Pebrero 28–Marso 6. Genesis 28–33: ‘Pudno Unay a ni Jehova Adda Ditoy a Disso.’” Umaykayo, Sumurot Kaniak—Para iti Primary: Daan a Tulag 2022 (2021)
Pebrero 28–Marso 6. Genesis 28–33,” Umaykayo, Sumurot Kaniak—Para iti Primary: 2022
Pebrero 28–Marso 6
Genesis 28–33
“Pudno Unay a ni Jehova Adda Ditoy a Disso”
Bayat ti panangbasam iti Genesis 28–33, utobem no kasano a mabendisionan dagiti ubbing a sursuruam kadagiti estoria ken pagbatayan kadagitoy a kapitulo.
Isuratmo dagiti Impresionmo
Yawis ti Panagbibinninglay
Awisem dagiti ubbing a mangipasippaw wenno mangipatulatid iti maysa a bola iti tunggal maysa. No masippaw dagiti ubbing ti bola, kiddawem kadakuada a mangibinglay ti maysa a banag a masursuroda manipud iti Daan a Tulag iti man pagtaengan wenno iti Primary.
Isuro ti Doktrina: In-inaudi nga Ubbing
Tulongannak dagiti katulagan nga agsubli iti Nailangitan nga Ama.
Iti maysa a tagtagainep, nakita ni Jacob ti maysa nga agdan nga agturong iti langit. Mabalin a mangibagi dagiti pangal iti agdan kadagiti katulagan nga aramidentayo iti Dios, gapu ta dagitoy a katulagan ti makatulong a mangisagana kadatayo tapno makasubli iti sidongna.
Dagiti Mabalin nga Aktibidad
-
Ibasam ti Genesis 28:12–13 kadagiti ubbing. Ilawlawag a dagiti pangal iti agdan ti mangibagi kadagiti katulagan a mangtulong kadatayo nga agsubli iti Nailangitan nga Ama. Awisem dagiti ubbing nga agpammarang nga umul-ulida iti agdan bayat ti panagsaritam maipapan kadagiti panawen no agkaritayo nga agtungpal iti Dios, kas no agbuniagtayo, umawat iti sakramento, wenno mapan iti templo. Tulongam dagiti ubbing a mangpanunot kadagiti wagas a makapagsaganada a mangaramid kadagiti katulagan no mabuniaganda.
-
Ibasam ti Genesis 28:15 kadagiti ubbing, a mangyunay-unay kadagiti balikas nga “Addaak kenka” ken “Saankanto a panawan.” Ilawlawag nga inkari ti Dios a kanayon a kadkaduaennatayo no ikarigatantayo a pilien iti umno. Tulongam dagiti ubbing nga agpanunotda kadagiti banag a mabalinda nga aramiden tapno mariknada nga as-asidegda iti Nailangitan nga Ama ken ni Jesucristo.
Nasken a tungpalek dagiti karik.
Immanamong ni Jacob nga agtrabaho para ken ni Laban iti pito a tawen tapno mabalinna nga ikallaysa ti babai nga anak ni Laban a ni Raquel. Tinungpal ni Jacob ti tulag, ngem saan a tinungpal ni Laban. Ibilang nga usarem daytoy nga estoria a mangisuro kadagiti ubbing maipapan iti kinapateg ti panagtungpal kadagiti kari.
Dagiti Mabalin nga Aktibidad
-
Ibasam ti Genesis 29:18, 20 kadagiti ubbing, ken ilawlawagmo a tinungpal ni Jacob ti karina nga agtrabaho iti pito a tawen ken ni Laban tapno iti kasta mabalinna nga ikallaysa ni Raquel, uray pay napaut daytoy a panawen nga agtrabaho (kitaen met iti “Ni Jacob ken ti Pamiliana,” iti Dagiti Estoria iti Daan a Tulag). Tulongam dagiti ubbing nga agpanunot kadagiti kari a mabalinda nga aramiden iti dadduma a tattao. Apay a napateg a tungpalentayo dagiti karitayo? Tulongam ida a makaawat a ti katulagan ket maysa a sagrado a kari iti nagbaetan ti Dios ken ti tunggal maysa kadatayo. Iburaymo ti pammaneknekmo a tungpalen a kanayon ti Nailangitan nga Ama ken ni Jesucristo dagiti karida.
-
Aggigiddan nga agkanta ken ilawlawag ti maysa a kanta maipapan iti kinapudno, a kas ti “I Believe in Being Honest” wenno “Stand for the Right” (Children’s Songbook, 149, 159).
Matulongannak ti Nailangitan nga Ama ken ni Jesucristo a mangipateg iti pamiliak.
Kaaduan kadagiti ubbing ti makaammo no ania ti rikna ti makapungtot iti maysa a kabsat. Ti estoria no kasano a naparmek da Jacob ken Esau ti pungtotda iti tunggal maysa ket mabalin a makaparegta kadakuada.
Pannakailadawan da Jacob ken Esau nga agin-innarakup, ni Robert T. Barrett
Dagiti Mabalin nga Aktibidad
-
Tulongam dagiti ubbing a manglagip no apay a kinapungtot ni Esau ni Jacob (kitaen iti Genesis 27:41 wenno “Da Jacob ken Esau,” iti Dagiti Estoria iti Daan a Tulag). Kiddawen kadagiti ubbing nga ipakitada kenka no ania ti langa ti makapungtot a rupa. Ilawlawag a kalpasan ti adu a tawen, nagbuteng ni Jacob a mangsarungkar ken ni Esau. Kiddawen kadagiti ubbing nga ipakita kenka no ania ti langa ti mabuteng a rupa. Ania ti rumbeng nga aramidentayo no mabutengtayo? Awisem dagiti ubbing nga agpammarang nga agkarkararag kabayatan ti panangbasam no ania ti insao ni Jacob iti kararagna (kitaen iti Genesis 32:11). Kalpasanna basaem iti Genesis 33:4 no ania ti napasamak idi nakita ni Esau ni Jacob. Kiddawen kadagiti ubbing nga ipakitada kenka no kasano ti mabalin a langa dagiti rupa da Jacob ken Esau idi makitada manen ti tunggal maysa.
-
Ipakita ti ladawan da Jacob ken Esau a masarakan itoy a balabala. Pailadawan kadagiti ubbing ti no ania ti makitada iti ladawan. Ibagam kadakuada nga adda dagiti madi a rikna iti nagbaetan dagitoy dua a lallaki nga agkabsat, ngem pinilida a pakawanen ti tunggal maysa. Tulongam dagiti ubbing a mangpanunot no kasano nga ipakitada ti ad-adda a panagayat iti maysa a tao iti pamiliada, kas iti impakita da Jacob ken Esau nga ayat iti tunggal maysa.
Isuro ti Doktrina: In-inauna nga Ubbing
Tulongannak dagiti katulagan nga agsubli iti Nailangitan nga Ama.
Mabalinmo nga usaren ti tagtagainep ni Jacob ti maysa nga agdan nga agpangato iti langit a mangisuro kadagiti ubbing a ti panagtungpal kadagiti katulagantayo ti mangisagana kadatayo a sumrek iti imatang ti Dios.
Dagiti Mabalin nga Aktibidad
-
Awisem dagiti ubbing a mangbasa iti Genesis 28:10–15 ken kalpasanna mangidrowing iti maysa a ladawan ti tagtaginep ni Jacob. Kiddawem kadakuada nga ibinglayda dagiti ladawanda. Ilawlawag a ti agdan ti mangibagi iti maysa a wagas tapno makasubli ni Jacob iti Dios. Ania ti inted ti Dios a mangtulong kadatayo nga agsubli Kenkuana? (kitaen iti panid ti aktibidad ita a lawas). Palagipam dagiti ubbing iti katulagan ti panagbuniagda. Kasano a yas-asidegnatayo iti Dios ti panagbiag iti daytoy a katulagan?
-
Ipakitam ti ladawan ti maysa a templo, ket isuratda iti pisarra dagiti kangrunaan a ragup ti balikas manipud iti Genesis 28:15–17, a kas iti: “Addaak kenka,” “Adda ti Apo iti daytoy a lugar,” “Ti balay ti Dios,” wenno “Ti ruangan ti langit.” Awisem dagiti ubbing a mangsapul kadagitoy a ragup ti balikas. Ibagam kadagiti ubbing no kasano a matulongannakayo ti templo ken dagiti katulagan iti templo a mariknayo nga as-asidegkayo iti Apo?
Mamatiak iti panagbalin a napudno.
Nagtungpal ni Jacob ti karina nga agserbi ken ni Laban iti pito a tawen, ngem inallilaw ni Laban isuna. Kasano a mausarmo daytoy nga estoria a mangtulong kadagiti ubbing a mangipaawat iti kinapateg ti panagbalin a napudno nga uray saan a napudno dagiti dadduma?
Dagiti Mabalin nga Aktibidad
-
Aggigiddan a basaen ti Genesis 29:16–30, ket tulongam dagiti ubbing a manggupgop kadagiti pasamak kadagitoy a bersikulo. Kasano ti reaksion ni Jacob ti pannakaallilawna? Ania ti masursurotayo manipud iti daytoy a pakaammuan?
-
Isurat iti pisarra ti Ania ti mapasamak no naulbodtayo? ken Ania ti mapasamak no napudnotayo? Awisem dagiti ubbing a mangsarak kadagiti sungbat babaen ti panagbasa iti “Kinapudno ken Integridad” (iti Para iti Pigsa dagiti Agtutubo [2011], 19).
Matulongannak ti Nailangitan nga Ama ken ni Jesucristo a mangipateg iti pamiliak.
Nagpungtot ni Esau ken ni Jacob, ket nagbuteng ni Jacob a makipagkita manen ken ni Esau, uray pay kalpasan ti 20 a tawen a panaginnaddayoda. Ngem nagkararag ni Jacob para iti tulong, ket kinabaelan ni Esau a nangparmek iti pungtotna. Kasano a mausarmo daytoy nga estoria tapno maisurom kadagiti ubbing ti kinapateg ti panagayattayo kadagiti pamiliatayo?
Dagiti Mabalin nga Aktibidad
-
Saludsodem kadagiti ubbing no ania ti malagipda maipapan iti relasion da Jacob ken Esau (kitaen iti Genesis 27:41 wenno “Da Jacob ken Esau,” iti Dagiti Estoria ti Daan a Tulag). Ilawlawag a kalpasan nga immadayo iti agarup 20 a tawen, makipagkita manen ni Jacob ken ni Esau. Aggigiddan a basaen ti Genesis 32:6–11. Kasano ti narikna ni Jacob? Ania ti inaramidna tapno makaala iti tulong? Paneknekam a mabalintayo a kiddawen ti tulong ti Nailangitan nga Ama no narigat dagiti panaglilinnangentayo kas sangapamiliaan. Aggigiddan a basaen ti Genesis 33:1–4 tapno takuaten no kasano a sinungbatan ti Apo ti kararag ni Jacob.
-
Ibinglay ti maysa a bukod a padas wenno maysa nga estoria manipud iti maysa a magasin ti Simbaan maipapan no kasano ti mangipakita ti dakdakkel a panagayat kadagiti pamiliatayo. Awisem met dagiti ubbing a mangibinglay kadagiti padasda. Ania ti maaramidtayo no kapungtotnatayo ti maysa a miembro ti pamilia? Tapno masursuro ti maipapan iti no ania ti insuro ti Mangisalakan nga aramidentayo, kitaen iti Mateo 5:43–45.
Yallukoy ti Panagsursuro iti Pagtaengan
Awisem dagiti ubbing a mangibinglay iti panid ti aktibidad ita a lawas kadagiti pamiliada a mangtulong kadakuada a mangammo ken manglagip iti tagtagainep ni Jacob.
Panangpadur-as iti Panangisurotayo
Agusar kadagiti ladawan a makatulong kadagiti ubbing a makaawat kadagiti estoria iti nasantuan a kasuratan. Masansan a nasaysayaat a makasursuro dagiti ubbing no makitada dagiti ladawan dagiti estoria iti nasantuan a kasuratan wenno pannursuro. Kas pagarigan, mabalinmo nga ipakita ti maysa a ladawan manipud iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia.