“Marso 7–13. Genesis 37–41: ‘Ni Jehova Siaadda Idi ken ni Jose,’” Umaykayo, Sumurot Kaniak—Para iti Primary: 2022 (2021)
“Marso 7–13. Genesis 37–41,” Umaykayo, Sumurot Kaniak—Para iti Primary: 2022
Panangiladawan ken ni Jose iti Egipto iti pagbaludan, ni Jeff Ward
Marso 7–13
Genesis 37–41
“Ni Jehova Siaadda Idi ken ni Jose”
Ania dagiti kinapudno manipud iti Genesis 37–41 ti kasapulan a nasaysayaat a maawatan dagiti ubbing iti klasem? Ikasom dagiti parikna a sumangbay kenka bayat ti panagsaganam a mangisuro.
Isuratmo dagiti Impresionmo
Yawis ti Panagbibinninglay
Ikkam dagiti ubbing iti sumagmamano a minuto a mangidrowing iti maysa a banag a nasursuroda manipud iti ebanghelio iti pagtaengan wenno iti simbaan. Idawat kadagiti ubbing a mangibinglay ken agsarita maipapan kadagiti drowingda.
Isuro ti Doktrina: In-inaudi nga Ubbing
Makapagbalinak a nasayaat iti pamiliak.
Nagilem dagiti kakabsat ni Jose kenkuana ket saan a nasayaat ti pannakilangenda kenkuana. Kasano a matulongam dagiti ubbing a mangipaawat iti kinapateg ti agbalin a nasayaat kadagiti dadduma, nangnangruna kadagiti miembro ti pamilia?
Dagiti Mabalin nga Aktibidad
-
Tapno isarita ti estoria ni Jose ken dagiti kakabsatna a lallaki manipud iti Genesis 37, mabalinmo nga usaren dagiti ladawan iti Umaykayo, Sumurot Kaniak—Para kadagiti Indibidual ken Pamilia wenno “Ni Jose iti Egipto” (iti Dagiti Estoria iti Daan a Tulag). Agpatulongka kadagiti ubbing babaen ti panangibinglayda kadagiti detalye nga ammoda maipapan iti estoria. Agdamagka kadakuada kadagiti saludsod a kas iti, “Kasano ti panangtangsit dagiti kakabsat ni Jose kenkuana?” Tulongam dagiti ubbing a mangpanunot kadagiti banag a mabalin koma nga inaramidda tapno maipakitada ti ayatda ken ni Jose. Ania ti nasken nga aramidentayo no makapungtottayo kadagiti miembro ti pamiliatayo?
-
Ipakitam ti ladawan ti maysa a pamilia (kitaen iti Libro ti Arte ti Ebanghelio, num. 112), wenno awisem dagiti ubbing nga mangidrowing kadagiti ladawan dagiti pamiliada. Kiddawem kadakuada a mangibinglay kadagiti wagas a makapagbalinda a nasayaat kadagiti miembro ti pamiliada.
-
Aggigiddan nga agkansion iti maysa a kanta maipapan iti panagayat kadagiti pamiliatayo, kas ti “A Happy Family” (Children’s Songbook,198). Ania ti mabalintayo nga aramiden tapno matulongan nga agbalin a naragsak dagiti pamiliatayo?
-
Pakoloran kadagiti ubbing ti panid ti aktibidad iti daytoy a lawas ken , iti nailatang nga espasio, agdrowing iti maysa a ladawan dagiti miembro ti pamilia iti kinasayaatda.
Matulongannak ti Dios no mapasamak dagiti dakes a banag.
Adu dagiti dakes a banag a napasamak ken ni Jose, ngem pinilina ti agtungpal kadagiti bilin ken adda kenkuana ti Apo. Makasursuro dagiti in-inaudi nga ubbing manipud iti daytoy a kayat ti Dios a tulongan ida kabayatan dagiti naririgat a panawen iti biagda.
Dagiti Mabalin nga Aktibidad
-
Iladawam ti sumagmamano a narigat a banag a napasamak ken ni Jose (kitaen iti Genesis 37:23–28; 39:20; wenno “Ni Jose ken dagiti Tagainepna” ken “Ni Jose iti Egipto,” iti Dagiti Estoria iti Daan a Tulag). Kalpasan nga insaritam kadagiti ubbing maipapan iti tunggal pagrigatan a napasaran ni Jose, awisem ida a mangulit iti, “Ni Jehova siaadda idi ken ni Jose” (Genesis 39:2).
-
Mangipakita kadagiti ladawan ti Mangisalakan a mangtultulong kadagiti tao a maipaspasango kadagiti karit (kitaen iti Libro ti Arte ti Ebanghelio, dagiti num. 40–43). Awisem dagiti ubbing a mangibinglay no kasano ti panangtulong ti Mangisalakan kadagiti tao. Ibinglaymo ti pammaneknekmo a matulongannatayo ti Mangisalakan no adda dagiti dakes a mapasamak kadatayo.
-
Agkansion iti maysa a kanta maipapan iti nadungngo nga ayat ti Mangisalakan kadatayo, kas iti “Jesus Is Our Loving Friend” (Children’s Songbook, 58). Ibinglay ti maysa a padas idi nariknam ti ayat ti Dios kabayatan ti maysa a nakarit a panawen. Ipakitam ti maysa a ladawan ni Jesus, ket awisem dagiti ubbing a mangibinglay no kasano ti mariknada maipapan Kenkuana.
Maballaagannak ti Dios iti pagpeggadan.
Tinulongan ti Dios ni Jose a makaawat a dagiti tagtagainep ni Faraon ket maysa a ballaag tapno agsagana para kadagiti narigat a panawen a sumangbay iti masanguanan. Tulongam dagiti ubbing a makaawat a maballaagan ida ti Dios iti peggad, agraman ti naespirituan a peggad.
Ni Josep a mangyul-ulog iti Tagtagainep ti Agparparti ken ti Agtintinapay, ni François Gérard
Dagiti Mabalin nga Aktibidad
-
Iwara dagiti ladawan ti makan iti lawlaw ti siled, ket awisen dagiti ubbing nga ummongenda ken “ipempen” dagitoy iti maysa a pagikabilan. Usarem daytoy nga aktibidad a mangibaga kadagiti ubbing maipapan no kasano a binallaagan ti Dios ni Faraon nga agsagana para iti maysa a panawen nga awanto ti taraon (kitaen iti Genesis 41:15–36, 47–57). Paidrowingmo kadagiti ubbing dagiti ladawan maipapan kadagiti banag a tinagtagainep ni Faraon ket kalpasanna usarem dagiti ladawanda a mangisuro kadagiti pamiliada iti pagtaengan.
-
Ipakita ti maysa a ladawan ti agdama a propeta. Ibagam kadagiti ubbing maipapan kadagiti pannursuro wenno ballaag nga inted ti Dios kadatayo babaen kenkuana. Ilawlawag a mabendisionan ken masalaknibantayto bayat ti panangtungpaltayo ti propeta. Awisem dagiti ubbing a yakem dagiti banag a maaramidda a mangtungpal iti pammagbaga ti propeta.
Isuro ti Doktrina: In-inauna nga Ubbing
No napudnoak, tulongannakto ti Dios kabayatan dagiti naririgat a panawen.
Nupay naaddaan ni Jose iti adu a naririgat a pannubok, nagtalinaed a napudno ken “ti Apo adda kenkuana” (Genesis 39:3). Makatulong dagiti padasna tapno marikna dagiti ubbing ti kinatalged a tulonganganto ida ti Dios kabayatan dagiti pannubok.
Dagiti Mabalin nga Aktibidad
-
Kiddawem kadagiti ubbing a mangsapul kadagiti balikas wenno ragupti balikas iti Genesis 39:1–3, 20–23; 41:38 a mangipakita nga adda ti Dios ken ni Jose kabayatan dagiti naririgat a panawenna. No mabalin, awisem dagiti ubbing nga agaramid iti maysa a bassit a pagilasinan a mangipakita ti maysa kadagiti ragup ti balikas a mabirukanda. Allukoyem ida a mangyawid kadagiti pagilasinanda tapnoi mangipalagip kadakuada nga addanto ti Dios kadakuada kabayatan dagiti pannubokda.
-
Awisem dagiti ubbing a mangibinglay no ania ti kapanunotanda iti kaipapanan ti ragup dagiti balikas nga “adda ti Apo ken ni Jose” (Genesis 39:2). Awisem ida a mangibinglay kadagiti padas idi nariknada nga adda kadakuada ti Dios wenno dagiti pamiliada kabayatan ti maysa a narigat a panawen. Ibinglay dagiti isu met la a padas manipud iti biagmo.
Makapagragsakak no mapasamak dagiti nasasayaat a banag kadagiti dadduma.
Ti apal ti nangiturong kadagiti kakabsat ni Jose tapno agaramidda kadagiti nakaam-amak a pili. Nasaktan ni Jose kadagiti biddut a pilida ket nasaktanda ti puso ti amada. Makatulong daytoy nga estoria kadagiti ubbing a mangpili iti agbalin a naragsak no bendisionan ti Apo dagiti dadduma.
Dagiti Mabalin nga Aktibidad
-
Awisem dagiti ubbing a mangrebyu iti Genesis 37:3–11 ken agdrowing kadagiti ladawan ti kagay ni Jose ken ti dua a tagtagainepna. Kasano ti narikna dagiti kabsat ni Jose maipapan ken ni Jose? Kasano koma a maigiddiat ti sungbatda? Ilawlawag no apay a napateg ti agbalin a naragsak no mapasamak dagiti nasayaat a banag kadagiti dadduma a tao.
-
Kiddawem kadagiti ubbing a mangibinglay kadagiti kasasaad a mabalin a pakariknaan iti ilem ti maysa a tao ti sabali pay a tao. Aggigiddan nga agkansion iti maysa a kanta maipapan iti panangipakita iti ayat kadagiti dadduma, kas iti “Love One Another” (Children’s Songbook, 136–37). Yunay-unay a makatulong kadatayo ti Nailangitan nga Ama a mangsukat iti rikna ti apal iti rikna ti ayat.
Babaen iti tulong ti Apo, maadaywak ti sulisog.
Kas iti pannakaipasango dagiti ubbing a sursuruam kadagiti sulisog iti unos ti panagbiagda, makagun-odda iti pigsa manipud iti pagwadan ni Joseph nga umadayo iti sulisog.
Dagiti Mabalin nga Aktibidad
-
Ipakitam ti maysa a ladawan da Jose ken ti asawa ni Potipar (kitaen iti Libro ti Arte ti Ebanghelio, num. 11), ket ibinglay ti estoria iti Genesis 39:7–12. Kasano a napagkedkedan ni Jose ti sulisog? Tulongam dagiti ubbing a mangsapul kadagiti balikas iti Genesis 39:7–12 a mangsungbat iti daytoy a saludsod—kas pagarigan, ammo ni Joseph a no kaduaenna ti asawa ni Potipar “basol iti Dios” (bersikulo 9).
-
Awisem dagiti ubbing a mangpanunot kadagiti situasion a dagiti ubbing a kataebda ket mabalin a masulisog nga agaramid iti saan nga umno a pili. Kiddawem kadakuada a mangyakem no kasano a masurotda ti pagwadan ni Jose kadagitoy a kasasaad—kas pagarigan, ania dagiti sumagmamano a wagas a malagiptayo ti Dios no masulisogtayo?
-
I-display ti dua a magnet, a mangibagi iti Dios ken ni Satanas, ken maysa a bassit a metal a banag kas iti paper clip, a mangibagi kadatayo. Usaren dagiti magnet a mangiladawan a no as-asidegtayo iti Dios, napigpigsa ti impluensiana kadatayo, ket pudno a kasta met no umas-asidegtayo ken ni Satanas. Ania ti maaramidtayo tapno agtalinaedtayo nga as-asideg iti Dios? Kasano a makatulong ti Espiritu Santo kadatayo?
Yallukoy ti Panagsursuro iti Pagtaengan
Awisem dagiti ubbing a mangibinglay kadagiti wagas a pangileppasanda iti sumaganad a binatog: “Makapagbalinak a kas ken ni Jose babaen ti .” Kiddawem kadakuada nga ibinglayda kadagiti pamiliada no kasano a naileppasda ti binatog.
Panangpadur-as iti Panangisurotayo
Yawis ti Panagbibinninglay Bayat ti panangilawlawagmo kadagiti pagbatayan ti ebanghelio, kiddawem kadagiti ubbing a mangibinglay kadagiti kapanunotan, rikna, ken padasda. Maammuamto nga addaanda kadagiti napnuan kaipapanan a nalawag a pannakaammo ken pannakaawat.