Da Adan ken Eva, ni Douglas Fryer

Enero 10–16

Genesis 3–4; Moises 4–5

Ti Pannakatnag da Adan ken Eva

Bayat ti panagadalmo iti Genesis 3–4 ken Moises 4–5, ibilangmo no ania ti padpadasen ti Apo nga isuro kenka. Isuratmo dagitoy a kinapudno ken dagiti naespirituan nga impresionmo, ken utobem dagitoy iti unos ti makalawas.

Isuratmo dagiti Impresionmo

Iti damo, mabalin a kasla maysa a trahedia ti estoria ti Pannakatnag da Adan ken Eva. Napapanaw da Adan ken Eva iti napintas a Minuyongan ti Eden. Naipuruakda iti maysa a lubong nga adda ut-ot, liday, ken ipapatay (kitaen iti Genesis 3:16–19). Ket naisinada manipud iti Nailangitan nga Amada. Ngem gapu kadagiti kinapudno a naisubli babaen ken ni Propeta Joseph Smith iti libro ni Moises, ammotayo a pudno a maysa a namnama ti estoria da Adan ken Eva—ken maysa a napateg a paset ti plano ti Dios para kadagiti annakna.

Napintas ti Minuyongan ti Eden. Ngem kasapulan da Adan ken Eva ti maysa a banag a nalablabes ngem iti napintas nga aglawlaw. Kasapulanda—ken kasapulantayo amin —ti maysa a gundaway tapno dumur-as. Ti ipapanaw iti Minuyongan ti Eden ti kasapulan nga umuna nga addang iti panagsubli iti Dios ken iti kamaudianan panagbalin a kas Kenkuana. Kayat a sawen dayta ti panangsango iti oposision, panagaramid kadagiti biddut, panagsursuro nga agbabawi, ken panagtalek iti Mangisalakan, a ti Pannubbotna ti mangaramid iti posible a panagdur-as ken ti “rag-o ti pannakasubbot” (Moises 5:11). Isu a no mabasam ti maipapan iti Pannakatnag da Adan ken Eva, ipamaysam saan laeng iti kasla trahedia ngem kadagiti posibilidad—saan laeng nga iti paraiso a napukaw da Adan ken Eva ngem iti gloria a napalugodan nga awatentayo gapu iti pilida.

Dagiti Kapanunotan para iti Bukod a Panagadal iti Nasantuan a Kasuratan

Genesis 3:1–7; Moises 4; 5:4–12

Ti Pannakatnag ket kasapulan a paset ti plano ti Dios a mangsubbot kadagiti annakna.

Ti Pannakatnag da Adan ken Eva ti nangyeg iti pisikal ken naespirituan nga ipapatay iti lubong. Daytoy pay ti nangyeg iti rigat, ladingit, ken basol. Amin dagitoy ti kasla makaigapu a pagbabawyan ti Pannakatnag. Ngem ti Pannakatnag ket paset ti plano ti Nailangitan nga Ama a mangsubbot ken mangitan-ok kadagiti annakna babaen “ti panagsakripisio ti Bugbugtong ti Ama” (Moises 5:7). Bayat ti panagadalmo iti Genesis 3:1–7; Moises 4; 5:4–12, ania dagiti kinapudno a masarakam a mangtulong kenka tapno maawatam ti Pannakatnag ken no kasano a parmeken ti Pannubbot ni Cristo daytoy? Mabalin a makatulong dagiti kastoy a saludsod:

• Kasano a makaapekto ti Pannakatnag kada Adan ken Eva? Kasano a makaapekto kaniak daytoy?

• Apay a nangidaton da Adan ken Eva kadagiti sakripisio? Ania ti insimbolo dagita a sakripisio? Ania ti masursurok manipud kadagiti balikas ti anghel kadagitoy a bersikulo?

• Apay a “naragsakan” da Adan ken Eva kalpasan ti Pannakatnagda? Ania ti masursurok manipud iti daytoy a pakaammuan maipapan iti plano ti Dios a mangsubbot kaniak babaen ken ni Jesucristo?

Gapu iti Libro ni Mormon ken dagiti dadduma pay a paltiing iti ud-udina nga aldaw, addaantayo iti naidumduma a pannirigan iti Pannakatnag. Kas pagarigan, ibilang no ania ti insuro ni propeta Lehi iti pamiliana maipapan kada Adan ken Eva 2 Nephi 2:15–27. Kasano nga lawlawagan dagiti pannursuro ni Lehi no ania ti napasamak iti Minuyongan ti Eden ken mangtulong kadatayo a makaawat no apay a napateg daytoy?

Kitaen met iti 1 Taga Corinto 15:20–22; Mosiah 3:19; Alma 12:21–37; Doktrina ken Katulagan 29:39–43; Pagannurotan ti Pammati 1:3; Dallin H. Oaks, “The Great Plan,” Liahona, Mayo 2020, 93–96; Dallin H. Oaks, “Pagsusupadian iti Amin a Banag,” Liahona, Mayo 2016, 114–17; Jeffrey R. Holland, “Where Justice, Love, and Mercy Meet,” Liahona, Mayo 2015, 104–6.

Panagpanaw iti Eden, ni Annie Henrie Nader

Genesis 3:16; Moises 4:22

Ania ti kayat a sawen ti nasken nga “iturayan” ni Adan ni Eva?

Daytoy a binatog ti nasantuan a kasuratan ket biddut ti pannakaawat no dadduma a nainkalintegan ti saan a nasayaat a panangtrato ti maysa nga asawa a lalaki iti asawana. Iti aldawtayo, insuro dagiti propeta ti Apo a nupay nasken a mangidaulo iti kinalinteg ti maysa nga asawa a lalaki iti pagtaengan, nasken a kitaenna ti asawana kas kapadpada a kadua (kitaen iti “Ti Kaamaan: Maysa a Waragawag iti Lubong” [ChurchofJesusChrist.org]). Inlawlawag da Elder Dale G. Renlund ken Sister Ruth Lybbert Renlund a ti nalinteg nga asawa a lalaki “agkalikagumto nga agserbi; akuennanto ti biddutna ket agdawat iti pammakawan; alistonto a mangidiaya iti pammadayaw; agbalinto a mannakaawat kadagiti paggugusto dagiti miembro ti pamilia; mariknananto ti dagsen ti pagrebbengan a mangipaay kadagiti ‘kasapulan ti biag ken panangsaluad’ para iti pamiliana; tratuennanto ti asawana iti kangatuan a panangrespeto ken pammadayaw. … Bendisionannanto ti pamiliana” (The Melchizedek Priesthood: Understanding the Doctrine, Living the Principles [2018], 23).

Moises 5:4–9, 16–26

Awatento ti Dios dagiti sakripisiok no idiayak kadakuada nga addaan iti natallugod ken natulnog a puso.

Naadal da Adan ken Eva a simboliko ti pannubbot a sakripisio ni Cristo dagiti sakripisio iti ayup, ket ”impakaammoda amin a banag kadagiti annakda a lallaki ken babbai” (Moises 5:12). Bayat ti panagadalmo iti Moises 5:4–9, 16–26, ibilangmo dagiti nadumaduma nga ugali ti dua kadagiti annakda, da Cain ken Abel, kadagitoy dua a sakripisio. Apay nga inawat ti Apo ti sakripisio ni Abel ngem saanna nga inawat ti sakripisio ni Cain?

Ania dagiti kita ti sakripisio nga idawat ti Apo kadakayo? Adda kadi ania man a banag iti Moises 5:4–9, 16–26 a mangbalbaliw iti wagas a panangpanunotmo maipapan kadagita a sakripisio?

Kitaen met iti Salmo 4:5; 2 Taga Corinto 9:7; Omni 1:26; 3 Nephi 9:19–20; Moroni 7:6–11; Doktrina ken Katulagan 97:8; Jeffrey R. Holland, “Behold the Lamb of God,” Liahona, Mayo 2019, 44–46.

Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening

Genesis 3; Moises 4.Ania ti maaramidmo a mangtulong iti pamiliam a maawatanda a nasaysayaat ti Pannakatnag da Adan ken Eva? Mabalinmo a kopiaen dagiti ladawan manipud iti “Da Adan ken Eva” (iti Dagiti Estoria iti Daan a Tulag) ket gettengem dagitoy. Kalpasanna mabalinyo ti agtitinnulong a mangurnos kadagiti ladawan bayat ti panaglilinnawagyo kadagiti padas da Adan ken Eva. Apay a kasapulan ti Pannakatnag iti plano ti pannakaisalakan iti Nailangitan nga Ama? Makatulong ti panangbuya iti video “The Fall” (ChurchofJesusChrist.org) a mangsungbat iti daytoy a saludsod.

Moises 4:1–4.Ania ti masursurotayo maipapan iti Dios, ni Jesucristo, ken ni Satanas manipud kadagitoy a bersikulo? Apay a napateg unay ti karbengan nga agpili iti plano ti Dios isu a kayat a dadaelen ni Satanas?

Moises 5:5–9.Ania ti imbilin ti Dios kada Adan ken Eva nga aramidenda a mangtulong kadakuada a mangpanunot maipapan iti Mangisalakan? Ania ti inted ti Dios kadatayo a makatulong iti panangpanunottayo maipapan iti Mangisalakan?

Moises 5:16–34.Ania ti kayat a sawen ti agbalin nga “agaywan iti kabsat[ko]”? Kasano a maaywanantayo a nasaysayaat ti tunggal maysa kas maysa a pamilia?

Para iti ad-adu pay pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.

Naisingasing a kanta: “Choose the Right Way,” Children’s Songbook, 160–61.

Panangpadur-as iti Bukod a Panagadal

Usaren dagiti tulong iti panagadal iti nasantuan a kasuratan. Bayat ti panagadalmo kadagiti nasantuan a kasuratan, usarem dagiti footnote Topical Guide, Bible Dictionary, Pangiwanwan iti Nasantuan a Kasuratan, ken dadduma pay a tulong iti panagadal tapno manggun-od kadagiti nayon a nalawag a pannakaammo ken pannakaawat.

Kaasping, ni Walter Rane