“Pebrero 28–Marso 6. Genesis 28–33: ‘Pudno Unay a ni Jehova Adda Ditoy a Disso,’” Umaykayo, Sumurot Kaniak—Para kadagiti Indibidual ken Pamilia: Daan a Tulag 2022 (2021)
“Pebrero 28–Marso 6. Mosiah 28–33,” Umaykayo, Sumurot Kaniak—Para kadagiti Indibidual ken Pamilia: 2022
Pebrero 28–Marso 6
Genesis 28–33
“Pudno Unay a ni Jehova Adda Ditoy a Disso”
Bayat ti panangbasam iti Genesis 28–33, utobem no ania ti masursurom manipud kadagiti pagwadan ni Jacob ken ti pamiliana. Isuratmo dagiti ania man nga impresion a maawatmo.
Isuratmo dagiti Impresionmo
Isarita dagitikapitulo 28 ken 32 ti Genesis maipapan iti dua a padas nga adda ken ni propeta Jacob. Agpada a napasamak iti let-ang ngem iti babaen dagiti nagduduma unay a kasasaad. Iti umuna a padas, agbambaniaga ni Jacob iti nakayanakan a pagilian ti inana, tapno mangsapul iti asawaenna, iti dalanna, binubosna ti rabii a iti pungan a batbato. Mabalin a saanna a ninamnama a masapulan iti Apo iti kasta a maiputputong a lugar, ngem impalgak ti Apo ti Bagina ken ni Jacob iti makapagbalbaliw-biag a tagainep, ket indeklara ni Jacob, “Pudno unay a ni Jehova adda ditoy a disso; ket siak saanko nga ammo idi” (Genesis 28:16). Kalpasan dagiti tawen, natakuatan ni Jacob ti bagina nga adda manen iti let-ang. Iti daytoy a panawen, adda iti dalanna nga agsubli iti Canaan, a maipaspasango iti mabalin a napeggad a panagkitada iti makagurgura a kabsatna, ni Esau. Ngem ammo ni Jacob a no kasapulanna ti maysa a bendision, mabalinna a sapulen ti Apo, uray iti let-ang (kitaen iti Genesis 32).
Mabalin a masarakam ti bagim iti bukodmo a let-ang nga agsapsapul iti bendision manipud iti Dios. Mabalin a ti let-angmo ket ti narigat a pannakilangen iti pamilia, kas iti adda ken ni Jacob. Nalabit a mariknam nga adayoka iti Dios wenno mariknam a kasapulam ti maysa a bendision. No dadduma umay ti bendision a di namnamaen; no dadduma unaan ti pannakisinnupanget. Ania man ti kasapulam, matakuatam nga uray iti let-angmo, “ni Jehova adda ditoy a disso.”
Dagiti Kapanunotan para iti Bukod a Panagadal iti Nasantuan a Kasuratan
Naikari kaniak dagiti bendision ni Abraham iti templo.
Iti dalanna a mapan iti Haran tapno agsapul iti asawaenna, nagtagtagainep ni Jacob iti maysa nga agdan a naipatakder iti daga a tumukno ti murdongna iti langit, a ti Dios nagtakder iti rabawna. Iti tagtagainep, pinabaro ti Dios ken ni Jacob dagiti isu met la a katulagan nga inaramidna kada Abraham ken Isaac (kitaen iti Genesis 28:10–17; kitaen met iti Genesis 12:2–3; 26:1–4). Imbinglay ni Presidente Marion G. Romney daytoy a kapanunotan maipapan iti mabalin nga ibagi ti agdan: “Naamiris ni Jacob a dagiti katulagan nga inaramidna iti Apo idiay ket dagiti pangal iti agdan a nasken nga ulienna mismo tapno gun-oden dagiti naikari a bendision—dagiti bendision a mangpaikari kenkuana a sumrek iti langit ken makipulapol iti Apo. … Agpada ti panggep ken kaipapanan dagiti templo para kadatayo iti padas ni Jacob iti Betel” (“Temples—The Gates to Heaven,” Ensign, Mar. 1971, 16).
Ania pay dagiti dadduma a balikas ken ragup ti balikas iti Genesis 28:10–22 a mangisingasing kenka iti pagnaigan ti padas ni Jacob ken dagiti bendision iti templo? Bayat ti panangbasam kadagitoy a bersikulo, panunotem dagiti katulagan nga inaramidmo; ania dagiti impresion nga umay kenka?
Bayat ti panangbasam ti Genesis 29:1–18, utobem no kasano ti kapateg ti panagkallaysa ni Jacob ken ni Raquel iti katulagan a pinabaro ti Dios ken ni Jacob iti Betel (“balay ti Dios”; kitaen iti Genesis 28:10–19). Laglagipen daytoy a padas bayat ti panagtuloyyo a mangbasa maipapan iti biag ni Jacob iti Genesis 29–33. Kasano nga inyas-asidegnaka ti Dios ti balay ti Apo?
Kitaen met iti Yoon Hwan Choi, “Don’t Look Around, Look Up!” Liahona, Mayo 2017, 90–92.
Malagipnak ti Dios kadagiti pannubokko.
Nupay nagbiag da Raquel ken Leah iti panawen ken kultura a maiduma kadatayo, maawatantayo amin ti sumagmamano a nariknada. Bayat ti panangbasam ti Genesis 29:31–35 ken 30:1–24, agsapulka kadagiti balikas ken ragup ti balikas a mangiladladawan iti asi ti Dios kada Raquel ken Lea. Utoben no kasano a ti Dios “nakitana ti liday[mo]” ken “linagipna[ka]” (Genesis 29:32; 30:22).
Napateg pay a lagipen a numan pay denggennatayo ti Dios, iti siribna dina kanayon ited nga eksakto kadatayo no ania ti dawatentayo. Ibilang ti panagadal iti mensahe ni Elder Brook P. Hales “Answers to Prayer” (Liahona, Mayo 2019, 11–14) tapno masursuro maipapan iti nadumaduma a wagas a panangsungbat ti Nailangitan nga Ama kadatayo.
Para iti ad-adu pay maipapan iti pagtaudan iti kultura daytoy nga estoria, kitaen iti Old Testament Student Manual: Genesis–2 Samuel (2003), 86–88.
Ladawan da Jacob ken Esau nga agin-innarakup, ni Robert T. Barrett
Matulongannatayo ti Mangisalakan a mangparmek iti saan a panagkikinnawatan iti pamiliatayo.
Idi nagsubli ni Jacob iti Canaan, “nagbuteng iti dakkel unay ken nadanagan” no kasano ti panangawat kenkuana ni Esau (Genesis 32:7). Bayat ti panangbasam iti Genesis 32–33 maipapan iti panagsango da Jacob ken Esau ken ti rikna a nakaituronganna, mabalinmo nga utoben dagiti bukodyo a panaglalangen iti pamilia—nalabit a maysa a kasapulan ti panangpaimbag. Nalabit a makaparegta kenka daytoy nga estoria a mangtulong iti maysa a tao. Makatulong dagiti kastoy a saludsod a mangtarabay iti panagbasam:
-
Kasano a nagsagana ti Jacob a sumabat ken ni Esau?
-
Ania ti napateg kenka maipapan iti kararag ni Jacob, a masarakan iti Genesis 32:9–12?
-
Ania ti masursurotayo maipapan iti pammakawan manipud iti pagwadan ni Esau?
-
Kasano a matulongannatayo ti Mangisalakan a mangpaimbag kadagiti pannakilangen iti pamilia?
Kitaen met iti Lucas 15:11–32; Jeffrey R. Holland, “The Ministry of Reconciliation,” Liahona, Nob. 2018, 77–79.
Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening
-
Genesis 28–33.Usaren ti “Ni Jacob ken ti Pamiliana” (iti Dagiti Estoria iti Daan a Tulag) a mangtulong kadagiti ubbing a makaawat kadagiti pasamak manipud kadagitoy a kapitulo. Nalabit a mabalin nga agsardeng dagiti miembro ti pamilia iti tunggal ladawan ket lasinen no ania ti maisursuro, kas iti kinapateg ti kallaysa, katulagan, trabaho, ken pammakawan.
-
Genesis 28:10–22.Mabalinmo nga usaren ti agdan (wenno ladawan ti maysa) a mangisarita no kasano a maipada iti maysa nga agdan dagiti katulagan. Ania dagiti katulagan nga inaramidtayo, ken kasano a yas-asidegdatayo dagitoy iti Dios? Mabalin a maay-ayo dagiti miembro ti pamilia iti panangidrowing iti tagtagainep ni Jacob, a nailadawan iti Genesis 28:10–22.
Ti himno a “Nearer, My God, to Thee” (Hymns, no. 100) ket pinaregta ti tagtagainep ni Jacob. Mabalin ti pamiliam a kantaen daytoy a himno ken ilawlawag no ania ti isuro ti tunggal bersikulo.
-
Genesis 32:24–32.Mabalin nga addaanka kadagiti miembro ti pamilia nga aggusto a makisinnupanget. Apay a ti “pannakisinnupanget” ket maysa a nasayaat a wagas a panangiladawan iti panangsapul kadagiti bendision manipud iti Apo? Ania ti isingasing ti Enos 1:1–5; Alma 8:9–10 maipapan iti no ania ti kayat a sawen ti “makisinnupanget … iti sanguanan ti Dios”?
-
Genesis 33:1–12.Kalpasan ti adu a tawen a sakit ti nakem, nagkita manen da Jacob ken Esau. No makasaodatayo da Jacob ken Esau ita, ania koma ti ibagada a mangtulong kadatayo no adda sinnupanget iti pamiliatayo?
Para kadagiti dadduma pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.
Naisingasing a kanta: “Dearest Children, God Is Near You,” Hymns, num. 96.
Panangpadur-as iti Bukod a Panagadal
Sapulem ni Jesucristo. Paneknekan ti Daan a Tulag ni Jesucristo babaen kadagiti estoria ken simbolona. Ibilangmo ti panangisurat wenno panangmarka kadagiti bersikulo a mangitudo iti Mangisalakan ken naipangruna a napnuan kaipapanan kenka.
Tagtagainep ni Jacob iti Betel, ni J. Ken Spencer