“Enero 31–Pebrero 6. Genesis 6–11; Moises 8: ‘Ni Noe Nasarakanna ti Parabur kadagiti Mata ni Jehova,’” Umaykayo, Sumurot Kaniak—Para iti Primary: 2022 (2021)
“Enero 31–Pebrero 6. Genesis 6–11; Moises 8,” Umaykayo, Sumurot Kaniak—Para iti Primary: 2022
Ladawan ni Noe a pumampanaw iti daong, ni Sam Lawlor
Enero 31–Pebrero 6
Genesis 6–11; Moises 8
“Ni Noe Nasarakanna ti Parabur kadagiti Mata ni Jehova”
Ti panagsursuro maipapan kadagiti ayup iti daong ni Noe ken ti natayag a Torre ti Babel ket mabalin a naragsak para kadagiti ubbing. Ngem laglagipenyo a nairanta dagitoy nga estoria a mangisuro kadagiti agnanayon a kinapudno. Sikakararag nga ibilang dagitoy a kinapudno a kayat ti Dios a masursuro dagiti ubbing.
Isuratmo dagiti Impresionmo
Yawis ti Panagbibinninglay
Sakbay nga irugim nga isuro dagiti estoria iti Genesis 6–11 ken Moises 8 kadagiti ubbing, ikkam ida ti maysa gundaway nga isuro ti tunggal maysa no ania ti ammoda maipapan ken ni Noe ken ti daong wenno ti Torre ti Babel.
Isuro ti Doktrina: In-inaudi nga Ubbing
Genesis 6:14–22; 7–8; Moises 8:16–30
Ti panangsurot iti propeta ti mangbendisionto kaniak ken ti pamiliak.
Kabayatan ti panagsursuro dagiti ubbing a mangsurot iti propeta, mabendisionan ken agtalinaeddanto a naespirituan a natalged, kas iti pamilia ni Noe a nagtalinaed a natalged manipud iti Layus.
Dagiti Mabalin nga Aktibidad
-
Iti bukodmo a balikas, isaritam ti estoria ni Noe ken ti daong (kitaen iti “Ni Noe ken ti Pamiliana,” iti Dagiti Estoria iti Daan a Tulag; kitaen met iti “Follow the Prophet,” Children’s Songbook, 110–11, bersikulo 3). Tulongam dagiti ubbing a mangyakem kadagiti paset ti estoria—kas pagarigan, babaen iti panagpammarang nga usaren ti maysa a ramit a mangbangon iti daong wenno pannagna a kas kadagiti ayup a sumsumrek iti daong.
-
Ibasam kadagiti ubbing ti Moises 8:19–20, a mangyunay-unay no ania ti imbilin ti Apo nga aramiden ni Noe. Tulongam dagiti ubbing a makaawat a maysa a propeta ni Noe ken naisalakan ti pamiliana manipud iti Layus gapu ta simmurotda kenkuana. Saludsodem kadagiti ubbing no am-ammoda no siasino ti propetatayo ita. Ipakitam ti maysa a ladawanna, ket tulongam dagiti ubbing nga uliten ti naganna.
-
Mangitugot iti klase kadagiti ladawan wenno banag a mangibagi kadagiti pannursuro ti agdama a propeta, a kas kadagiti nasantuan a kasuratan wenno ladawan ti maysa a templo. Pagsisinnublatem dagiti ubbing a mangpili iti maysa nga aytem ket mangibaga no ania ti ammoda maipapan iti daytoy. Ilawlawag kadakuada no ania ti ibagi ti aytem. Allukoyem ida nga agdrowing iti maysa a ladawan ti bagbagida nga agtultulnog no ania ti insuro ti propeta. Paneknekam ti maipapan kadagiti bendision iti panangsurot iti propeta.
Tungpalento ti Dios dagiti karina kadatayo.
Napateg a maammuan dagiti ubbing a tungpalen ti Dios dagiti karina, nangnangruna kabayatan ti panagsaganada nga agaramid kadagiti katulagan Kenkuana inton mabuniaganda.
Dagiti Mabalin nga Aktibidad
-
Awisem dagiti ubbing nga agdrowing kadagiti ladawan ti bullalayaw. Ibasam kadakuada ti Genesis 9:15–16, ket idawat kadakuada a dumngeg iti balikas a laglagipem. Awisem ida nga ingatoda dagiti bullalayawda no mangngegda ti balikas. Ilawlawag a dagiti bullalayaw ti mangipalagip kadagiti kari nga inaramid ti Dios kadatayo.
-
Isaritam kadagiti ubbing maipapan iti sumagmamano a kari ti Dios —kas pagarigan, makapagsublitayo iti Nailangitan nga Ama no surotentayo ni Jesucristo wenno ipatulodto ti Dios ti Espiritu Santo a mangliwliwa kadatayo. Ibinglaymo ti pammaneknekmo a kanayon a tungtungpalen ti Dios dagiti karina.
-
Usarem dagiti ladawan a mangibaga kadagiti ubbing maipapan kadagiti katulagan nga aramidentayo iti Dios, kas kadagiti ladawan ti maysa nga ubing a mabunbuniagan, ti sakramento, ken maysa a templo (kitaen iti Libro ti Arte ti Ebanghelio, blg. 104, 108, 120).
Ti panangsurot ken ni Jesucristo ti kakaisuna a wagas tapno makadanon iti langit.
Impagarup dagiti tao ti Babel a makadanonda iti langit babaen iti panangbangon iti maysa a torre imbes a babaen ti panagbiag iti ebanghelio ni Jesucristo. Kasano a matulongam dagiti ubbing a makaawat a ti panangsurot iti Mangisalakan ket isu laeng ti wagas tapno makasublitayo iti Nailangitan nga Ama.
Dagiti Mabalin nga Aktibidad
-
Isaritam ti estoria maipapan iti Torre ti Babel kadagiti bukodmo a balikas, wenno basaem ti estoria a masarakan iti “Ti Torre ti Babel” (iti Dagiti Estoria iti Daan a Tulag). Allukoyem dagiti ubbing a tulongandaka babaen iti panangibinglayda no ania ti ammoda maipapan iti estoria.
Ladawanpannakailadawan ti torre ti BabelLadawan ti Torre ti Babel, ni David Green
-
Pagaramidem dagiti ubbing iti maysa a torre manipud kadagiti bloke wenno sabali a banag. Kalpasanna ipakitam kadagiti ubbing ti maysa a ladawan ti Mangisalakan, ket damagem kadakuada no ania ti wagas tapno makasubli iti Nailangitan nga Ama—panangbangon iti maysa a torre wenno panangsurot ken ni Jesucristo? Paisaritam kadagiti ubbing maipapan kadagiti banag a mabalinda nga aramiden a sumurot iti Mangisalakan.
Isuro ti Doktrina: In-inauna nga Ubbing
Genesis 6:14–22; 7–8; Moises 8:16–30
Ti panangsurot iti propeta ti mangbendisionto kaniak ken ti pamiliak.
Dumakdakkel dagiti ubbing iti nadangkes a lubong, maipada iti sumagmamano a wagas iti lubong idi panawen ni Noe. Makaited kadakuada ti padas ni Noe iti panagtalek a makasarakda ti naespirituan a kinatalged no surotenda ti propeta.
Dagiti Mabalin nga Aktibidad
-
Tulongam dagiti ubbing a mangpili kadagiti bersikulo manipud iti Genesis 6:14–22; 7–8 a mabalin nga iladawanda iti maysa a drowing. Usarem dagiti drowingda a mangisuro kadakuada iti estoria ni Noe. Kiddawen kadagiti ubbing a mangibinglay no ania ti nasursuroda manipud iti estoria.
-
Ipakitam ti maysa a ladawan ni Noe (kitaen iti Libro ti Arte ti Ebanghelio, dagiti num. 7–8) ken ti agdama a propeta. Tulongam dagiti ubbing a mangsukisok iti Moises 8:16, 19–20, 23–24 tapno mangsapul kadagiti banag nga insuro ni Noe nga isursuro pay laeng dagiti lidertayo iti Simbaan ita. Kasano a mabendisionantayo no tungpalentayo dagitoy a pannursuro?
-
Ibinglaymo ti maysa banag nga insuro ti agdama a propeta iti nabiit pay. Kiddawem kadagiti ubbing a mangisurat iti maysa a banag nga insuro ti propeta iti babassit a papel, ket tulongam ida a mangurnos kadagiti papel iti sukog ti maysa a daong. Kasano a maipada dagitoy a pannursuro iti daong nga inaramid ni Noe?
Kasapulan a laglagipentayo dagiti katulagantayo.
No mabuniagantayo, makitulagtayo iti Dios nga agtungpal kadagiti bilinna. Iti Genesis 9:15–17, mabigbig ti bullalayaw kas maysa a pangipalagip iti katulagan iti Dios. Makaparegta dagitoy a bersikulo kadagiti ubbing nga agsapul kadagiti wagas a manglagip kadagiti katulaganda iti Dios.
Dagiti Mabalin nga Aktibidad
-
Ipakitam kadagiti ubbing ti maysa a banag nga adda kenka a mangipalagip kenka iti maysa a banag a napateg iti biagmo, kas iti maysa singsing ti kallaysa, maysa a ladawan, wenno maysa a journal. Awisem dagiti ubbing a mangibinglay kadagiti bukodda a pagarigan. Aggigiddan a mangbasa ti Genesis 9:15–17 (kitaen met iti Patarus ni Joseph Smith, Genesis 9:21–25 [iti Pangiwanwan iti Nasantuan a Kasuratan]). Ania ti kayat ti Nailangitan nga Ama a panunotentayo no makakitatayo iti maysa a bullalayaw?
-
Ipalagipmo kadagiti ubbing dagiti katulagan nga inaramidda idi nabuniaganda ken pabaruenda iti tunggal kanito nga umawatda iti sakramento (kitaen iti Mosiah 18:8–10; Doktina ken Katulagan 20:77, 79). Pagdrowingem wenno pagaramidem dagiti ubbing iti maysa a banag a mangipalagip kadakuada kadagiti katulaganda.
Ti panangsurot ken ni Jesucristo ti kakaisuna a wagas tapno makadanon iti langit.
Idinto a mabalin a saan a padasen dagiti tao ita ti agaramid kadagiti torre tapno dumanon iti langit, adu ti mangpadas nga agsapul iti talna ken ragsak babaen iti panangsurot kadagiti dana a maisabali iti maysa nga impasdeken ni Jesucristo. Kasano a mabalinmo nga usaren ti estoria ti Torre ti Babel a mangisuro iti daytoy a pagbatayan?
Dagiti Mabalin nga Aktibidad
-
idawatmo kadagiti ubbing a mangibinglay no ania ti ammoda maipapan iti estoria ti Torre ti Babel (kitaen iti Genesis11:1–9). Segun iti Helaman 6:28, apay a nangbangon iti torre dagiti tao ti Babel? Apay a ti panangbangon iti daytoy a torre ket ti biddut a dalan tapno dumanon iti langit? Ania a ballaag ti itedtayo koma kadagiti tao ti Babel?
-
Awisem dagiti ubbing a mangsukisok iti 2 Nephi 31:20–21 ken Helaman 3:28 a mangsapul iti pudno a dalan tapno dumanon iti langit. Iburaymo ti pammaneknekmo iti Mangisalakan a ni Jesucristo.
Yallukoy ti Panagsursuro iti Pagtaengan
Awisem dagiti ubbing a mangpanunot kadagiti wagas a pangisuruandanto iti pamiliada maipapan kadagiti estoria a nasursuroda iti Primary. Kas pagarigan, mabalinda nga usaren dagiti ladawan a drinowingda wenno ti panid ti aktibidad iti daytoy a lawas.
Panangpadur-as iti Panangisurotayo
Ikalikagum a maawatam dagiti ubbing a sursuruam. Bayat ti panangisurom kadagiti ubbing, nangnangruna nga ikasom dagiti saludsodda, dagiti masaoda, ken dagiti estoria wenno pagbatayan a kasla naisangsangayan ti pategda kadakuada. Ti panangammo kadagitoy a banag ti mangtulongto kenka nga agpokus kadagiti kasapulanda.