingga a naaddaan ti tunggal klase wenno tunggal maysa iti batang nga agkanta iti tunggal ragup ti balikas.

Agusar kadagiti garaw ti ima. Awisem dagiti ubbing a mangpanunot kadagiti simple a garaw ti ima a mangtulong kadakuada a manglagip kadagiti balikas ken mensahe ti maysa a kanta. Kas pagarigan, no agkantakayo ti “Reverently, Quietly” (Children’s Songbook,26), mabalinmo nga awisen dagiti ubbing nga agdalikepkepda, agdumogda, ken sagidenda ti pusoda no agkantada kadagiti mainaig a linia iti kanta.

Agkanta dagiti ubbing a babbai, agkanta dagiti ubbing a lallaki. Mangidrowing iti ladawan ti maysa nga ubing a lalaki ken ladawan ti maysa nga ubing a babai, ket ipigket wenno i-tape dagiti ladawan iti agsina a stick. Kabayatan ti panangrebyum iti maysa a kanta, ingatom ti maysa kadagiti ladawan tapno ipakita no asino ti nasken a mangkanta iti dayta a paset ti kanta.

Panangipuruak iti basket. Mangikabil kadagiti nanumeruan a basket wenno dadduma pay a container iti sango ti siled—kapada ti kaadu dagiti container dagiti berso ti maysa a kanta. Awisem ti maysa kadagiti ubbing a mangipuruak iti beanbag wenno nakunes a papel iti uneg wenno asideg ti nanumeruan a container. Pagkantaem dagiti ubbing iti berso a kapada ti nanumeruan iti container.

Iparis ti maysa a ladawan iti maysa a ragup ti balikas. Isuratmo ti tunggal linia ti maysa a kanta iti sabali pay a papel, ket sapulem ti ladawan a mangibagi iti tunggal linia. Ikabil dagiti ladawan iti maysa a bangir ti siled ken ikabil dagiti papel iti sabali pay a bangir. Agkansion iti maysa a kanta, ken kiddawem kadagiti ubbing nga iparisda dagiti ladawan kadagiti balikas.

dua nga ubbing nga agkankanta iti simbaan

Dagiti Pangiwanwan para iti Pabuya [Presentation] iti Miting iti Sakramento

Babaen ti panangiturong ti bishop, gagangay a maang-angay ti pabuya dagiti ubbing iti miting iti sakramento kabayatan ti maikapat a kuarter ti tawen. Kas panguluen ti Primary ken lider iti musika, makipagurnos a makimiting a nasapsapa iti tawen iti mamagbaga [counselor] iti bishopric a mangimaton iti Primary tapno marugian a pagsasaritaan dagiti plano para iti pabuya. No nakumpletoyon dagiti plano, gun-odenyo ti pananganamongna para kadagitoy.

Ti pabuya [presentation] nasken a mangipalubos kadagiti ubbing a mangidatag wenno mangipabuya no ania dagiti nasursuroda ken ti pamiliada manipud iti Daan a Tulag iti pagtaengan ken iti Primary, agraman dagiti kanta iti Primary a kinantada kabayatan ti tawen. Nainkararagan nga ibilangmo no ania dagiti pagbatayan ti ebanghelio ken kanta a mangsuporta no ania ti nasursuroda. Iti unos ti tawen, isuratmo dagiti bitla ken bukod a padas dagiti ubbing para iti mabalin a pangusaran iti pabuya. Awisem dagiti ubbing a mangibinglay kadagiti nasantuan a kasuratan, estoria, ken dagiti pammaneknekda iti pabuya. Kabayatan ti panagplanoyo iti pabuya, panunotenyo dagiti wagas a makatulong iti kongregasion a mangipamaysa iti Nailangitan nga Ama ken ti Mangisalakan ken dagiti pannursuroda.

Dagiti yunit nga addaan iti bassit a bilang dagiti ubbing ket mabalinda nga ibilang dagiti wagas a mabalin a makiraman dagiti miembro ti pamilia a kadua dagiti annakda. Mabalin nga igibus ti maysa a miembro ti bishopric ti miting iti ababa a panagsaritana.

Kabayatan ti panangisaganayo iti pabuya, laglagipen dagiti sumaganad a pangiwanwan:

• Nasken a saan a mangala iti saan a kasapulan nga oras dagiti panagpraktis manipud kadagiti klase ti Primary wenno pamilia.

• Saan a maitutop para iti miting iti sakramento dagiti ladawan [visuals], kawes [costumes], ken dagiti presentasion iti media.

Kitaen iti General Handbook: Serving in The Church of Jesus Christ of Latter-day Saints, 12.2.1.2, ChurchofJesusChrist.org.