“Marso 7–13. Genesis 37-41: ‘Ni Jehova Siaadda Idi ken Jose,’” Umaykayo, Sumurot Kaniak—Para kadagiti Indibidual ken Pamilia: Daan a Tulag 2022 (2021)
“Marso 7–13. Genesis 37–41,” Umaykayo, Sumurot Kaniak—Para kadagiti Indibidual ken Pamilia: 2022
Ladawan ni Jose ti Egipto iti pagbaludan, ni Jeff Ward
Marso 7–13
Genesis 37–41
“Ni Jehova Siaadda Idi ken Jose”
Bayat ti panangbasam iti Genesis 37–41, agkararag tapno tulongannakanto ti Espiritu Santo a mangkita no kasano a mainaig dagiti binatog iti nasantuan a kasuratan iti biagmo. Isuratmo dagiti ania man a nalawag a pannakaammo ken pannakaawat a maawatmo.
Isuratmo dagiti Impresionmo
No dadduma mapasamak dagiti dakes a banag kadagiti nasayaat a tao. Suruannatayo ti biag iti dayta a leksion a silalawag, ken kasta met ti biag ni Jose, ti anak ni Jacob. Isu ti agtawid iti katulagan nga inaramid ti Dios kadagiti ammana, ngem kinagura dagiti kakabsatna ket inlakoda iti pannakaadipen. Nagkedked a mangikompromiso iti integridadna idi inasitgan ti asawa ni Potifar ket iti kasta naipuruak iti pagbaludan. Kasla man la ti ad-adda a panagbalinna a napudno, ad-adda met a narigat ti nakaipasanguanna. Ngem amin daytoy a rigat saan a pagilasinan ti saan a pananganamong ti Dios. Kinapudnona, babaen ti amin dagitoy, “ni Jehova siaadda idi kenkuana” (Genesis 39:3). Ti biag ni Jose ket pannakaiparangarang daytoy napateg a kinapudno: Dinatayto baybay-an ti Dios. Insuro ni Presidente Dieter F. Uchtdorf, “Ti panangsurot iti Mangisalakan saanto a mangikkat iti amin a pannubokyo.” “Nupay kasta, daytoyto ti mangikkat kadagiti tubeng iti nagbaetanyo ken ti tulong a kayat nga ited ti Nailangitan nga Amayo. Kaduaennakayto ti Dios” (“A Yearning for Home,” Liahona, Nob. 2017, 22).
Dagiti Kapanunotan para iti Bukod a Panagadal iti Nasantuan a Kasuratan
“Ni Jehova siaadda idi ken Jose” iti rigatna.
Iti panawen ken manen, kasla binaybay-an ti naimbag a gasat ni Jose, ngem di kaano man binaybay-an ti Apo. Bayat ti panangbasam iti estoria ni Jose, utobem dagiti saludsod kas kadagitoy: Ania ti inaramid ni Jose tapno agtalinaed nga asideg iti Apo kabayatan dagiti panawen ti pannubokna? Kasano nga “adda idi kenkuana” ti Apo? (Genesis 39:2–3, 21, 23).
Mabalin pay nga agdamagka kadagiti isu met la a saludsod maipapan iti biagmo. Ania ti pakakitaan a nakitamon a dinaka binabay-an ti Apo kadagiti panawen ti pannubok? Ibilangmo no kasano a maibinglaymo dagiti padasmo kadagiti miembro ti pamiliam ken dagiti masakbayan a kaputotan (kitaen iti 1 Nephi 5:14). Ania ti mabalin nga aramidem itan a mangisagana iti bagim tapno agtalinaedka a napudno no maipasangoka kadagiti pannubok iti masakbayan?
Kitaen met iti Juan 14:18; Taga Roma 8:28; Alma 36:3; Doktrina ken Katulagan 121:7–8; D. Todd Christofferson, “The Joy of the Saints,” Liahona, Nob. 2019, 15–18.
No napudnoak, tarabayen ken paregtaennakto ti Apo.
Insuro ni Elder David A. Bednar, “Maidanon dagiti paltiing iti nadumaduma a wagas, agraman, kas pagarigan, dagiti tagainep, parmata, pannakisarita kadagiti nailangitan a mensahero, ken pammaregta” (“The Spirit of Revelation,” Liahona, Mayo 2011, 88). Inusar ti Apo dagiti tagainep a mangipalgak kadagiti kinapudno kada Jose, panguluen ti agparparti ken agtintinapay ni Faraon, ken ni Faraon. Impalgak pay ti Apo ken ni Jose no kasano ti mangibuksil kadagitoy a tagtagainep. Ania ti masursurom manipud iti Genesis 37:5–11; 40:5–8; 41:14–25, 37–38 maipapan iti panangawat ken pannakaawat iti paltiing manipud iti Apo? Kas pagarigan, ania ti masursurom manipud iti pagwadan ni Jose no kasla narigat a maawatan ti paltiing? (kitaen iti Genesis 40:8; 41:16).
Ni Jose a mangibukbuksil kadagiti Tagtagainep ti Agparparti ken ti Agtintinapay, ni François Gérard
Utobem no kasano ti panangipalgak ti Apo iti pagayatanna kenka. Ania ti ar-aramidem tapno agtignay iti paltiing nga inted ti Apo kadakayo? Kasano ti panagkalikagummo a manggun-od iti nayon a pannarabay manipud Kenkuana?
Kitaen met iti Russell M. Nelson, “Revelation for the Church, Revelation for Our Lives,” Liahona, Mayo 2018, 93–96; Michelle Craig, “Spiritual Capacity,” Liahona, Nob. 2019, 19–21.
Babaen iti tulong ti Apo, maadaywak ti sulisog.
No masulsulisogka, maikkannaka ti pagwadan ni Jose iti pammaregta ken pigsa. Bayat ti panangbasam maipapan iti padasna iti Genesis 39, makita dagiti banag nga inaramid ni Jose a nangsupring iti pannulisog. Kas pagarigan:
-
“Pinagkedkedanna” dagiti pananggargari ti asawa ni Potifar (bersikulo 8).
-
Nabigbigna a ti panagbasol ti mangpasakit iti Apo ken iti dadduma (dagiti bersikulo 8–9).
-
“Saanna nga impangpangag” ti pannulisog, nupay nagtultuloy daytoy iti “inaldaw aldaw” (bersikulo 10).
-
“Nabatina ti pagan-anayna … ket nagtaray, a rimmuar” (bersikulo 12).
Sipapanunot iti pagwadan ni Jose, ibilang ti panangplano iti panangliklik ken panangkedked iti pannulisog. Kas pagarigan, mabalinmo ti agpanunot iti pannulisog a pakaipasanguam, mangisurat kadagiti situasion a liklikan, ken mangplano iti panagpannuray iti Nailangitan nga Ama no rumsua ti pannulisog (kitaen iti 2 Nephi 4:18, 27–33).
Sulisog:
Dagiti situasion a liklikan:
Plano nga agresponde:
Daytoy a pakaammuan maipapan iti pigsa ni Jose idi naipasango iti sulisog a sinaruno iti naiduma unay a pakaammuan maipapan iti manongna a ni Juda, a masarakan iti Genesis 38. Ania ti isuro kadatayo dagiti kapitulo 37, 38, ken 39, no agkaykaysada, maipapan iti kinadalus ti dayaw?
Kitaen met iti 1 Taga Corinto 10:13; 1 Nephi 15:23–24; 3 Nephi 18:17–18.
Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening
-
Genesis 37.No maysaka kadagiti kakabsat ni Jose, ania koma ti mabalin nga inaramidmo a nanglapped iti ilem a nangpakapuy iti relasionmo kenkuana? Kasano a matulongannatayo daytoy a “kasao iti naan-anat” ti tunggal maysa? (bersikulo 4).
-
Genesis 39.Naisalaysay kadagiti video “The Refiner’s Fire” ken “After the Storm” (ChurchofJesusChrist.org) dagiti padas ti tattao a nakasarak iti pigsa babaen ti yaasideg iti Apo kabayatan dagiti pannubokda. Mabalinmo a buyaen ti maysa kadagitoy ket isaritam maipapan iti mabalin a sawen ni Jose no nasken nga agaramid iti video maipapan kadagiti padasna. Mabalin nga aggigiddankayo a mangkanta iti “I’m Trying to Be Like Jesus” (Children’s Songbook, 78–79) ket sapulen ti balakad a mabalin nga ibinglay ti pamiliam ken ni Jose bayat ti pannakaipasangona kadagiti pannubokna.
-
Genesis 39:7–12.Ti panagbasa kadagitoy a bersikulo ti makaited iti gundaway tapno mangilawlawag iti linteg ti kinadalus iti dayaw iti pamiliam. Adtoy dagiti sumagmamano a resources a makatulong iti daytoy a panaglilinnawag: Jacob 2:28; Alma 39:3–9; “Sexual Purity” (iti Para iti Pigsa dagiti Agtutubo [2011], 35–37); “Sexual Intimacy Is Sacred and Beautiful” (iti Help for Parents [2019], AddressingPornography.ChurchofJesusChrist.org).
-
Genesis 41:15–57.Ania ti masursurotayo manipud kadagitoy a bersikulo maipanggep iti no kasano a binendisionan ti Apo dagiti tao iti Egipto babaen ken ni Jose? Ania ti masursurotayo maipapan iti panagsagana para kadagiti saan a mapakpakadaan a pasamak iti masakbayan? Paglilinnawagan no ania ti mabalinyo nga aramiden tapno agbalin a nasaysayaat a makapagsagana kas maysa a pamilia. Para kadagiti kapanunotan, kitaen iti Gospel Topics, “Emergency Preparedness,” topics.ChurchofJesusChrist.org.
Para kadagiti dadduma pay a kapanunotan iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.
Naisingasing a kanta: “Jesus Is Our Loving Friend,” Children’s Songbook, 58.
Panangpadur-as iti Bukod a Panagadal
Yarigmo dagiti nasantuan a kasuratan iti biagmo. Bayat ti panagbasam, ibilangmo no kasano a maaramat dagiti estoria ken pannursuro kadagiti nasantuan a kasuratan iti biagmo. Kas pagarigan, kasano a makaparegta kenka ti kinapudno ni Jose sadiay Egipto tapno agtalinaed a napudno iti Apo iti laksid ti rigat?
Ladawan dagiti kabsat ni Jose a mangik-ikkat iti kagayna, ni Sam Lawlor