Nasaysayaat ngem iti Paraiso, ni Kendal Ray Johnson

Enero 17–23

Genesis 5; Moises 6

“Isuroyo a Siwawayawaya Dagitoy a Banag kadagiti Annakyo”

Bayat ti panangbasam ken panangutobmo iti Genesis 5 ken Moises 6, isuratmo dagiti naespirituan nga impresion a maawatmo. Ania dagiti mensahe a masarakam a napateg kenka ken ti pamiliam?

Isuratmo dagiti Impresionmo

Kaaduan ti Genesis 5 ti maysa a listaan dagiti kaputotan iti nagbaetan da Adan ken Eva ken ni Noe. Mabasatayo ti adu a nagan, ngem ditayo masursuro ti adu maipapan kadagitoy. Kalpasanna, mabasatayo maipapan ken ni Enoc, innem a kaputotan manipud ken ni Adan, nga isu ti nailadawan iti daytoy makaawis-imatang ngem saan a mailawlawag a binatog: “Ket nakipagna ni Enoc iti Dios: ket nagawan ta innala ti Dios” (Genesis 5:24). Sigurado nga adda estoria iti likudan dayta. Numan pay awan ti ad-adu pay a pannakailawlawag, agtultuloy ti listaan dagiti kaputotan.

Siyayaman, ipalgak ti Moises 6 dagiti detalye ti estoria ni Enoc—ken naindaklan nga estoria daytoy. Masursurotayo ti kinapakumbaba ni Enoc, dagiti saan a natalged a riknana, ti potensial a nakita ti Dios kenkuana, ken ti naindaklan a trabaho nga inaramidna kas propeta ti Dios. Magun-odtayo pay ti nalawlawag a ladawan iti pamilia da Adan ken Eva bayat ti panagdur-asna kadagiti henerasion. Mabasatayo ti “napigsa a panangituray” ni Satanas ngem dagiti pay nagannak a nangisuro kadagiti annak “iti wagas ti Dios” ken dagiti “mangaskasaba iti kinalinteg” a “nagsao ken nagipadto” (Moises 6:15, 21, 23). Nangnangruna a napateg a masursurotayo ket maipapan iti doktrina nga insuro ken inkasaba dagitoy a nagannak ken mangaskasaba: pammati, panagbabawi, panagbuniag, ken panangawat iti Espiritu Santo (kitaen iti Moises 6:50–52). Dayta a doktrina, kas iti priesthood a naikadua iti daytoy, “nga adda idi punganay [ken] addanto met laeng iti panungpalan ti lubong” (Moises 6:7).

Dagiti Kapanunotan para iti Bukod a Panagadal iti Nasantuan a Kasuratan

Moises 6:26–36

Ti propeta ket maysa a mammadto.

Bayat ti panagadalmo iti Moises 6:26–36, ania ti masursurom maipapan kadagiti mata, sipnget, ken panagkita? Iti panawen ni Enoc, asino ti saan a “makakita iti adayo”? Apay a saan a makakita dagitoy a tao iti kinapudno? Ania ti nakita ni Enoc? Ania ti nangbangon iti pammatim a mammadto dagiti propeta iti agdama nga aldaw ket ? (kitaen iti bersikulo 36; Pangiwanwan iti Nasantuan a Kasuratan, “Mammadto,” scriptures.ChurchofJesusChrist.org).

Moises 6:26–47

Awagannatayo ti Dios nga agaramid iti trabahona iti laksid dagiti pagkurangantayo.

Saan a gagangay a makarikna iti talipupos iti no ania ti nangawagan ti Dios nga aramidentayo. Uray idi inawagan ti Apo ni Enoc nga agbalin a maysa a propeta nakarikna met iti kasdiay. Bayat ti panangbasam iti Moises 6:26–36, sapulem no apay a narikna ni Enoc ti talipupos ken ania ti kinuna ti Apo a nangted kenkuana iti tured. Kadagiti bersikulo 37–47, sapulem dagiti wagas a nangsuportaran ti Apo ken ni Enoc ken nangpabileg kenkuana a nangaramid iti trabahona (kitaen met iti Moises 7:13). Mabalinmo nga idasig ti padas ni Enoc iti padas dagiti dadduma pay a propeta a nakarikna iti pagkurangan, kas kada Moises (kitaen iti Exodo 4:10–16), Jeremias (kitaen iti Jeremias 1:4–10), Nephi (kitaen iti 2 Nephi 33:1–4), ken Moroni (kitaen iti Ether 12:23–29). Ania ti mariknam a kayat ti Dios a masursurom manipud kadagitoy a nasantuan a kasuratan maipapan iti trabaho nga intedna kenka nga aramidem?

Kitaen met iti Jacob 4:6–8.

Moises 6:48–68

Ti doktrina ni Cristo ti sentro iti plano ti Dios iti pannakaisalakan.

Gapu ta addaantayo iti libro ni Moises, ammotayo a sursuruan ti Dios dagiti annakna no kasano ti mangsapul iti pannakapakawan ken pannakasubbot manipud pay idi punganay. Kadagiti nasantuan a kasuratan, maawagan dagitoy a pannursuro no dadduma iti doktrina ni Cristo? (kitaen iti 2 Nephi 31:13–21). Bayat ti panagadalmo iti Moises 6:48–68, sukisokem no ania ti nasken nga ammuen ken aramidentayo tapno masubbot. Mabalin a makatulong no isuratmo ti bukodmo a pakagupgopan ti insuro ni Enoc. Apay a napateg a maammuan a naisuron dagitoy a kinapudno manipud pay kadagidi aldaw da Adan ken Eva? Ania ti mariknam a makaparegta nga aramidem kas bunga ti panagadal kadagitoy a pannursuro?

Moises 6:51–62

“Isuroyo a siwawayawaya dagitoy a banag kadagiti annakyo.”

Nasursuruan da Adan ken Eva kadagiti napapateg a kinapudno ti ebanghelio ni Jesucristo. Ngem ilawlawag dagiti balikas ti Apo iti Moises 6:27–28 a kadagiti kaputotan sakbay ni Enoc, saanen nga agtungtungpal ti adu a tattao kadagita a kinapudno. Kinayat ti Apo nga isubli dagiti kinapudno a napukaw—kagiddan ti bilin nga immuna a naited ken ni Adan: “Isuroyo a siwawayawaya dagitoy a banag kadagiti annakyo” (Moises 6:58). Bayat ti panangbasam iti Moises 6:51–62, ania ti masursurom maipapan ken ni Jesucristo? Ania ti masarakam a naisangsangayan a napateg iti tumantanor a kaputotan? Ania iti maaramidmo a makatulong a mangipasa kadagitoy a kinapudno kadagiti masakbayan a kaputotan?

Nasken a sursuruan dagiti nagannak dagiti annakda iti ebanghelio.

Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening

Genesis 5; Moises 6:5–25, 46.Iti panangbasa maipapan iti “libro a pakalaglagipan” nga indulin da Adan ken Eva ti mabalin a mangparegta iti pamiliam a mangaramid iti bukodyo a libro a pakalaglagipan. Paglilinnawagan kas maysa a pamilia no ania ti kayatyo nga iraman. Nalabit nga addaankayo kadagiti ladawan, estoria, wenno dokumento manipud iti pakasaritaan ti pamiliayo. Mabalin a pilienyo nga iraman dagiti banag a mapaspasamak iti pamiliayo ita. Anianto ti maammuan dagiti masakbayan a kaputotan a napateg? Mabalinyo pay a paglilinnawagan no kasano a makatarabay kadagiti panagkagumaanyo dagiti ragup ti balikas a “babaen ti espiritu ti pammaregta” (Moises 6:5) ken “ti pagtuladan nga inted ti ramay ti Dios” (Moises 6:46). Ibilang ti panangi-save iti impormasion manipud iti librom a pakalaglagipan iti FamilySearch.org.

Moises 6:53–62.Kasano a sungbatantayo ti saludsod ni Adan a masarakan iti Moises 6:53? Ania dagiti sungbat a masarakantayo kadagiti bersikulo 57–62?

Moises 6:59.Ania ti kayat a sawen ti “pannakaipasngay manen iti pagarian ti langit”? Ania ti maaramidtayo tapno agtultuloytayo a maipasngay manen iti unos ti panagbiagtayo? Para iti tulong, kitaen iti Alma 5:7–14, 26; Pangiwanwan iti Nasantuan a Kasuratan, “Maipasngay Manen, Naipasngay iti Dios” scriptures.ChurchofJesusChrist.org; David A. Bednar, “Always Retain a Remission of Your Sins” (Liahona, Mayo 2016, 59–62).

Moises 6:61.Ania ti masursurotayo maipapan iti Espiritu Santo manipud iti daytoy a bersikulo?

Moises 6:63.Ania dagiti sumagmamano a banag a “mangipaneknek ken [Cristo]”? (kjitaen met iti 2 Nephi 11:4). Ibilang ti panangawis kadagiti miembro ti pamilia a mangibinglay iti maysa a banag a makitada “kadagiti langit iti ngato” wenno iti rabaw ti daga” a mangtulong kadakuada a mangsursuro maipapan ken ni Jesucristo. Kas pagarigan, kasano a mangipalagip kadatayo dagiti kayo, bato, wenno init maipapan iti Mangisalakan? Ania ti isuro kadatayo dagiti paulo a “danum a nabiag” ken “tinapay ti biag” maipapan Kenkuana? (Juan 4:10–14; 6:35).

Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.

Naisingasing a kanta: “I’ll Go Where You Want Me to Go,” Hymns, no. 270.

Panangpadur-as iti Bukod a Panagadal

Agsapul kadagiti simbolo. Kadagiti nasantuan a kasuratan, mabalin nga ibagi wenno isimbolo dagiti banag ken pasamak dagiti naespirituan a kinapudno. Mapabaknang dagitoy a simbolo ti pannakaawatmo iti doktrina. Kas pagarigan, ania ti masursurom manipud kadagiti simbolo ti mata ken pitak iti Moises 6:35?

Da Adan ken Eva a Mangisursuro kadagiti Annakda, ni Del Parson