Panangiladawan ken ni Rebeca, ni Dilleen Marsh

Pebrero 21–27

Genesis 24–27

Napabaro ti katulagan

Bayat ti panangbasam iti Genesis 24–27 ken agsagana a mangisuro, panunotem maipapan kadagiti ubbing iti klasem. Ania ti nasken a sursuruenda? Ania kadagitoy nga aktibidad ti agbalinto a napnuan kaipapanan kadakuada? Batay kadagiti kasapulanda, mausarmo ti ania man kadagiti aktibidad a nairaman ditoy wenno dagiti masarakan iti Umaykayo, Sumurot Kaniak—Para kadagiti Indibidual ken Pamilia.

Isuratmo dagiti Impresionmo

Yawis ti Panagbibinninglay

Iti sirok ti tugaw ti tunggal ubing, mangikabil iti maysa a saludsod maipapan iti maysa a pasamak wenno pagbatayan iti Genesis 24–27. Pasungbatam kadagiti ubbing dagiti saludsod no kabaelanda, wenno awisem ida a dumngeg kadagiti sungbat kabayatan ti adalen.

Isuro ti Doktrina: In-inaudi nga Ubbing

Genesis 24:10–21

Makapagbalinak a naasi kadagiti dadduma.

Naawis iti nakaskasdaaw a kinaimbag ti katulongan ni Abraham nga impakita ni Rebeca kenkuana babaen iti panangidiayana iti danum saan laeng kenkuana ngem iti 10 pay a kameliona. Ti pagwadanna ti mabalin a maysa a pammalagip kadagiti ubbing nga agbalin a nasayaat kadagiti dadduma.

Ti maysa a bubon iti nagkauna a Beer-sheba, a sadiay a nagkalian da Abraham ken Isaac kadagiti bubon.

Dagiti Mabalin nga Aktibidad

• Ipakita ti ladawan ni Rebeca iti panid ti aktibidad iti daytoy a lawas. Ilawlawag dagiti detalye iti ladawan bayat ti pananggupgopmo iti estoria iti Genesis 24:10–21, a nangipakitaan ni Rebeca ti kinasayaatna iti katulongan ni Abraham. Ilawlawag a dagiti balikas ken aramid ti kinaimbag ti pagilasinan a ni Rebeca ti kayat ti Dios nga asawaen ti anak ni Abraham a ni Isaac. Awisem dagiti ubbing nga agpammarang nga isuda ti katulongan a sumungsungad a kaduana dagiti kameliona wenno ni Rebeca nga agsaksakdo iti danum para kadakuada. Mangted kadakuada iti ragup dagiti balikas nga isarita manipud kadagiti nasantuan a kasuratan, a kas iti “Palubosannak … nga uminum iti sangkabassit a danum” (bersikulo 17) ken “Mangalaakto iti danum a maipaay kadagiti kameliom” (bersikulo 19). Apay a napateg para kadatayo ti agbalin a nasayaat kadagiti dadduma?

• Isaritam ti maysa nga estoria maipapan iti no kasano nga impakita ti Mangisalakan ti kinasayaat iti maysa a tao. Awisem ti sumgmamano kadagiti ubbing a mangibinglay kadagiti bukodda a padas a mangipakita iti kinasayaat.

• Isingasing ti sumagmamano a situasion a pangipakitaan ti maysa nga ubing iti kinasayaat, kas iti pannakiay-ayam iti gagayyem wenno pannakipagkita iti maysa a tao a kabarbaro iti pagadalan. Saludsodem kadagiti ubbing no ania ti mabalinda nga aramiden tapno agbalinda a nasayaat kadagitoy a situasion.

• Aggigiddan nga agkansion iti maysa a kanta a kadua dagiti ubbing maipapan iti kinasayaat, kas iti “Kindness Begins with Me” wenno “I’m Trying to Be like Jesus” (Children’s Songbook, 145, 78–79). Awisem dagiti ubbing a dumngeg iti balikas a “kinasayaat” (wenno maysa a kapada a balikas) ket tumakder no mangngegda daytoy. Kasano a maipakitatayo ti kinaimbag kadagiti dadduma? Makatulong ti panid ti aktibidad itoy a lawas iti daytoy a panaglilinnawag.

Genesis 25:29–34

Kabaelak a pilien dagiti kapatgan a banag.

Gapu ta ni Esau ti inauna nga anak iti pamiliada, naited koma kenkuana dagiti naisangsangayan a pagrebbengan ken pribilehio, a maawagan iti saguday ti pannakayanak. Maysa nga aldaw idi mabisin ni Esau, insukatna ti saguday ti pannakayanakna iti kabsatna, a ni Jacob, para iti sumagmamano a taraon. Maisuro daytoy nga estoria dagiti ubbing a nasken a pilientayo dagiti manayon a banag a saan ketdi nga iti apagkanito a pannakapnek.

Dagiti Mabalin nga Aktibidad

• Mangitugot iti klase iti sumagmamano a banag a makatulong a mangisarita iti estoria ni Esau a mangisuksukat iti saguday ti pannakayanakna, kas iti malukong, ken maysa a ladawan ti maysa a tao nga umaw-awat iti bendision ti priesthood. Awisem dagiti ubbing a mangusar kadagiti banag bayat ti panangisalaysayda kenka no ania ti ammoda maipapan iti estoria.. “Jacob ken Esau” (iti Dagiti Estoria iti Daan a Tulag) ket makatulong. Aggigiddan a basaen ti Genesis 25:34, ket ilawlawag nga asino man nga addaan iti saguday ti pannakayanak ket maaddaan kadagiti naisangsangayan a pribilehio ken pagrebbengan a mangaywan kadagiti dadduma pay a kameng ti pamilia.

• Mangipakita kadagiti ubbing iti dua a ladawan: maysa a banag nga addaan iti naindaklan a naespirituan a pateg (kas iti templo) ken maysa a banag a mangisangbay laeng iti apagkanito a ragsak (kas iti maysa a game, ay-ayam, wenno merienda). Idawat kadakuada a mangpili no ania a banag ti nasaysayaat a makatulong kadatayo a makasubli iti Nailangitan nga Ama. Ulitem kadagiti dadduma pay a ladawan.

• Agkansion iti maysa a kanta maipapan iti panagaramid kadagiti nasasayaat a pili, kas iti “Choose the Right Way” (Children’s Songbook, 160–61). Paneknekam a naparaburan ken naragsaktayo no pilientayo ti rumbeng.

Isuro ti Doktrina: In-inauna nga Ubbing

Genesis 24:1–28

Mabendisionannakto no agtignayak a sipapammati ken ipakitak ti kinasayaatko iti dadduma.

Nangipakita iti pammati ti katulongan ni Abraham babaen ti panagtalekna iti pannarabay ti Dios a mangsarak iti asawa para ken ni Isaac. Impakita ni Rebeca ti kinaimbag iti wagas a panangtratona iti katulongan ni Abraham. Kasano a matulongam dagiti ubbing a sursuruam a mangsurot kadagiti pagwadan ti katulongan ni Abraham ken ni Rebeca?

Dagiti Mabalin nga Aktibidad

• Basaenyo ti Genesis 24:1–28 nga aggigiddan, ket tulongam dagiti ubbing a mangilasin kadagiti pagarigan ti pammati ken kinasayaat (kas pagarigan, kitaen kadagiti bersikulo 12–14 ken 17–20). Kasano a nabendisionan ti katulongann ni Abraham ken ni Rebeca babaen ti panangipakita iti pammati ken kinasayaat? Isurat iti pisarra ti Maipakitatayo ti pammati babaen iti … ken Maipakitatayo ti kinasayaat babaen iti … , ken awisem dagiti ubbing a mangisingasing kadagiti wagas a pangileppasan kadagitoy a binatog.

• Kadagiti akikid a papel, isuratmo dagiti banag nga imbaga wenno inaramid ti katulongan ni Abraham wenno dagiti banag nga imbaga wenno inaramid ni Rebeca iti Genesis 24:1–28. Awisem dagiti ubbing a saggaysa a mangpili iti maysa nga akikid a papel ken agtitinnulong a mangpugto no asino ti nagkuna wenno nagaramid kadagitoy a banag (mabalinda ti agibasar kadagiti nasantuan a kasuratan no kasapulanda ti tulong). Ania ti isuro kadatayo daytoy nga estoria maipapan iti kinasayaat? Ania ti isuro daytoy kadatayo maipapan iti pammati? Masarakan ti dadduma pay a pagwadan ti kinasayaat ken pammati iti Genesis 24:29–33, 58–61.

• Awisem dagiti ubbing a mangpanunot iti maysa nga aramid iti kinasayaat a nakitadan. Awisem ida a mangisurat ken mangibinglay iti daytoy iti pamiliada iti pagtaengan. Ania ti mariknatayo no nasayaat ti maysa a tao kadatayo?

Genesis 25:21–34

Ipategko dagiti agnanayon a banag imbes a dagiti temporal a banag.

Pinili ni Esau nga isukat ti maysa a banag a naindaklan ti pategna, ti saguday ti pannakayanak, iti maysa a banag a nababbaba ti pategna, sumagmamano a tinapay ken maysa a malukong a sopas. Bayat ti panangbasam kadagitoy a bersikulo, utobem no kasano a matulongam dagiti ubbing a mangipagpangruna kadagiti banag nga agnanayon ti pategna.

Dagiti Mabalin nga Aktibidad

• Aggigiddan a basaen ti estoria da Jacob ken Esau iti Genesis 25:21–34. Bayat ti panangbasam, awisem ti tunggal ubing a pumili iti maysa a banag manipud iti estoria. Kalpasanna awisem ida a mangusar kadagiti ladawanda a mangisarita ti estoria iti bukodda a balikas. No kasapulanda ti tulong iti pannakaawat no ania ti maysa a saguday ti pannakayanak, allukoyem ida a mangbasan iti “Saguday ti Pannakayanak” iti Pangiwanwan iti Nasantuan a Kasuratan (ChurchofJesusChrist.org). Awisem dagiti ubbing a mangipapan a kiniddaw ni Esau ti balakadtayo maipapan iti no rumbeng nga isukatna ti saguday ti pannakayanakna iti lugaw; ania koma ti sawentayo kenkuana?

• Isaritam ti maipapan iti maysa a panawen a kasapulam nga isakripisio iti maysa a banag a nasayaat para iti maysa a banag a nain-indaklan ti pategna. Wenno ipabuya ti video a “Continue in Patience” (ChurchofJesusChrist.org). Kasano a mainaig ti estoriam wenno ti estoria iti video iti inaramid ni Esau a pili iti Genesis 25:29–34? Tulongam dagiti ubbing a mangpanunot kadagiti bendision a kayat ti Nalilangitan nga Ama nga ited kadakuada (kas iti maysa a natibtibker a pammaneknek, dagiti bendision ti templo, wenno agnanayon a biag iti sidongna). Allukoyem ida nga agpanunot kadagiti banag a natallugoddanto a mangisakripisio tapno maawat dagitoy napapateg a bendision.

Yallukoy ti Panagsursuro iti Pagtaengan

Awisem dagiti ubbing a mangpanunot iti maysa a panggep a tun-oyen a mabalinda nga ituding para iti bagbagida maipapan iti maysa a pagbatayan a nasursuroda iti Primary ita nga aldaw. Kas pagarigan, mabalinda ti mangituding iti panggep a tun-oyen nga agbalin a nasayaat kadagiti dadduma iti pagtaengan.

Panangpadur-as iti Panangisurotayo

Kayat dagiti ubbing nga ibinglay no ania ti masursuroda. Nupay ubbingda pay laeng, mapapigsa dagiti ubbing dagiti miembro ti pamiliada. Allukoyem ida a mangibinglay kadagiti pamiliada ti maysa a banag a nasursuroda iti Primary. (Kitaen iti Panangisuro iti Wagas ti Mangisalakan,30