Da Adan ken Eva nga aggiddan a magmagna

Da Adan ken Eva, ni Douglas M. Fryer

Enero 10–16

Genesis 3–4; Moises 4–5

Ti Pannakatnag da Adan ken Eva

Panunotem maipapan kadagiti ubbing a sursuruam bayat ti panagadalmo ti Genesis 3–4 ken Moises 4–5. Ikasom dagiti parikna ken impresion a maawatmo; mabalin nga iturongdaka kadagiti baro a kapanunotan iti panagisuro.

Isuratmo dagiti Impresionmo

icon iti panagbibinninglay

Yawis ti Panagbibinninglay

Ipakitam ti maysa a ladawan da Adan ken Eva (kitaen iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia), ket kiddawen kadagiti ubbing a tumakder ken ibinglayda ti maysa a banag a makitada iti ladawan wenno malagip maipapan iti estoria.

icon iti panangisuro

Isuro ti Doktrina: In-inaudi nga Ubbing

Genesis 3; Moises 4

Sinurot da Adan ken Eva ti plano ti Nailangitan nga Ama.

Tulongam dagiti ubbing a makaawat no ania ti napasamak iti Minuyongan ti Eden ken no kasano a nakatulong a maipatungpal ti plano ti Dios iti pannakaisalakan. Ania dagiti bendision nga adda kadatayo gapu kadagiti pili da Adan ken Eva?

Dagiti Mabalin nga Aktibidad

• Tapno gupgopen ti estoria ti Pannakatnag da Adan ken Eva, usaren ti “Adan ken Eva” (iti Dagiti Estoria iti Daan a Tulag). Tulongam dagiti ubbing a makaawat a ti pili da Adan ken Eva a mangan iti bunga ket paset ti plano ti Nailangitan nga Ama.

• Ikkam ti tunggal ubing iti ladawan a mangibagi iti maysa a banag manipud iti estoria da Adan ken Eva (kas iti maysa a kayo, maysa nga uleg, maysa a minuyongan, wenno ni Jesucristo). Kiddawem kadakuada a mangitag-ay iti ladawanda iti umno a kanito kabayatan ti panangisaritam iti estoria ken panangbasam kadagiti ragup ti balikas manipud iti Moises 4. Makatulong ti panid ti aktibidad itoy a lawas.

  Ni Eva a mangig-iggem iti bunga

  Ipananaw iti Eden, ni Annie Henrie Nader

Moises 4:1–4

Makapagpiliak iti umno.

Iti Moises 4:3, masursurotayo a ni Satanas “pinanggepna a dadaelen ti kinawaya ti tao nga agpili, nga intedko kenkuana, siak, ti Apo a Dios.” Kasano a matulongamto dagiti ubbing a mangbigbig iti pateg iti iti kabaelan nga agpili iti umno ken biddut?

Dagiti Mabalin nga Aktibidad

• Isaritam kadagiti ubbing maipapan iti sumagmamano a pili a naaramidmo ita nga aldaw, ket tulongam ida a mangpanunot maipapan kadagiti pili nga inaramidda. Ibasam kadakuada ti Moises 4:3: “Ti kinawaya ti tao nga agpili, nga intedko kenkuana, a siak, ti Apo a Dios.]” Ilawlawag nga isuronatayo daytoy a bersikulo nga inted kadatayo ti Dios ti kabaelan nga agaramid kadagiti pili. Yebkasmo ti panagyamanmo ta kabaelam ti agpili iti umno, ken paneknekam a makapagpili met dagiti ubbing nga agaramid no ania ti umno.

• Mangibinglay iti sumagmamano a simple a pagarigan ti maysa nga ubing nga agar-aramid iti umno a pili wenno biddut a pili, ket kiddawen kadagiti ubbing a mangipakita no umno wenno biddut ti pili (mabalinda nga agtakder, itag-ay dagiti tanda, wenno ingato dagiti imada). Iburaymo ti pammaneknekmo a tulongannatayto ti Nailangitan nga Ama nga agpili iti umno, ken awisem dagiti ubbing a mangibinglay met iti riknada.

• Tulongam dagiti ubbing nga agpanunot kadagiti nasayaat a pili a mabalinda nga aramiden a mangsurot ken ni Jesucristo. Aggigiddan nga agkansion iti maysa a kanta maipapan iti panagaramid kadagiti nasayaat a pili kas iti “Choose the Right Way” (Children’s Songbook, 160–61). Ibagam kadagiti ubbing maipapan iti maysa a gundaway idi nagpilika iti nasayaat, ken isaritam no kasano ti nariknam gapu iti dayta a pilim.

Moises 5:4, 8

Makapagkararagak iti Nailangitan nga Ama.

Ania ti kasapulan a maammuan dagiti ubbing a sursuruam maipapan iti kararag? Ania ti masarakam kadagitoy a bersikulo a makatulong kadakuada?

Dagiti Mabalin nga Aktibidad

• Ibasam ti Moises 5:4 kadagiti ubbing. Tulongam ida a makaawat nga idi pimmanaw da Adan ken Eva iti Minuyongan ti Eden, saandan a makadenna pay ti Nailangitan nga Ama, ngem mabalinda ti agkararag Kenkuana. Ilawlawag nga agkararagtayo iti Nailangitan nga Ama iti nagan ti Anakna, ni Jesucristo (kitaen iti Moises 5:8). Ania dagiti sumagmamano a banag a mabalintayo nga isao iti Nailangitan nga Ama kadagiti kararagtayo?

• Kiddawem kadagiti ubbing nga ipakitada kenka dagiti tignay nga aramidenda no agkararagda. Mabalinmo pay nga ipakita ti ladawan ti maysa a tao nga agkarkararag (kitaen iti Libro ti Arte ti Ebanghelio, dagiti num. 111–12) a mangisuro kadagiti ubbing a ti panagidumogtayo, panagdalikepkeptayo, ken panagkidemtayo ket makatulong kadatayo nga agbalin a managraem no agkararagtayo.

• Ibinglaymo ti bukod a padas iti panagkararag wenno pammaneknekmo maipapan iti kararag. Aggigiddan nga agkansion iti kanta maipapan iti kararag, kas iti “A Child’s Prayer” (Children’s Songbook, 12–13).

icon iti panangisuro

Isuro ti Doktrina: In-inauna nga Ubbing

Genesis 3; Moises 4; 5:10–11

Paset idi ti plano ti Dios ti Pannakatnag da Adan ken Eva.

No nagtalinaed koma idi da Adan ken Eva iti Minuyongan ti Eden, saanda koma a naaddaan kadagiti annak ken dida koma dimmur-as nga agbalin a kas iti Nailangitan nga Ama. Agyamantayo iti pilida a makiranud iti bunga gapu ta daytoy a pili ti namagbalin a posible ti mortal a biagtayo ken ti gundawaytayo para iti agnanayon a biag.

Dagiti Mabalin nga Aktibidad

• Awisem dagiti ubbing nga agtitinnulong a mangisarita iti estoria ti Pannakatnag da Adan ken Eva iti bukodda a balikas. Ibinglay dagiti bersikulo manipud iti Genesis 3 a mangtulong kadakuada.

• Tulongam dagiti ubbing a mangsapul iti Moises 4:22–25, 29; 5:10–11 dagiti bunga ti pannangan da Adan ken Eva iti bunga (kitaen iti 2 Nephi 2:19–25). Kasano a maysa a bendision kadatayo ti pilida? Kasano a natulongannatayo ti Mangisalakan a mangparmek iti basol ken ipapatay?

Moises 4:1–4

Addaannak iti bileg nga agpili.

Mailasin kadi dagiti ubbing a sursuruam nga anian a napateg a sagut ti makapagpili iti nagbaetan ti umno ken biddut? Kasano a makatulong kadakuada ti estoria da Adan ken Eva a mangbigbig iti pateg daytoy a sagut?

Dagiti Mabalin nga Aktibidad

• Ibilangmo ti maysa a simple nga adalen a banag (object lesson) kas iti sumaganad a mangiladawan iti kinapateg ti panangaramid kadagiti bukodtayo a pili: Awisem dagiti ubbing a mangkolor iti panid ti aktibidad iti daytoy a lawas, ngem ikkam ida iti maysa laeng a kolor nga usarenda. Apay a nasaysayaat a maaddaan kadagiti pili iti daytoy a situasion? Aggigiddan a basaen ti Moises 4:1–4 a pagsasaritaan no apay a napateg dagiti pili iti plano ti Dios.

• Awisem dagiti ubbing a mangibinglay iti maysa a bukod a padasda idi nagpilida iti umno ken biddut. Pailawlawag kadakuada dagiti mabalin a bunga ti tunggal pili.

Moises 5:4–15

Gapu ken ni Jesucristo, makapagbabawiak ken makadennak manen ti Dios.

Imbaon ti Nailangitan nga Ama ni Jesucristo a mangispal kadatayo manipud kadagiti bunga ti Pannakatnag. Babaen ti pangsubbot a sakripisiona, inaramid ni Jesus a posible nga agungartayo kalpasan ti ipapataytayo ken mapakawan iti basbasoltayo no agbabawitayo.

Dagiti Mabalin nga Aktibidad

• Isurat iti dua a paulo iti pisarra: Gapu kada Adan ken Eva ken Gapu ken ni Jesucristo. Tulongam dagiti ubbing a mangilasin kadagiti bunga ti Pannakatnag bayat ti aggigiddan a panangbasayo iti Moises 4:25; 6:48; Taga Roma 5:12; 2 Nephi 2:22–23. Paisurat kadakuada no ania ti masursuroda iti babaen ti umuna a paulo. Kalpasanna tulongam ida a mangilasin no kasano a pinarmek ni Jesucristo ti basol ken ipapatay bayat ti aggiggiddan a panangbasayo iti Moises 5:8–11, 14–15; 6:59; Alma 11:42. Paisurat kadakuada no ania ti masursuroda iti babaen ti maikadua a paulo. Apay nga agyamantayo para ken ni Jesucristo?

• Mangipabuya iti maysa a video maipapan iti Pannubbot ti Mangisalakan, kas iti “Because of Him” (ChurchofJesusChrist.org). Awisem dagiti ubbing a mangibinglay no ania ti riknada maipapan ken ni Jesucristo.

• Iti sumagmamano nga aldaw a nasapsapa, kiddawem iti sumagmamano nga ubbing nga agpili iti maysa a nasantuan a kasuratan wenno kanta maipapan iti Pannubbot ti Mangisalakan nga ibinglay iti klase. Allukoyem ida a mangisarita no apay a magustuanda daytoy. Aggigiddan nga agkansion iti maysa wenno ad-adu pay a kanta.

icon iti panagsursuro

Yallukoy ti Panagsursuro iti Pagtaengan

Awisem dagiti ubbing a mangibinglay iti panid ti aktibidad ita a lawas kadagiti pamiliada ken pagsasaritaan maipapan kadagiti bendision nga adda kadatayo gapu iti Pannakatnag da Adan ken Eva.

Panangpadur-as iti Panangisurotayo

Sarakem ti bukodmo a pammaregta. Dimo ibilang a dagitoy a balabala iti adalen kas pangiturong a nasken a surotem bayat ti panangisurom. No di ketdi, usarem dagitoy a kas paggapuan dagiti kapanunotan a manggubuay iti bukodmo nga inspirasion bayat ti panangutobmo iti kasapulan dagiti ubbing a sursuruam. (Kitaen iti Panangisuro iti Wagas ti Mangisalakan,7.)

panid ti aktibidad: paset ti plano ti Dios ti Pannakatnag da Adan ken Eva