“Disiembre 27–Enero 2. Moises 1; Abraham 3: ‘Daytoy ti Aramidko ken Gloriak,’” Umaykayo, Sumurot Kaniak—Para Kadagiti Indibidual ken Pamilia: Daan a Tulag 2022 (2021)
“Disiembre 27–Enero 2. Moises 1; Abraham 3,” Umaykayo, Sumurot Kaniak—Para kadagiti Indibidual ken Pamilia: 2022
Disiembre 27–Enero 2
Moises 1; Abraham 3
“Daytoy ti Aramidko ken Gloriak”
Bayat ti panangbasam no ania ti kinuna ti Dios kada Moises ken Abraham, utobem no ania ti mabalin nga isasaona kenka.
Isuratmo dagiti Impresionmo
Irugi ti Biblia kadagiti balikas nga “idi punganay pinarsua ti Dios ti langit ken ti daga” (Genesis 1:1). Ngem ania ti adda idi sakbay daytoy a “punganay”? Ken apay a pinarsua ti Dios amin daytoy? Babaen ken ni Propeta Joseph Smith, nangted ti Apo iti panangilawlawag maipapan kadagitoy a saludsod.
Kas pagarigan, inikkanntayo iti rekord ti maysa a parmata a nakakitaan ni Abraham iti kaaddatayo kas espiritu “sakbay ti lubong” (kitaen iti Abraham 3:22–28). Inikkannatayo pay ti Apo iti naparegta a patarus wenno rebision ti umuna nga innem a kapitulo ti Genesis—maawagan iti libro ni Moises—a saan a mangrugi iti “idi punganay.” Ketdi, mangrugi daytoy iti padas ni Moises a mangted iti sumagmamano a konteksto para iti nalatak unay nga estoria iti Panagparsua. Sangkamaysa, a dagitoy a nasantuan a kasuratan iti ud-udina nga aldaw ket nasayaat a lugar a pangrugian iti panagadal iti Daan a Tulag gapu ta ipaayda ti sumagmamano a napapateg a saludsod a makaited iti naipalawlaw a konteksto iti panagbasatayo: Asino ti Dios? Asinotayo? Ania ti aramid ti Dios, ken ania ti lugartayo iti daytoy? Makita dagiti pangrugian a kapitulo ti Genesis kas sungbat ti Apo iti kiddaw ni Moises: “Kaasiam koma ti katulongam, O Dios, ket ibagam kaniak ti maipanggep iti daytoy a lubong, ken dagiti agindeg ditoy, ken kasta met dagiti langit” (Moises 1:36).
Dagiti Kapanunotan para iti Bukod a Panagadal iti Nasantuan a Kasuratan
Kas maysa nga anak ti Dios, addaanak iti nadiosan a pagtungpalan.
Insuro ni Presidente Dieter F. Uchtdorf, “Kaaduan ti pannakatikaw a mapasarantayo iti daytoy a biag aggapu iti gagangay saan a pannakaawat no asinotayo” (“The Reflection in the Water” [Church Educational System fireside for young adults, Nob. 1, 2009], ChurchofJesusChrist.org). Ammo ti Nailangitan nga Ama daytoy, kasta met nga ammo ni Satanas. Nairaman iti umuna a mensahe ti Dios ken ni Moises dagiti kinapudno “sika ti anakko” ken “sika ti kaasping ti Bugbugtongko” (Moises 1:4, 6). Iti kasupadina, inawagan ni Satanas ni Moises kas “anak ti tao” (Moises 1:12). Kasano koma a maigiddiat ti biag ken pangngeddengmo no panunotem ti bagim kas iti kayat ti Satanas kenka nga “anak ti tao”? Kasano a nangbendision iti biagmo ti pannakaammom ken pananglagipmo a maysaka nga anak ti Dios?
Ania dagiti bersikulo wenno ragup ti balikas iti Moises 1 ti mangted kenka iti kaipapanan ti nadiosan a pategmo?
Ni Cristo ken ti Panagparsua, ni Robert T. Barret
Maliklikak ti impluensia ni Satanas.
Kas ipakita ti Moises 1 a silalawag, saan a dagiti nabileg a naespirituan a padas ti makailaksid kadatayo iti pannulisog. Kinapudnona, maysa kadagiti taktika ni Satanas ket mangsulisog kadatayo a pagduaduaan dagita a padas wenno no ania ti nasursurotayo kadakuada. Bayat ti panangbasam maipapan iti sungbat ni Moises ken ni Satanas kadagiti bersikulo 12–26, ania ti masursurom a makatulong kenka nga agtalinaed a napudno iti pammaneknek nga inawatmo? Ania ti mangtulong kenka a mangsupring iti dadduma pay a pannulisog ni Satanas? (kitaen, kas pagarigan, dagiti bersikulo 15 ken 18).
Maibatay iti no ania ti masursurom, mabalinmo ti agplano para iti panangsupring iti sulisog. Kas pagarigan, mabalinmo nga ileppas ti binatog a “No masulisogak a , siakto ket .”
Kitaen met iti Mateo 4:1–11; Helaman 5:12; Gary E. Stevenson, “Deceive Me Not,” Liahona, Nob. 2019, 93–96; “I Am a Son of God” (video), ChurchofJesusChrist.org.
Ti aramid ken gloria ti Dios ti mangtulong kaniak a manggun-od iti agnanayon a biag.
Kalpasan ti pannakakitana iti parmata maipapan kadagiti pinarsua ti Dios, nagkiddaw ni Moises iti Apo: “Ibagam kaniak … apay a kastoy dagitoy a banag” (Moises 1:30). Ania ti makaawis riknam maipapan iti sungbat ti Apo iti Moises 1:31–39?
Naaddaan met ni Abraham iti naparmataan a padas, kas nairekord iti Abraham 3. Ania ti masarakam kadagiti bersikulo 22–26 a makatulong a mangsungbat iti kiddaw ni Moises?
Ibilang ti panangilista iti dadduma pay a kinapudno a nasursuro da Moises ken Abraham kadagiti parmatada: kinapudno maipapan iti Dios, maipapan iti bagbagida, ken maipapan kadagiti panggep dagiti pinarsua ti Dios. Kasano nga aringan dagitoy a kinapudno ti wagas a panangkitam iti bagim, ken ti lubong iti aglawlawmo?
Kitaen met iti Dieter F. Uchtdorf, “You Matter to Him,” Liahona, Nob. 2011, 19–22; Gospel Topics, “Premortality,” topics.ChurchofJesusChrist.org.
Malaksid ken ni Abraham adda kadi pay dagiti dadduma a “napilin sakbay pay ti pannakipasngay[da]”?
“Iti lubong ti espiritu sakbay ti yaay iti daga, nangtuding ti Dios kadagiti masinunuo nga espiritu a mangipatungpal kadagiti masinunuo a mision kabayatan ti mortal a panagbiagda. Maawagan daytoy iti pannakaorden sakbay a nayanak. … Ti dokrina ti pannakaorden sakbay a nayanak ket mayaplikar iti amin a miembro ti Simbaan, saan laeng iti Mangisalakan ken dagiti propetana” (Gospel Topics, “Foreordination,” topics.ChurchofJesusChrist.org).
Kasano a naalatayo dagiti libro da Moises ken Abraham?
Ti libro ni Moises ti umuna a paset ti naparegta a patarus ni Joseph Smith iti Biblia. Naipalgak ti libro ni Abraham ken ni Joseph Smith kabayatan ti aramidna iti papiru nga Egipto. Dagitoy a libro, a masarakan iti Perlas a Kapatgan, ti mangted iti adu nga impormasion maipapan kada Moises, Abraham, ken dadduma pay a propeta nga awan iti Daan a Tulag. Tapno masursuro ti ad-adu pay no kasano a naalatayo dagitoy a libro, kitaen iti “Patarus ni Joseph Smith ti Biblia” (Church History Topics, ChurchofJesusChrist.org/study/history/topics) ken “Translation and Historicity of the Book of Abraham” (Gospel Topics, topics.ChurchofJesusChrist.org).
Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening
-
Moises 1:2–6; Abraham 3:11–12.Mabalinmo nga awisen dagiti miembro ti klase a mangsapul kadagiti ragup ti balikas iti kanta “I Am a Child of God” (Children’s Songbook, 2–3) a mainaig kadagiti kinapudno a naisuro kadagiti nasantuan a kasuratan.
-
Moises 1:4, 30–39.Maay-ayo ngata ti pamiliam a mangkita iti sumagmamano nga “aramid dagiti ima [ti Dios]”? (bersikulo 4). Mabalin a basaem dagitoy a bersikulo iti maysa a parke wenno iti babaen dagiti bituen ti rabii. Kalpasanna isaritam iti maipapan no apay a pinarsua ti Dios ti lubong ken kasano a makiramantayo iti “aramid ken gloria[na]” (bersikulo 39).
-
Moises 1:18.Ania ti balakad a maibinglaytayo iti tunggal maysa a makatulong kadatayo a “mapaggiddiat” ti Dios ken ni Satanas? (Kitaen met iti Moroni 7:12–18; Doktrina ken Katulagan 50:23–24.)
-
Abraham 3:24–26.Mabalinmo nga ikkan dagiti miembro ti klase iti naragsak ngem mapannubok nga aramiden a mangpalugod kadakuada a mangipaneknek a makasurotda kadagiti pangiturong, kas iti panangikulpi iti papel nga eroplano wenno panangsurot iti maysa a resipe. Kasano a maipada daytoy nga aktibidad iti panggep ti mortal a biagtayo kas nailadawan kadagitoy a bersikulo?
Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.
Naisingasing a kanta: “I Am a Child of God,” Children’s Songbook, 2–3.
Panangpadur-as iti Bukod a Panagadal
Mangsapul kadagiti kinapudno iti ebanghelio. Iti nasantuan a kasuratan, no dadduma direkta a mailawlawag dagiti kinapudno iti ebanghelio; no dadduma mailadawanda babaen iti pagwadan wenno estoria. Saludsodem iti bagim, “Ania nga agnanayon a kinapudno ti maisuro kadagitoy a bersikulo?”
Parmeken ni Moises ni Satanas, ni Joseph Brickey