“Pebrero 7–13. Genesis 12–17; Moises 1–2: ‘Tapno Agbalin a Nain-indaklan a Pasurot ti Kinalinteg,’” Umaykayo, Sumurot Kaniak—Para iti Primary: Daan a Tulag 2022 (2021)
“Pebrero 7–13. Genesis 12–17; Abraham 1–2,” Umaykayo, Sumurot Kaniak—Para iti Primary: 2022
Ladawan da Abraham ken Sara, ni Dilleen Marsh
Pebrero 7–13
Genesis 12–17; Abraham 1–2
“Tapno Agbalin a Nain-indaklan a Pasurot ti Kinalinteg”
Laglagipenyo a saan a kasapulan—wenno mabalin—nga isuro ti amin a banag iti daytoy a balabala. Agpaiwanwanka iti Espiritu kadagiti pagbatayan ken aktibidad nga agbalinto a kapatgan unay kadagiti ubbing a sursuruam.
Isuratmo dagiti Impresionmo
Yawis ti Panagbibinninglay
Naawis ti pamilia dagiti ubbing a sursuruam tapno sursuruenda maipapan kada Abraham ken Sara iti daytoy napalabas a lawas. Ikkam dagiti ubbing ti gundaway a mangibinglay iti maysa a banag nga ammoda maipapan ken ni Abraham wenno ni Sara.
Isuro ti Doktrina: In-inaudi nga Ubbing
Makibinnak ni Jesucristo.
Tinarigagayan ni Abraham ti agbalin a nalinteg nupay nadangkes dagiti miembro ti pamiliana. Kinuna ti Apo kenkuana, “Iturongkanto babaen ti imak” (Abraham 1:18). Kas iti inkari ti Dios a tumulong ken ni Abraham, maiturongna dagiti ubbing a sursuruam no tarigagayanda a pilien ti rumbeng.
Dagiti Mabalin nga Aktibidad
-
Ibasam kadagiti ubbing ti Abraham 1:18 ken 2:8, ket awisem dagiti ubbing a dumngeg iti maysa a paset ti bagi a nadakamat iti agpada a bersikulo. Kasano koma ti rikna ti kaadda ni Jesucristo a mangiturong kadatayo babaen ti ima wenno iti imana mangsalsalaknib kadatayo? Paneknekam nga iturongnatayo ni Jesus babaen ti Espirituna.
-
Usarem ti “Da Abraham ken Sara” (iti Dagiti Estoria iti Daan a Tulag) a mangtulong kadagiti ubbing a makaawat a dagiti tao iti aglawlaw ni Abraham ket agar-aramid kadagiti dakes a banag, ngem tinarigagayan ni Abraham nga aramiden ti rumbeng ket tinulongan ti Apo. Kasano a tulongannatayo ti Nailangitan nga Ama ken ni Jesucristo no padasentayo a pilien ti rumbeng? Agkansion iti maysa a kanta maipapan iti daytoy a pagbatayan, kas iti “Teach Me to Walk in the Light” (Children’s Songbook, 177).
-
Ipakitam ti sumagmamano a ladawan ti Mangisalakan (kitaen iti Libro ti Arte ti Ebanghelio, dagiti num. 38, 39, 40, ken 41), ket tulongam dagiti ubbing a makakita kadagiti banag nga inaramidna babaen kadagiti imana. Ania ti maaramidtayo kadagiti imatayo a mangtulong iti dadduma?
Makapagbalinak a mamagkappia.
Idi adda di pagkikinnaawatan dagidi agay-aywan iti animal ni Abraham ken dagiti agay-aywan iti animal ni Lot iti daga a pagpapaarabanda, insingasing ni Abraham ti maysa a solusion a nangyeg iti kappia. Mausarmo daytoy a pagwadan a mangparegta kadagiti ubbing tapno agbalinda a mamagkakappia.
Dagiti Mabalin nga Aktibidad
-
Ibinglay kadagiti ubbing ti estoria manipud iti Genesis 13:5–12, ket awisem ida a mangyakem iti daytoy. Pagsisinnublatem dagiti ubbing nga agpammarang a kas ken ni Abraham, ti kaanakanna a ni Lot, ken dagiti agay-aywan iti animal. Mangisingasing kadagiti wagas a mabalinda a suroten ti pagwadan ni Abraham a kas maysa a mamagkappia, kas iti pannakisinnublat iti maysa nga ay-ayam no makiay-ayam iti maysa a gayyem. Awisem ida a mangyakem kadagitoy a pagwadan.
-
Basaem ti Mateo 5:9, ket ilawlawag a kayat ni Jesus nga agbalintayo a mamagkappia. Tulongam dagiti ubbing nga agpanunot no ania ti maaramidda a mamagkappia iti pagtaenganda wenno kadagiti gagayyemda. Awisem ida nga agdrowing iti ladawan ti bagbagida a kas maysa a mamagkappia. Kiddawem kadagiti ubbing a mangibinglay iti riknada no mamagkappiada a kas ken ni Jesucristo.
Genesis 15:1–6; 17:1–8; Abraham 2:9–11
Nasken a tungpalek dagiti karik.
Ti panagsursuro maipapan iti katulagan nga inaramid ti Dios kada Abraham ken Sara ti makatulong kadagiti ubbing a makaawat iti kaipapanan ti agtungpal kadagiti kari. Matulonganna pay ida nga agsagana a mangaramid ken agtungpal kadagiti katulagan.
Dagiti Mabalin nga Aktibidad
-
Saludsodem kadagiti ubbing no ammoda no ania ti kari wenno katulagan. Awisem ida a mangibinglay kadagiti padas idi nagkarida wenno maysa a tao ti nagkari kadakuada. No makatulong, mangibinglay iti sumagmamano a bukodmo a pagwadan. Tulongam dagiti ubbing a makaawat a nagkari da Abraham ken Sara iti Dios. Pumilika iti sumagmamano a ragup ti balikas manipud iti Genesis 15:1–6; 17:1–8; Abraham 2:9–11 a mangibinglay iti sumagmamano kadagiti bendision nga inkari ti Dios kadakuada. Mabalin a mairaman dagitoy “Dika agbuteng, Abram: siak ti kalasagmo,” “Agbalinkanto a maysa nga ama ti adu a pagilian,” wenno “Amin a kaamaan iti daga mabendisionan[to].”
-
Ania dagiti sumagmamano a simple a kari a mabalin nga aramiden ken tungpalen dagiti ubbing kabayatan ti klase? Kas pagarigan, kiddawem ida nga agkari nga agtalinaed iti tugtugawda para iti sumagmamano a minuto wenno isimpa dagiti pagtugawanda iti leppas ti klase. Ibinglay kadakuada ti naminsan a nagkarika ket tinungpalmo daytoy, ken awisem ida a mangibinglay kadagiti ania man a napadasanda. Tulongam ida a makaawat nga agkaridanto iti Nailangitan nga Ama inton mabuniaganda ken inton mapanda iti templo.
Isuro ti Doktrina: In-inauna nga Ubbing
Denggen ken sungbatan ti Nailangitan nga Ama dagiti kararagko.
Idi nagpeggad ti biag ni Abraham, immawag iti Dios ket naisalakan. Mabalin nga addaan dagiti ubbing a sursuruam iti bukodda a padas iti kararag a mabalinda nga ibinglay.
Dagiti Mabalin nga Aktibidad
-
Ipakitam ti ladawan nga An Angel Saves Abraham (ChurchofJesusChrist.org), ket awisem dagiti ubbing a mangibinglay no ania ti ammoda maipapan iti iladawan ti estoria, a masarakan iti Abraham 1:12, 15–17. Pabasam kadagiti ubbing dagitoy a bersikulo ket paibinglay dagiti banag a masursuroda maipapan iti kararag.
-
Awisem dagiti ubbing a mangibinglay kadagiti padas idi sinungbatan ti Nailangitan nga Ama dagiti kararagda, ken ibinglay ti maysa kadagiti bukodmo a padas.
Makapagbalinak a mamagkappia.
Maipasangotayo amin kadagiti situasion a mangsulisog kadatayo tapno agbalin a maupay ken mannakisinnupiat. Ibilangmo no kasano a makatulong kadagiti ubbing ti estoria da Abraham ken Lot tapno agbalinda a mamagkakapia iti kakasta a situasion.
Dagiti Mabalin nga Aktibidad
-
Isurat ti Dagiti Kangrunaan nga Agakem, Nakapasamakan, Problema, ken Solusion iti pisarra. Awisem dagiti ubbing a mangbasa iti Genesis 13:5–12 ket ilasin dagiti paset ti estoria a nailista iti pisarra. Tulongam dagiti ubbing a mangpanunot kadagiti situasion a makapagbalinda a mamagkakappia, kas koma no makisuppiat wenno makiapa ti maysa a tao. Kalpasanna awisem ida a mangyakem no kasano a makapagbalinda a mamagkakappia kadagita a situasion.
-
Tulongam dagiti ubbing a mangsarak kadagiti topiko a “Kappia” ken “Mamagkakappia” iti Pangiwanwan iti Nasantuan a Kasuratan (scriptures.ChurchofJesusChrist.org). Awisem ti tunggal ubing a mangpili iti maysa a nasantuan a kasuratan maipapan iti kappia ket ibinglay iti klase no ania ti nasursurona. Tulongam ida a mangpanunot iti sumagmamano a pagarigan ti Mangisalakan iti panagbalin a mamagkappia, a kas iti Lucas 22:50–51. Kasano a masurottayo ti pagwadanna?
LadawanDa Lot ken Abraham a kadua dagiti arbanPili ni Lot, © Providence Collection/licensed manipud iti goodsalt.com
Genesis 17:1–8; Abraham 2:8–11
Matungpalko dagiti katulagan nga inaramidko iti Nailangitan nga Ama.
Ti panangisuro kadagiti ubbing maipapan iti katulagan nga inaramid ti Dios kada Abraham ken Sara ti makatulong kadakuada a mangpanunot maipapan kadagiti bukodda a katulagan.
Dagiti Mabalin nga Aktibidad
-
Awisem dagiti ubbing a basaenda ti Genesis17:1–8 ken Abraham 2:8–11 ket agaramid iti dua a listaan: no ania ti naidawat nga aramiden ni Abraham ken no ania ti inkari ti Apo kenkuana a kasukatna. Ania ti masursurotayo maipapan iti Apo manipud kadagitoy a bersikulo?
-
Ipakitam ti maysa a ladawan ti maysa a tao a mabumbuniagan (kitaen iti Libro ti Arte ti Ebanghelio, dagiti num. 103, 104). Idawatmo kadagiti ubbing a mangilista kadagiti kari nga inaramid ti maysa a tao iti panagbuniag ken dagiti kari nga inaramid ti Dios kas supapak. Isingasing a sapulen dagiti ubbing iti Mosiah 18:10; Doktrina ken Katulagan 20:37, 77, 79 para iti tulong. Ania ti mabalin nga aramidentayo a mangtungpal kadagiti katulagan idi nabuniagantayo?
Yallukoy ti Panagsursuro iti Pagtaengan
Mangipatulod iti maysa a surat iti pagtaengan kadagiti ubbing a mangallukoy kadagiti miembro ti pamiliada tapno pakaammuan ida maipapan kadagiti ubbing iti panagbalinda a mamagkappia, panagtungpal kadagiti kari, wenno panagaramid iti nagsasaritaanyo iti klase.
Panangpadur-as iti Panangisurotayo
Aktibo dagiti ubbing. No dadduma mabalin a kasla makasinga iti panagsursuro ti kinaganaygay unay dagiti ubbing, ngem mausaryo ti kinaganaygayda kas paset ti panagsursuroda. Awisem ida a mangyakem iti maysa nga estoria wenno aramidenda dagiti garaw a maigiddan kadagiti balikas ti maysa a kanta wenno nasantuan a kasuratan. (Kitaen iti Panangisuro iti Wagas ti Mangisalakan, 25–26.)