“Enero 24–30. Moises 7: ‘Ninaganan ti Apo dagiti Taona iti Zion’” Umaykayo, Sumurot Kaniak—Para iti Primary: Daan a Tulag 2022 (2021)
“Enero 24–30. Moises 7,” Umaykayo, Sumurot Kaniak—Para iti Primary: 2022
Aggiinnayatkayo, ni Emma Donaldson Taylor
Enero 24–30
Moises 7
“Ninaganan ti Apo dagiti Taona iti Zion”
Irugim ti panagsaganam babaen ti panangbasa iti Moises 7. Makatulong tiUmaykayo, Sumurot Kaniak—Para kadagiti Indibidual ken Pamilia a mangipaawat kenka iti daytoy a kapitulo, ken makaited kenka dagiti kapanunotan iti baba kadagiti ideya maipapan no kasano nga isuro daytoy kadagiti ubbing.
Isuratmo dagiti Impresionmo
Yawis ti Panagbibinninglay
Usarem iti sumagmamano a minuto a mangrebyu a kaduam dagiti ubbing no ania ti ammoda maipapan iti propeta a ni Enoc—agraman ti ania man a banag a nasursuroda iti adalen itay napalabas a lawas. No daytoy timakatulong, ipakitam ti maysa a ladawan manipud iti balabala ita a lawas iti Umaykayo, Sumurot Kaniak—Para kadagiti Indibidual ken Pamilia.
Isuro ti Doktrina: In-inaudi nga Ubbing
Kayat ti Dios nga agiinnayattayo.
Iladawan dagitoy a bersikulo dagiti kababalin ti tattao ti Zion. Kasano a matulongam dagiti ubbing a mangirugi a mangpadur-as kadagitoy a kababalin?
Dagiti Mabalin nga Aktibidad
-
Ibinglay ti estoria dagiti tao ni Enoc manipud iti “Ni Prpeta Enoc” (iti Dagiti Estoria iti Daan a Tulag),wenno paisaritam kadagiti ubbing ti estoria iti bukodda a balikas nga usarenda ti ladawan ni Enoc iti balabala iti daytoy a lawas iti Umaykayo, Sumurot Kaniak, Para kadagiti Indibidual ken Pamilia. Mabalinmo pay ti makipagkanta kadagiti ubbing iti maikadua a bersikulo ti “Follow the Prophet” (Children’s Songbook, 110–11) a mangrebyu iti estoria.
-
Tulongam dagiti ubbing nga agpanunot kadagiti tignay a mainaig iti ragup dagiti balikas a “sangsangkamaysa ti puso ken panunotda” (Moises 7:18). Ilawlawagmo a daytoy ragup ti balikas kayatna a sawen a nagiinnayat dagiti tao ni Enoc ken nagkikinnaasida. Awisem ida a mangusar iti panid ti aktibidad itoy a lawas nga agdrowing iti maysa a wagas a pangipakitaanda iti ayat.
-
Agkansion ti maysa a kanta maipapan iti panagiinnayat, kas iti “Love at Home” (Hymns, no. 294). Mangitugot kadagiti ladawan a mangiladawan kadagiti kangrunaan a ragup ti balikas iti kanta a mangtulong kadagiti ubbing a makasursuro kadagiti balikas. Idawat kadagiti ubbing a mangibinglay kadagiti wagas a pangipakitaanda iti panagiinnayat iti Primary ken iti pagtaenganda. Kalpasanna payakemmo kadakuada dagiti kapanunotanda.
Nasken nga ikarigatantayo ti agbalin a “sangsangkamaysa ti puso ken panunot” (Moises 7:18).
Maseknan ti Dios kadagiti annakna.
Matulongam dagiti ubbing a makasursuro a maseknan unay ti Nailangitan nga Ama ken ni Jesucristo kadatayo ken kadagiti aramidtayo.
Dagiti Mabalin nga Aktibidad
-
Tulongam dagiti ubbing a mangpanunot kadagiti banag a mangparagsak iti Nailangitan nga Ama. Basaem ti Moises 7:28 a kaduam dagiti ubbing, ket ilawlawagmo a nagliday ti Nailangitan nga Ama gapu ta napalalo unay ti kinadangkes dagiti tao (kitaen kadagiti bersikulo 32–33).
-
Paidrowingmo kadagiti ubbing ti maysa a naragsak a rupa iti maysa a bangir ti maysa a papel ken maysa a naliday a rupa iti sabali a bangir. Manginagan iti sumagmamano a nasayaat nga aramid, kas iti panagkararag, ken sumagmamano a saan a nasayaat, a kas iti panagulbod, ken idawat kadagiti ubbing a mangingato iti naragsak a rupa wenno naliday a rupa a mangipakita no kasano ti rikna ti Nailangitan nga Ama ken ni Jesucristo maipapan iti tunggal pili.
-
Awisem dagiti ubbing nga agay-ayam iti maysa a game a pangyaktuanda kadagiti banag a mabalinda nga aramiden a mangparagsak iti Nailangitan nga Ama. Kiddawem kadagiti dadduma pay nga ubbing a pugtuanda no ania ti ar-aramidenda. Mangibinglay iti tunggal maysa kadagiti ubbing ti maysa a banag a nakitam nga inaramidda a mangparagsak iti Nailangitan nga Ama.
Agsublinto ni Jesus ditoy daga.
Iti parmatana, nakita ni Enoc ti ud-udina nga al-aldaw, agraman ti Maikadua a Yaay ti Mangisalakan. Kasano a matulongam dagiti ubbing a mangpasungad iti Maikadua a Yaay?
Dagiti Mabalin nga Aktibidad
-
Paginkukunaen dagiti ubbing a maysa nga espesial a sangaili ti umay mangsarungkar kadakuada. Ania ti aramidenda nga agsagana para iti panagsarungkar? Ibinglay dagiti balikas ti Apo ken ni Enoc iti Moises 7:60: “Umayak[to] kadagiti maudi nga aldaw.” Ania ti sumagmamano a wagas a pakapagsaganaantayo para iti yaay manen ni Jesus?
-
Mangipakita kadagiti ladawan dagidi panawen a nagparang ti Mangisalakan kadagiti tao (kitaen iti Libro ti Arte ti Ebanghelio, dagiti num. 60, 82, 83, ken 84). Ania ti ar-aramiden dagiti tao nga adda kadagiti ladawan? Kasano ti mabalin a narikna dagiti tattao idi naam-ammoda ni Jesus? Paibinglaymo kadagiti ubbing no kasano ti mariknada no makitada ni Jesucristo iti yaayna manen.
-
Agkansion iti maysa a kanta maipapan iti Maikadua a Yaay ti Mangisalakan, kas iti “When He Comes Again” (Children’s Songbook, 82–83), ken saludsodem kadagiti ubbing no anianto ti panunotenda no umayto manen ni Jesus.
Isuro ti Doktrina: In-inauna nga Ubbing
Makapagkaykaysatayo a kas dagiti tao ti Zion idi.
Bayat ti panangbasam maipapan iti Zion, panunotem dagiti pagarigan ti panagkaykaysa a nakitamon. Kasano a matulongam dagiti ubbing a masursuroda ti agbalin nga agkaykaysa a kas kadagiti tao ni Enoc idi?
Dagiti Mabalin nga Aktibidad
-
Kiddawem kadagiti ubbing a mangsapul kadagiti balikas a mangiladawan kadagiti tattao ni Enoc, maam-ammo pay a kas Zion, bayat ti panangbasada iti Moises 7:18. Isuratmo dagitoy a balikas kas paulo iti ngato ti pisarra, ket awisem dagiti ubbing nga isuratda, iti baba ti tunggal paulo, dagiti banag a maaramidda tapno agbalinda nga ad-adda a kas kadagiti tao ni Enoc. Kalpasan nga ibinglayda, saludsodem kadagiti ubbing no kasano a mapagbalinda ti pagtaenganda nga ad-adda a kas iti Zion. Mabalinda pay ti mangsapul iti sumagmamano a kapanunotan iti 4 Nephi 1:15–18.
-
Idawatmo kadagiti ubbing no namin-ano a makita ti balikas a “Zion” iti Moises 7:18–21, 62–63, 68–69. Tunggal makita ti balikas, tulongam dagiti ubbing nga ilasinda no ania ti ibaga ti bersikulo maipapan iti Zion (kitaen met iti Pangiwanwan iti Nasantuan a Kasuratan, “Zion,” scriptures.ChurchofJesusChrist.org). Kasano nga agbalintayo nga ad-adda a kas dagiti tattao a nailadawan kadagitoy a bersikulo?
-
Usarem ti panid ti aktibidad iti daytoy a lawas a mangtulong kadagiti ubbing nga agpanunot maipapan kadagiti wagas a pakapagbalinanda a “sangsangkamaysa ti puso ken panunot” (kitaen iti Moises 7:18)
Agsangit ti Dios para kadagiti annakna.
Kasano a matulongam dagiti ubbing a mangtakuat nga ipatpategnatayo ti Dios ken dagiti aramidtayo?
Dagiti Mabalin nga Aktibidad
-
Saludsodem kadagiti ubbing no ania ti mabalin a makaigapu ti panagsangit ti Dios (kitaen ti Moises 7:28–31). Awisem dagiti ubbing a mangsukisok iti Moises 7:32–33, 37 para kadagiti sungbat. Ania ti isuro kadatayo dagitoy a bersikulo maipapan no kasano ti rikna ti Dios dagiti annakna? Kasano a maammuantayo nga ay-ayatennatayo ti Dios? Ibinglaymo ti pammaneknekmo maipapan ti ayat ti Dios para kadatayo.
-
Ipasippaw ti maysa a bean bag wenno maysa a bola iti maysa nga ubing. Idawat kenkuana nga ileppasna ti ragup ti balikas “Maparagsakko ti Dios babaen iti …” ket kalpasanna ipasippawna ti banag iti sabali pay nga ubing. Uliten agingga a naaddaanen ti tunggal ubing iti batang.
Umayto manen ni Jesucristo kadagiti maudi nga aldaw.
Bayat ti panangbasam maipapan iti Maikadua a Yaay iti Moises 7:60–67, panunotem no kasano nga isuro kadagiti ubbing maipapan iti daytoy iti naragsak a wagas.
Dagiti Mabalin nga Aktibidad
-
Aggigiddan a basaen ti Moises 7:60–67, ket tulongam dagiti ubbing nga ilasinda dagiti banag a kuna ti Apo a mapasamakto kadagiti maudi nga aldaw. Saludsodem kadakuada no ania kadagitoy a pasamak ti padpadaananda ken apay?
-
Awisem dagiti ubbing nga agsarita maipanggep iti maysa a panawen idi nagurayda iti maysa a tao a sumarungkar wenno agawid iti pagtaengan. Kasano ti rikna dagiti ubbing? Ania ti inaramidda tapno agsagana? Kasano a makapagsaganatayo tapno makitatayo manen ni Jesus?
-
Ipakitam ti maysa a ladawan ti Maikadua a Yaay ti Mangisalakan (kas pagarigan, kitaen iti Libro ti Arte ti Ebanghelio, num. 66). Pagdrowingem dagiti ubbing iti bukodda a ladawan ti Maikadua a Yaay, a maibatay iti no ania ti nabasada iti Moises 7:60–67.
Yallukoy ti Panagsursuro iti Pagtaengan
Kasano a maallukoymo dagiti ubbing ken dagiti pamiliada nga agtultuloy nga agsursuro manipud iti Daan a Tulag iti pagtaengan? Kas pagarigan, mabalin nga ibinglay dagiti ubbing ti maysa a banag a drinowing wenno kinoloranda iti Primary kas paset ti maysa a lesson iti home evening.
Panangpadur-as iti Panangisurotayo
Tulongam dagiti ubbing nga agbalin nga aktibo. “Kabayatan ti panangisurom kadagiti ubbing, bay-am ida nga agaramid, agdrowing, agkolor, agsurat, ken agpartuat. Dagitoy a banag ti ad-adda pay ngem dagiti naragsak nga aktibidad—napategda iti panagsursuro” (Panangisuro iti Wagas ti Mangisalakan, 25).