ladawan dagiti bituen iti tangatang

Disiembre 27–Enero 2

Moises 1; Abraham 3

“Daytoy ti Aramidko ken Gloriak”

Bayat ti panangbasam no ania ti imbaga ti Dios kada Moises ken Abraham, panunotem maipapan iti no ania ti mabalin nga ibagana koma kadagiti ubbing a sursuruam. Kasano a matulongamto ida a makarikna iti ayatna kadakuada?

Isuratmo dagiti Impresionmo

icon iti panagbibinninglay

Yawis ti Panagbibinninglay

No dadduma makatulong ti maysa a kanta kadagiti ubbing a manglagip no ania dagiti sursuruenda. Agtokar wenno agdayyeng ti sumagmamano a nota ti “I Am a Child of God” (Children’s Songbook, 2–3), ket palugodan dagiti ubbing a pugtuan ti kanta. Tulongam dagiti ubbing a mangpanunot kadagiti wagas a “maidalan [ida], maiwanwan [ida],” ken “matulongan [ida] a mangsapul iti dalan.” dagiti nagannakda ken dagiti dadduma.

icon iti panangisuro

Isuro ti Doktrina: In-inaudi nga Ubbing

Moises 1:1–4, 6

Siak ti anak ti Dios.

Ania ti masursurom manipud iti Moises 1:1–4, 6 maipapan iti relasionmo iti Nailangitan nga Ama? Kasano a matulongam dagiti ubbing a makasursuro no ania ti kayat a sawen ti agbalin a maysa nga anak ti Dios?

Dagiti Mabalin nga Aktibidad

• Ibasam kadagiti ubbing no ania ti imbaga ti Dios ken ni Moises: “Sika ti anakko” (Moises 1:4). Awisem ti maysa nga ubing iti sango ti siled, ket kiddawen kadagiti ubbing a mangulit kenka, “[Nagan ti ubing], maysaka nga anak ti Dios.” Uliten ti ragup dagiti balikas para iti tunggal ubing iti klase.

• Ipakita ti sumagmamano a ladawan dagiti ubbing, ket saludsodem iti klase no annak amin ti Dios dagitoy nga ubbing. Yunay-unay nga anak ti Dios ti tunggal maysa. Pagsisinublatem dagiti ubbing a kumita iti sarming, ket agpaneknek nga annak met ti Dios ida.

• Kantaen ti “I Am a Child of God” (Children’s Songbook, 2–3) a kadua dagiti ubbing. Pakoloram kadakuada ti panid ti aktibidad ita a lawas, ket usarem daytoy a mangrebyu kadagiti kinapudno nga isuro daytoy a kanta.

  Ni Jesucristo kadagiti bituen

  Ni Cristo ken ti Panagparsua, ni Robert T. Barrett

Abraham 3:22–28

Naagnaedak iti sidong ti Nailangitan nga Ama sakbay a naipasngayak.

Ti pannakaammo maipapan iti biagtayo sakbay daytoy a biag ket mabalin a mangparegta kadatayo nga agaramid kadagiti pili a maibatay kadagiti agnanayon a kinapudno. Bayat ti panangbasam iti Abraham 3:22–28, ibilang no kasano nga isuromto kadagiti ubbing maipapan iti agnanayon a kinasiasinoda.

Dagiti Mabalin nga Aktibidad

• Usarem ti “Maipapan ti Dalan a Tulag” (iti Dagiti Estoria iti Daan a Tulag) a mangisuro kadagiti ubbing maipapan iti biag sakbay daytoy a biag. Kalpasanna, awisem dagiti ubbing a mangulit iti daytoy nga estoria kenka. Apay nga imbaonnatayo ti Nailangitan nga Ama ditoy rabaw ti daga? Tulongam dagiti ubbing a mangtakuat iti sungbat bayat ti panangibasam kadakuada ti Abraham 3:25.

• Agkanta a kaduam dagiti ubbing ti maysa a kanta maipapan iti plano ti Dios para kadatayo (kas iti “I Will Follow God’s Plan” [Children’s Songbook, 164–65]). Tulongam ida a makaawat kadagiti agnanayon a kinapudno a naisuro kadagiti balikas.

Moises 1:39

Kayat ti Nailangitan nga Ama a makipagnaedak Kenkuana manen.

Kasano a nangbendision dagiti kinapudno iti Moises 1:39 ti biagmo? Ania iti maaramidmo a makatulong kadagiti ubbing a makapadas met kadagita a bendision?

Dagiti Mabalin nga Aktibidad

• Ilawlawag dagiti ragup ti balikas a “daytoy ti aramidko” ken “agnanayon a biag” iti Moises 1:39, ken tulongam dagiti ubbing a mangulit kadagiti ragup ti balikas. Ibagam kadagiti ubbing maipapan iti aramid nga itrabahom iti tunggal aldaw. Isurom ida nga aramid ti Nailangitan nga Ama ti mangtulong kadatayo a magun-od ti agnanayon a biag, a kayatna a sawen ti panagbalin a kas Kenkuana ken pannakipagnaed manen Kenkuana.

• Awisem ti maysa a naganak nga umay iti klase ket isaritana maipapan no kasano ti mariknana no agsubli ti maysa nga anak nga immadayo (kas pagarigan, iti pagadalan wenno iti mision), wenno mangibinglay kadagiti riknam idi panawen a napadasam dagitoy. Usarem daytoy a pagarigan a mangisuro kadagiti ubbing no kasano ti kadakkel ti tarigagay ti Nailangitan nga Ama a makasublitayo Kenkuana.

icon iti panangisuro

Isuro ti Doktrina: In-inauna nga Ubbing

Moises 1:4, 30, 37–39; Abraham 3:22–28

Maysaak nga anak ti Dios, ken kayatna a tulongannak nga agsubli Kenkuana.

Isuro tiMoises 1:4, 37–39 ken Abraham 3:22–28 dagiti napapateg a kinapudno maipapan iti pakainaigantayo iti Dios ken ti panggepna para iti panangibaonna kadatayo iti daga. Panunotem no kasano a tulongamto dagiti ubbing a makasursuro kadagitoy a kinapudno.

Dagiti Mabalin nga Aktibidad

• Basaem a kaduam ubbing ti Moises 1:4, 37–39 ken Abraham 3:24–25. Ikkam ida kadagiti gundaway nga agdamag kadagiti saludsod ken mangibinglay kadagiti paggugusto a balikas wenno ragup dagiti balikas manipud kadagitoy a bersikulo. Ania ti masursurotayo manipud kadagitoy a bersikulo maipanggep iti Nailangitan nga Ama? maipapan iti bagbagitayo?

• Ipakitam kadagiti ubbing dagiti ladawan ti sumagmamano kadagiti adu a pinarsua ti Nailangitan nga Ama. Basaem ti Moises 1:30, ket ilawlawag a dinamag ni Moises iti Dios maipapan iti panggep dagitoy a pinarsua. Tulongam dagiti ubbing a mangsukisok iti bersikulo 39 tapno sapulen ti sungbat ti Dios. Paneknekam a panggep ti Dios ti mangtulong iti tunggal ubing a manggun-od iti agnanayon a biag.

• Tulongam dagiti ubbing a mangpanunot kadagiti situasion a nasken a pakapagpilianda wenno saan tapno “aramidenda amin a banag nga ibilin kadakuada ti Apo a Diosda” (Abraham 3:25). Bay-am ida nga agsanay wenno mangilawlawag kadagiti mabalin a sungbat kadagita a situasion. Kasano a tulongannatayo ti Mangisalakan no agaramidtayo iti biddut a pili?

Moises 1:12–26

Mapagkedkedak kadagiti pannulisog ni Satanas.

Bayat ti panagadalmo iti Moises 1:12–26, sapulem dagiti banag nga inaramid ni Moises a nangsupring ken ni Satanas. Kasano a makatulong kadagiti ubbing ti pagwadan ni Moises no maipasangoda kadagiti pannulisog?

Dagiti Mabalin nga Aktibidad

• Gupgopem ti padas ni Moises iti Moises 1:12–26 iti bukodmo a balikas, wenno kiddawem iti maysa kadagiti ubbing a mangaramid iti daytoy (kitaen met iti video “I Am a Son of God” [ChurchofJesusChrist.org]). Awisem dagiti ubbing nga agsukisok kadagitoy a bersikulo tapno maammuan no kasano a nabaelan a pinarmek ni Moises ni Satanas. (No kasapulanda ti tulong, itudom kadakuada dagiti bersikulo 13, 15, 18, 20–22, 26.)

• Mangitugot iti kahon dagiti ramit (wenno ladawan dagiti ramit), ket suratam ti tunggal ramit iti maysa a wagas a pakasupringantayo iti sulisog (kas iti panagkararag, panagkanta iti maysa a himno, panagbasa kadagiti nasantuan a kasuratan, wenno panagserbi kadagiti dadduma). Pangalaem ti tunggal ubing iti maysa a ramit ken paisaritam maipapan iti maysa a kasasaad no ti aksion a nakasurat iti dayta a ramit ket makatulong kadatayo a mangsupring iti sulisog. Basaen a sangkamaysa dagiti bersikulo 25–26, ket agpaneknek a tulongannatayto ti Dios no maipasangotayo kadagiti sulisog.

Abraham 3:22–28

Naagnaedak iti sidong ti Nailangitan nga Ama sakbay a naipasngayak.

Makatulong dagitoy a bersikulo a mangiladladawan iti parmata ni Abraham maipapan iti biag sakbay daytoy a biag kadagiti ubbing a mangsungbat kadagiti saludsod a “Sadino ti naggapuak?” ken “Apay nga addaak ditoy?” Kasano a matulongam ida a mangsapul kadagiti sungbat?

Dagiti Mabalin nga Aktibidad

• Iti pisarra, isurat dagiti saludsod a mainaig iti Abraham 3:22–28, a kas iti Ania ti napasamak iti biagtayo sakbay ti pannakayanak? Asino ti adda sadiay? Apay a naparsua ti daga? Awisem dagiti ubbing a mangbasa kadagitoy a bersikulo tapno agsapul kadagiti sungbat.

• No adda maysa a baro a maladaga iti ward, awisem dagiti nagannak nga itugotda daytoy iti klase ket mangibinglayda iti riknada maipapan iti nabara a panangpasangbay iti daytoy a maladaga iti lubong. (Mabalinmo pay ti agdrowing iti maysa a ladawan ti maysa a kayyanak a maladaga.) Isaritam kadagiti ubbing no sadino ti ayan idi ti espiritu daytoy a maladaga sakbay nga immay iti daga. Apay a napateg a maammuan daytoy a maladaga a maysa isuna nga anak ti Dios?

• Agkansion kadagiti kanta maipapan iti plano ti Dios para kadatayo, kas iti “I Know My Father Lives” wenno “I Will Follow God’s Plan” (Children’s Songbook, 5, 164–65). Awisem dagiti ubbing nga agdrowing kadagiti ladawan a maikadua kadagiti balikas. Pausarmo kadakuada dagiti ladawan a mangisuro iti maysa ken maysa kadagiti kinapudno manipud kadagiti kanta.

icon iti panagsursuro

Yallukoy ti Panagsursuro iti Pagtaengan

Ibilangmo dagiti wagas a ti panagsursuro a napasamak iti klasem iti Primary ket mabalin a mangparegta, mangsuporta, wenno mangpatibker ti panagsursuro a mapaspasamak kadagiti pagtaengan dagiti ubbing. Kas pagarigan, mabalinmo a tulongan dagiti ubbing a mangibinglay iti panid ti aktibidad iti daytoy a lawas kadagiti pamiliada.

Panangpadur-as iti Panangisurotayo

Makasursuro dagiti ubbing iti adu a wagas. Maragsakan dagiti ubbing nga agsursuro babaen kadagiti baro ken nadumaduma a padas. Usarem dagiti aktibidad a mangpalugod kadakuada nga aggunay, mangusar iti amin a panagriknada, ken mangpadas kadagiti baro a banag. (Kitaen iti Panangisuro iti Wagas ti Mangisalakan, 25–26.)

activity page: I am a child of God