“Enero 17–23. Genesis 5; Moises 6: ‘Isuroyo a Siwawayawaya dagitoy a Banag kadagiti Annakyo,’” Umaykayo, Sumurot Kaniak—Para iti Primary: Daan a Tulag 2022 (2021)
“Enero 17–23. Genesis 5; Moises 6,” Umaykayo, Sumurot Kaniak—Para iti Primary: 2022
Nasaysayaat ngem iti Paraiso, ni Kendal Ray Johnson
Enero 17–23
Genesis 5; Moises 6
“Isuroyo a Siwawayawaya dagitoy a Banag kadagiti Annakyo”
Mangrugi ti panagsaganam a mangisuro bayat ti panagadalmo iti Genesis 5 ken Moises 6. Bayat ti panangaramidmo, dumngeg kadagiti impresion manipud iti Espiritu Santo maipapan iti no ania ti kasapulan a sursuruen dagiti ubbing.
Isuratmo dagiti Impresionmo
Yawis ti Panagbibinninglay
iti babassit a papel, isuratmo ti sumagmamano a kangrunaan a balikas [keywords] a makatulong kadagiti ubbing a manglagip iti maysa a banag a nasursuroda iti pagtaengan itoy a lawas wenno iti napalabas nga adalen iti Primary. Pagsisinnublatem dagiti ubbing a mangala ti maysa a balikas a saanda a pilpilien. Kalpasan a napili ti maysa a balikas, awisem ti asino man kadagiti ubbing a mangibinglay iti maysa a banag a nasursuroda a mainaig iti dayta a balikas.
Isuro ti Doktrina: In-inaudi nga Ubbing
Matulongannak ti Dios nga agaramid kadagiti narigat a banag.
Idi naawagan ni Enoc a mangikasaba iti ebanghelio, nagdanag amangan no mapaay. Ngem tinulongan ti Dios a mangaramid kadagiti naindaklan a banag.
Dagiti Mabalin nga Aktibidad
-
Idawatmo kadagiti ubbing a mangibinglay iti maysa a gundaway idi naidawat kadakuada nga agaramid iti maysa a banag a narigat wenno nakabutbuteng kadakuada. Ibinglay ti estoria maipapan ti awag ni Enoc nga agbalin a maysa a propeta, a masarakan iti Moises 6:27, 31–34 (kitaen met iti “Ni Enoc a Propeta,” iti Dagiti Estoria iti Daan a Tulag). Yunay-unay a nupay di narikna ni Enoc a nakasagana nga agbalin a propeta, inkari ti Dios a tulonganna. Tulongam dagiti ubbing a makaawat iti sumagmamano a wagas a pangtulongan kadatayo ti Dios no maidawat nga agaramidtayo kadagiti narigat a banag.
-
Mangibinglay iti sumagmamano a pagarigan iti nasantuan a kasuratan idi tinulongan ti Dios dagiti tao nga agaramid kadagiti naririgat a banag—kas pagarigan, ni Noe a mangbangbangon iti daong, ni David a makirangranget ken ni Goliat, ni Ammon a mangsalsalaknib kadagiti arban ti ari, wenno ni Samuel a Lamanite a mangaskasaba. (Para kadagiti ladawan ken reperensia iti nasantuan a kasuratan, kitaen iti Libro ti Arte ti Ebanghelio, dagiti num. 7, 19, 78, 81.) Ibinglaymo ti maysa a padas idi tinulongannaka ti Apo nga agaramid ti maysa a narigat a banag.
Isuronak ti ebanghelio no kasano ti agsubli iti Nailangitan nga Ama.
Insuro ti Dios ni Adan no ania ti kasapulan nga aramidentayo nga agsubli Kenkuana—maaddaan iti pammati, agbabawi, mabuniagan, ken umawat iti sagut ti Espiritu Santo. Kasano a matulongam dagiti ubbing nga ad-adda a makasursuro maipapan kadagitoy a banag?
Dagiti Mabalin nga Aktibidad
-
Agsapul wenno agdrowing kadagiti ladawan a mangibagi iti pammati, panagbabawi. panagbuniag, ken ti sagut iti Espiritu Santo (kitaen iti panid ti aktibidad itoy a lawas). Ipuesto dagiti ladawan iti maysa a linia nga agturong iti maysa a ladawan ni Jesucristo. Ibasam ti Moises 6:52 kadagiti ubbing, ket pagtakderem ida iti abay ti umisu a ladawan no mangngeganda dagiti balikas nga ibagi ti ladawan (iti daytoy a bersikulo, mausar ti balikas a “mamati” para iti “pammati”).
-
Agkansion kadagiti kanta a mangisuro kadagiti pagbatayan iti Moises 6:52, kas iti “Faith,” “Help Me, Dear Father” (bersikulo 2), “When I Am Baptized,” ken “The Holy Ghost” (Children’s Songbook, 96–97, 99, 103, 105). Tulongam dagiti ubbing a makaawat a ti panagaramid kadagiti banag a naisuro kadagiti kanta ket makatulongto kadatayo nga agsubli iti Nailangitan nga Ama.
Kayat ti Nailangitan nga Ama nga isuro dagiti nagannak dagiti annakda.
Manipud idi panawen da Adan ken Eva, nabilin dagiti nagannak a mangisuro iti ebanghelio kadagiti annakda. Kasano a maallukoymo dagiti ubbing a dumngeg ken sumurot kadagiti nalinteg a pannursuro dagiti nagannakda?
Dagiti Mabalin nga Aktibidad
-
Ibasam ti Moises 6:58 kadagiti ubbing, ken ipakitam ti ladawan ti pamilia da Adan ken Eva iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia. Tulongam dagiti ubbing a mangulit iti ragup ti balikas nga “isuroyo a siwawayawaya dagitoy a banag kadagiti annakyo.” Ilawlawag a kayat ti Dios a suroten ti amin a nagannak ti pagwadan da Adan ken Eva babaen ti panangisuro kadagiti annakda maipapan ken ni Jesucristo ken ti ebangheliona. Saludsodem kadagiti ubbing no ania ti maaramidda no isuro kadakuada dagiti nagannakda wenno dagiti dadduma iti ebanghelio.
-
Tulongam dagiti ubbing a mangiparis kadagiti ladawanda kadagiti nagannakda wenno dagiti ladawan dagiti maladaga nga ayup kadagiti nataengan nga ayup. Kasano a tulongan dagiti nagannak dagiti annakda? Ania ti isuroda kadakuada? Idawat kadagiti ubbing nga agdrowing kadagiti ladawan ti pamiliada kadagiti panawen nga isuro dagiti nagannak dagiti annak, kas iti aggigiddan a panagbasa kadagiti nasantuan a kasuratan, aggigiddan a panagkararag, wenno aggigiddan a pannangan.
Ladawanpamilia nga agad-adal kadagiti nasantuan a kasuratanNasken a sursuruan dagiti nagannak dagiti annakda iti ebanghelio.
Isuro ti Doktrina: In-inauna nga Ubbing
Matulongannak ti Dios a mangaramid kadagiti naririgat a banag.
Nupay adda pagkurangan a narikna ni Enoc, tinulongan ti Dios nga ipatungpalna ti pagrebbenganna a kas maysa a propeta. Matulongan met ti Dios dagiti ubbing a sursuruam a mangaramid kadagiti naririgat a banag.
Dagiti Mabalin nga Aktibidad
-
Basaem ti Moises 6:26–34 kaduam dagiti ubbing. Apay a narikna ni Enoc a saanna a maikasaba ti ebanghelio? (kitaen iti Moises 6:31). Kasano a tinulongan ti Dios ni Enoc? (kitaen iti Moises 6:32–34; 7:13).
-
Awisem dagiti ubbing a manginagan iti sumagmamano a narigat a banag nga aramiden no dadduma dagiti ubbing a katawenda (kas iti panangileppas iti naituding nga aramiden iti pagadalan, panagbalin a naasi iti maysa a tao a naulpit, wenno panangibaga iti kinapudno no nakaaramidda iti biddut). Tulongam dagiti ubbing a mangsapul kadagiti ragup ti balikas iti Moises 6:32–34 a makatulong kadakuada. Kiddawem kadagiti ubbing a mangibinglay iti maysa a gundaway idi tinulongan ida ti Dios nga agaramid iti maysa a banag a narigat. Ibinglaymo met dagiti bukodmo a padas.
Ti pammati, panagbabawi, panagbuniag, ken panangawat iti Espiritu Santo ti mangisagana kaniak nga agsubli iti Dios.
Insuro da Adan ken Enoc dagiti taoda kadagiti umuna a pagbatayan ken ordinansa ti ebanghelio: pammati, panagbabawi, panagbuniag, ken panangawat iti sagut ti Espiritu Santo (kitaen iti Pagannurotan ti Pammati 1:4). Ania ti aramidem tapno matulongam dagiti ubbing a makaawat iti kinapateg dagitoy a pagbatayan ken ordinansa iti biagda?
Dagiti Mabalin nga Aktibidad
-
Idawatmo kadagiti ubbing a mangbasa iti Moises 6:52,57 a mangsapul kadagiti pagbatayan ken ordinansa ti ebanghelio a nadakamat iti maikapat a pagannurotan ti pammati.
-
Isurat ti maikapat a pagannurotan ti pammati iti pisarra, ken awisem dagiti ubbing a mangbasa iti daytoy. Kalpasanna pugasem ti maysa wenno dua a balikas, ket pabasam manen kadakuada, a mangpumpunno kadagiti awan a balikas manipud iti memoria. Ulitem daytoy a proseso agingga a nasursuron dagiti ubbing ti pagannurotan ti pammati.
-
Awisem dagiti ubbing a mangisurat iti maysa nga ababa a bitla maipapan iti pammati, panagbabawi, panagbuniag, wenno panangawat iti sagut ti Espiritu Santo—maysa a banag a mabalinda nga ibinglay kadagiti pamiliada. Iraman ti tunggal bitla ti maysa a nasantuan a kasuratan, maysa a padas ken maysa a pammaneknek. Mailawlawag pay ti bitla no kasano a makatulong kadatayo ti pagbatayan a makasubli iti Nailangitan nga Ama.
Pagrebbengan dagiti nagannak nga isuro dagiti annakda.
Agtalek ti Dios kadagiti nagannak nga agbalin a kangrunaan a mannursuro iti ebanghelio iti pamiliada. Kasano a maparegtam dagiti ubbing a mangtulong kadagiti nagannakda iti daytoy nga akem?
Dagiti Mabalin nga Aktibidad
-
Kiddawem iti maysa nga ubing a mangbasa iti Moises 6:58. Ania ti bilin nga inted ti Nailangitan nga Ama kadagiti nagannak itoy a bersikulo? Mangipakita iti maysa a ladawan da Adan ken Eva a mangisursuro kadagiti annakda (kitaen iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia), ket paisaritam kadagiti ubbing no ania ti makitada iti ladawan. Allukoyem ida a mangisarita maipapan kadagiti napapateg a kinapudno iti ebanghelio a nasursuroda manipud iti pamiliada.
-
Tulongam dagiti ubbing nga agsurat kadagiti surat a pagyaman (thank-you notes) kadagiti nagannakda wenno mangplano kadagiti simple a wagas a pangyebkasanda iti panangyamanda kadagiti nagannakda. Agkansion iti maysa a kanta maipapan kadagiti pamilia, kas iti “Love Is Spoken Here” (Children’s Songbook, 190–91). Kasano a matulongantayo dagiti nagannaktayo a mangipasdek iti naayat nga aglawlaw kadagiti pagtaengantayo?
Yallukoy ti Panagsursuro iti Pagtaengan
Kasano a matulongam dagiti ubbing nga agtultuloy nga agsursuro iti ruar ti klase? Mabalinmo nga allukoyen ida a manglagip iti estoria ni Enoc no maipasangoda iti maysa a banag a narigat itoy a lawas.
Panangpadur-as iti Panangisurotayo
Usarem dagiti panid ti aktibidad. Bayat ti panangkolor dagiti ubbing kadagiti panid ti aktibidad, irebyu dagiti pagbatayan manipud iti adalen. Ibasa dagiti balikas iti panid kadagiti ubbing no kasapulan.