“Enero 24–30. Moises 7: ‘Ninaganan ti Apo dagiti Taona iti Zion,’” Umaykayo, Sumurot Kaniak—Para kadagiti Indibidual ken Pamilia: Daan a Tulag 2022 (2021)
“Enero 24–30. Moises 7,” Umaykayo, Sumurot Kaniak—Para kadagiti Indibidual ken Pamilia: 2022
Aggiinnayatkayo, ni Emma Donaldson Taylor
Enero 24–30
Moises 7
“Ninaganan ti Apo dagiti Taona iti Zion”
Bayat ti panangbasam ken panangutobmo iti Moises 7, isuratmo dagiti naespirituan nga impresionmo. Babaen ti panangaramid iti daytoy, ipakitam nga ipategmo ti pannarabay manipud iti Apo ken kayatmo ti umawat iti ad-adu pay a pannarabay.
Isuratmo dagiti Impresionmo
Iti unos ti pakasaritaan, pinadas dagiti tao a gun-oden ti naipatungpal ni Enoc ken dagiti taona: panangbangon iti pagulidanan a sosiedad nga awan ti kinamarigrigat wenno kinaranggas. Kas tattao ti Dios, ibinglaytayo daytoy a tarigagay. Awagantayo daytoy nga panangbangon iti Zion, ken iramanna—kas nayon iti panangaywan kadagiti napanglaw ken panangitandudo iti talna—panangaramid kadagiti katulagan, panagindeg a sangkamaysa iti kinalinteg, ken panagbalin a maysa iti tunggal maysa ken ni Jesucristo, “ti Ari ti Zion” (Moises 7:53). Gapu ta agtultuloy ti panangipasdek iti Zion iti aldawtayo, makatulong a saludsoden, kasano nga inaramid daytoy ni Enoc ken dagiti taona? Kasano a nagbalinda a “sangsangkamaysa ti puso ken panunotda” (Moises 7:18) iti laksid ti kinadangkes iti aglawlawda? Maibilang iti adu a detalye nga ited kadatayo ti Moises 7 maipapan iti Zion, mabalin a daytoy ti naipangpangruna a napateg para kadagiti Santo iti Ud-udina nga Aldaw—maysa a kasasaad ti puso ken espiritu. Ti Zion, kas iti insuro ti Apo, ket ti “natarnaw ti panagpuspusona” (Doktrina ken Katulagan 97:21). Isu a nalabit a ti kasayaatan a wagas tapno mabangon ti Zion ket mangrugi iti bukodtayo a puso ken pagtaengan.
Dagiti Kapanunotan para iti Bukod a Panagadal iti Nasantuan a Kasuratan
Dagiti panagkagumaan ni Enoc ti maysa a pagtuladan para iti panangbangon iti Zion iti bukodtayo a biag.
Gapu ta ti Moises 7 ket maysa a kasuratan no kasano a sibaballigi dagiti pasurot ti Dios a nangbangon iti Zion, mabalin a mangisuro ken mangparegta daytoy kadatayo ita bayat ti panagkagumaantayo a mangaramid iti kasta met laeng. Ibilang ti panangusar iti tsart kas iti daytoy maysa tapno isurat no ania ti masursurom maipapan iti Zion manipud iti Moises 7:16–21, 27, 53, 62–69.
|
Bersikulo |
Ania ti masursurom maipanggep iti Zion? |
Ania ti isingasing daytoy maipapan kadagiti panagkagumaanmo a mangbangon iti Zion? |
|---|---|---|
Bersikulo | Ania ti masursurom maipanggep iti Zion? “Nagmaymaysada iti puso ken panunot” dagiti tao ti Zion. | Ania ti isingasing daytoy maipapan kadagiti panagkagumaanmo a mangbangon iti Zion? Nasken nga agkaykaysatayo kas pamilia ken kas maysa a Simbaan. |
Bersikulo | Ania ti masursurom maipanggep iti Zion? “Ti Zion, iti apagkanito, naitayab iti langit.” | Ania ti isingasing daytoy maipapan kadagiti panagkagumaanmo a mangbangon iti Zion? In-inut a proseso ti panangbangon iti Zion. |
Bersikulo | Ania ti masursurom maipanggep iti Zion? | Ania ti isingasing daytoy maipapan kadagiti panagkagumaanmo a mangbangon iti Zion? |
Bersikulo | Ania ti masursurom maipanggep iti Zion? | Ania ti isingasing daytoy maipapan kadagiti panagkagumaanmo a mangbangon iti Zion? |
Nasken nga ikarigatan dagiti tao ti Dios nga agbalinda nga “agmaymaysa iti puso ken panunot.”
Nailista itiMoises 7:18–19 dagiti napapateg a kababalin dagiti tao a ninaganan ti Apo iti Zion. Panagkunam apay a napateg dagitoy a kababalin iti panangbangon iti Zion? Kasano a ti Zion, kas nailadawan iti daytoy a kapitulo, ket maigiddiat manipud iti dadduma pay a grupo wenno timpuyog iti lubong? Bayat ti panangutobmo iti daytoy a saludsod, mabalinmo a panunoten dagitoy a balikas ni Jesucristo iti bersikulo 53: “Siak ti Mesias, ti Ari ti Zion.” Ania ti kaipapanan ti kaadda ni Jesucristo kas Aritayo? Kasano ti panangtulongna kadatayo a mangpadur-as kadagiti kababalin ti Zion?
Kitaen iti Taga-Filipos 2:1–5; 4 Nephi 1:15–18; Doktrina ken Katulagan 97:21; 105:5.
Nasken nga ikarigatantayo nga “agmaymaysa iti puso ken panunot[tayo]” (Moises 7:18).
Ania ti napasamak iti siudad ti Enoc?
Dagiti ragup ti balikas a “naitayab” (Moises 7:21, 23), “naitag-ay” (Moises 7:24), “nakamakam” (Moises 7:27), ken “pimmanaw” (Moises 7:69) maiturong iti Zion ken dagiti tao ni Enoc a nagbalbaliw [translated] ken naipan iti langit. Dagiti tao a nabaliwan [translated] “ket agbalbaliw tapno saanda a mapadasan ti patay” kas mortal (Pangiwanwan iti Nasantuan a Kasuratan, “Nagbalbaliw a Parsua,” “Zion,” scriptures.ChurchofJesusChrist.org; kitaen met iti 3 Nephi 28:4–9, 15–18, 39–40).
Agsangit ti Dios para kadagiti annakna.
Makita ti sumagmamano a tao ti Dios kas adayo a parsua a saan a maapektaran ti riknana iti mapaspasamak kadatayo. Ngem nakita ni Enoc iti maysa a parmata a nagsangit ti Dios para kadagiti annakna. Bayat ti panangbasam iti Moises 7:28–40, sarakem dagiti gapu ti nagsangitan ti Dios. Iti nabati a paset ti parmata ni Enoc, a nailadawan iti Moises 7:41–69, ania ti pakakitaan a masarakanyo a ti Dios ket “manangngaasi ken naanus iti agnanayon”? (Moises 7:30; kitaen kadagiti bersikulo 43, 47, ken 62 para kadagiti pagarigan).
Kadagiti maudi nga aldaw ummongento ti Dios dagiti pilina.
Iladawan tibersikulo 62 dagiti pasamak kadagiti maudi nga aldaw. Ibilang no ania ti mabalin a kaipapanan dagiti ragup ti balikas a kas kadagitoy: “pababaekto ti kinalinteg manipud iti langit,” “ibaonkonto ti kinapudno iti daga,” “kinalinteg ken kinapudno ti ibilinkonto nga agsaknap iti daga a kas iti layus.” Ania ti isuro kenka dagitoy a ragup ti balikas maipapan iti trabaho ti Dios kadagiti ud-udina nga aldaw?
Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening
-
Moises 7:18–19.Tapno matulongan dagiti miembro ti pamilia a mangiladawan iti panunotda no ania ti kayat a sawen ti “sangsangkamaysa ti puso,” nalabit a mabalinmo ti agaramid iti papel a sinanpuso ket gettengem daytoy iti adu a pedaso nga agbalin a puzzle, nga umanay para iti tunggal miembro ti pamilia a maaddaan iti maysa a pedaso. Mabalin dagiti miembro ti pamilia nga isuratda ti naganda iti pedasoda ket kalpasanna agtitinnulongda a mangbukel iti sinanpuso. Bayat ti panangkumpletoda iti puzzle, mabalin a pagsasaritaanyo dagiti banag a magustuanyo maipapan iti tunggal miembro ti pamilia.
-
Moises 7:28–31, 35.Ania ti masursurotayo maipapan iti Dios manipud kadagitoy a bersikulo?
-
Moises 7:32.Apay nga inikkannatayo ti Dios iti karbengan nga agpili? Ania ti mabalin nga isaotayo iti maysa a tao a makarikna a dagiti bilin ti Dios ti mangpabassit iti karbengantayo nga agpili? Ti panagbasa iti 2 Nephi 2:25–27 ti mabalin a mangnayon iti daytoy a panaglilinnawag.
-
Moises 7:59–67.Bayat ti panangbasa ti pamiliam iti Moises 7:59–67, padasem a markaan wenno isuratmo dagiti banag nga ibaga ti Apo ken ni Enoc maipapan kadagiti maudi nga aldaw—kas pagarigan, a ti Dios “mangummong kadagti pili[na]” (bersikulo 62) ken addanto “nakaro a panagrigat kadagiti nadangkes” (bersikulo 66). Kasano a maaddaantayo iti pammati ken namnama iti laksid ti kinadangkes kadagiti maudi nga aldaw? Kas paset daytoy a panaglilinnawag, ibilang ti panangbasa kadagitoy a balikas manipud ken ni Elder Ronald A. Rasband: “Dikayo maawanan iti namnama, kakabsat. Wen, agbibiagtayo kadagiti napeggad a panawen, ngem no agtalinaedtayo iti dana ti katulagan, ditayo nasken nga agbuteng. Bendisionankayo a no aramidenyo ti kastoy, saankayto a mariribukan babaen kadagiti panawen a pagbiagantayo wenno dagiti pakariribukan nga umay iti dalanyo. Bendisionankayo a pilienyo ti agtakder kadagiti nasantuan a lugar ket saankayo nga magaraw. Bendisionankayo ti panamati kadagiti kari ni Jesucristo, a Sibibiag Isuna ken bambantayannatayo, ay-aywanannatayo ken itaktakderannatayo” (“Be Not Troubled,” Liahona, Nob. 2018, 21).
Para kadagiti dadduma pay a kapanunotan iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.
Naisingasing a kanta: “Love at Home,” Hymns, num. 294.
Panangpadur-as iti Panangisurotayo
Agbalin a managpaliiw. Kabayatan ti panangikasom iti no ania ti mapaspasamak iti biag dagiti annakmo, masarakamto dagiti nasayaat a gundaway iti panangisuro. Dagiti komento ken saludsod dagiti annakyo iti agmalem ket makaiturong met iti posible a kanito iti panangisuro. (Kitaen iti Panangisuro iti Wagas ti Mangisalakan,16.}
Nabaliwan a Siudad ti Zion, ni Del Parson