Ni Moises ken ti Maur-uram a Bassit a Kayo, ni Harry Anderson

Marso 21–27

Exodo 1–6

“Linagipkon ti Tulagko”

Irugim ti panagsaganam a mangisuro babaen ti panangbasam iti Exodo 1–6. Daytoy a balabala ita a lawas iti Umaykayo, Sumurot Kaniak—Para kadagiti Indibidual ken Pamilia ket makatulong kenka tapno maawatam dagitoy a kapitulo, ken daytoy a balabala ti makaited kenka kadagiti kapanunotan iti panangisuro.

Isuratmo dagiti Impresionmo

Yawis ti Panagbibinninglay

Mangipakita iti sumagmamano a banag a mainaig kadagiti pakaammuan kadagitoy a kapitulo—kas pagarigan, maysa a dakkel a basket wenno maysa a munieka ti maladaga. Awisem dagiti ubbing nga usaren dagitoy a banag a mangibinglay kadagiti paggugustoda a paset ti estoria ni Moises.

Isuro ti Doktrina: In-inaudi nga Ubbing

Exodo 1–2

Babaen kaniak maaramid ti Dios ti trabahona a mangipatungpal kadagiti panggepna.

Adda maysa a kangrunaan nga akem ni Moises iti pannakawayawaya ti Israel manipud iti pannakaadipen. Ngem saanna koma a kinabaelan nga impatungpal daytoy no di sinalakniban ken inaywanan ti inana, kabsatna a babai, anak a babai ni Faraon, ken dagiti dadduma pay a napudno a babbai.

Dagiti Mabalin nga Aktibidad

• Usarem ti panid ti aktibidad iti daytoy a lawas ken “Miriam” (iti Dagiti Estoria iti Daan a Tulag) tapno isarita kadagiti ubbing no kasano nga inaywanan da Jochebed (ina ni Moises), Miriam (kabsatna a babai), ken ti babai nga anak ni Faraon ni Moises. Yunay-unay a gapu kadagitoy ken dadduma pay a napudno a babbai, naaywanan a natalged ni Moises ken iti maysa nga aldaw idauluannanto ti Israel iti kinatalged. Awisem dagiti ubbing a mangidrowing iti ladawan dagiti tao a mangay-aywan kadakuada.

  

  Ni Moises iti Mulmula a Runo, © Providence Collection/licensed from goodsalt.com

• Aggigiddan nga agkansion iti maysa a kanta maipapan iti panagserbi, kas iti “‘Give,’ Said the Little Stream” (Children’s Songbook, 236). Tulongam dagiti ubbing a mangpanunot kadagiti simple a banag a maaramidda a mangtulong kadagiti dadduma iti pagtaengan, iti simbaan, ken iti pagadalan.

Exodo 3

Tulongannakto ni Jesus nga agaramid kadagiti nasayaat a banag.

Nadanagan ni Moises maipapan iti no maisalakanna met laeng dagiti Israelita manipud iti Egipto. Ngem inkari ti Apo a tulonganna ni Moises. Tulongam dagiti ubbing a makagun-od iti pammati a tulonganto met ida ti Mangisalakan.

Dagiti Mabalin nga Aktibidad

• Isaritam kadagiti ubbing maipapan iti no kasano nga inikkan ti Apo ni Moises iti napateg a trabaho nga aramidenna. Basaem dagiti napili a bersikulo manipud iti Exodo 3, wenno basaem ti “Ni Moses a Propeta” (iti Dagiti Estoria iti Daan a Tulag). Ibinglay no ania ti narikna ni Moises (kitaen iti Exodo 3:6, 11) ken no ania ti imbaga ti Apo kenkuana (kitaen dagiti bersikulo12 ken 14). Awisem dagiti ubbing a mangulit kenka ti ragup dagiti balikas a “Awan duadua nga addaakto kenka,” ket iburaymo iti maysa a panawen idi adda ti Apo kenka idi adda maysa a banag a napateg nga aramidem para Kenkuana.

• Tulongam dagiti ubbing nga agpanunot kadagiti situasion no maidawat kadakuada nga agaramid iti maysa a banag a kasla narigat. Ilawlawag a kas iti panangtulong ni Jesus ken ni Moises, tulonganto met ida ni Jesus. Agkansion iti maysa a kanta maipapan iti no kasano a tulongannatayo ni Jesus, kas iti “I Will Walk with Jesus” (ChurchofJesusChrist.org). Paneknekam a tulongannatayto ti Mangisalakan no maburiboran wenno mabutengtayo.

• Gumetteng kadagiti sinan-puso a papel ket suratan dagitoy kadagiti wagas a pakatulongan ti Apo kadagiti ubbing. Ikabil dagiti puso a nakapakleb iti suelo. Awisem dagiti ubbing nga agsisinnublat iti panangpili kadagiti sinan-puso, ket tulongam ida a mangbasa no ania ti nakasurat kadagitoy.

Exodo 3:1–5

Makapagbalinak a managraem kadagiti nasantuan a lugar.

Usarem ti estoria ni Moises ken ti maur-uram a bassit a kayo a mangtulong kadagiti ubbing a makaawat no apay a tratuentayo nga addaan panagraem dagiti sagrado a banag.

Dagiti Mabalin nga Aktibidad

• Basaem ti Exodo 3:1–5, ket ilawlawag nga impakita ni Moises ti panagraem babaen iti panangikkatna kadagiti sapatosna. Ania ti aramidentayo tapno maipakita ti panagraem iti simbaan? Agkansion iti maysa a kanta maipapan iti panagraem, kas iti “Reverence Is Love” (Children’s Songbook, 31). Tulongam dagiti ubbing a mangilasin kadagiti balikas iti kanta a mangisuro kadatayo no kasano a maipakitatayo ti panagraem. Apay a kayat ti Apo nga agbalintayo a managraem?

• Ipakitam dagiti sumagmamano a ladawan dagiti kasasaad a nasken a managraemtayo ken sumagmamano a saantayo a kasapulan ti agbalin a managraem, kas iti miting ti sakramento, kararag, parke ken birthday party. Awisem dagiti ubbing a paglalasinen dagiti ladawan tapno ipakita no sadino ti nasken nga agbalin a managraem.

• Awisem dagiti ubbing a mangidrowing iti ladawan ti bagbagida, ken mangitudo kadagiti ladawan bayat ti panangilawlawagmo kadagiti wagas a pakapagbalinanda a managraem iti nadumaduma a paset ti bagida, a kas iti mata, lapayag, ngiwat, ima, ken saka.

Isuro ti Doktrina: In-inauna nga Ubbing

Exodo 1–2

Agtrabaho ti Dios babaen ti tunggal maysa kadatayo tapno maipatungpal dagiti panggepna.

Adu a tao ti nakatulong a mangipatungpal kadagiti panggep ti Dios babaen ti pannakasalaknib ti biag ti agtutubo a ni Moises. Kasano a matulongam dagiti ubbing a sursuruam a maawatanda ti napateg a papel nga akmentayo amin iti pannakaipatungpal ti pagayatan ti Dios?

Dagiti Mabalin nga Aktibidad

• Awisem dagiti ubbing a mangibinglay no ania ti ammoda maipapan ken ni Moses idi maysa a maladaga daytoy. Usarem daytoy panid ti aktibidad iti daytoy a lawas ken Exodo 1:22; 2:1–10 a manggupgop iti estoria ti kinaubing ni Moises. Basaem dagiti reperensia ti nasantuan a kasuratan iti panid ti aktibidad, ken saludsodem kadagiti ubbing no ania ti inaramid ti tunggal babai a nangtaginayon ti biag ni Moises.

• Ibagam kadagiti ubbing maipapan kadagiti tao a daydayawem gapu iti kinapudnoda iti panagserbi iti Dios ken kadagiti adda iti lawlawda, uray no agserbida iti babassit a wagas. Awisem dagiti ubbing a mangisarita maipapan kadagiti tao nga am-ammoda a nagserbi a sipupudno iti Dios ken iti dadduma. Ania ti pasettayo iti aramid ti Dios?

Exodo 3–4

Tulongannakto ti Apo a mangipatungpal iti pagayatanna.

Narikna ni Moises nga adda pagkuranganna para iti takemna, ngem inkari ti Apo a kaduaennanto ni Moises ket tulonganna. Kasano a mabalin a mangparegta daytoy a pakaammuan kadagiti ubbing a sursuruam?

Dagiti Mabalin nga Aktibidad

• Iti panangusar iti pakaammuan iti Exodo 3; 4:1–17, pagsisinnublatem dagiti ubbing nga agpammarang nga isuda ni Moises. No mabalin, mangitugot iti props ngausarenda, kas iti maysa a flaslight] ken maysa a mula a mangibagi iti sumsumged a bassit a kayo.

• Kiddawem kadagiti ubbing a mangbasa iti Exodo 3:11; 4:1, 10 ket ammuem no kasano ti narikna ni Moises maipapan iti panangkiddawna ken ni Faraon a palubosanna dagiti Israelita a pumanaw. Kaano a naaddaanda kadagitoy kastoy met laeng a rikna? Ania a balakad ti ibinglay dagiti ubbing ken ni Moises a makatulong kenkuana? Tulongam ida a mangtakuat no kasano a pinaregta ti Apo ni Moises (kitaen iti Exodo 3:12; 4:2–9, 11–12).

• Ibinglaymo ti maysa a padas idi nariknam a tultulongannaka ti Dios nga ipatungpal ti maysa a takem wenno agserbi Kenkuana iti sumagmamano a wagas. Awisem dagiti ubbing a mangibinglay iti maysa a panawen idi tinulongan ida ti Dios.

Exodo 3:1–5

Makapagbalinak a managraem kadagiti nasantuan a lugar.

Indawat ti Apo ken ni Moises a mangikkat kadagiti sapatosna iti maur-uram a bassit a kayo kas maysa a tanda ti panagdayaw ken panagraem. Kasano a mausarmo daytoy a pakaammuan a mangisuro kadagiti ubbing maipapan iti panagraem?

Dagiti Mabalin nga Aktibidad

• Basaem ti Exodo 3:1–5, ken kiddawem kadagiti ubbing a gupgopenda dagitoy a bersikulo iti bukodda a balikas. Ania ti maaramidtayo a mangipakita iti panagraem kadagiti nasantuan a lugar, kas iti simbaan wenno iti templo? Tulongam dagiti ubbing nga agaramid kadagiti “supot ti panagraem” a yawidda a naglaon kadagiti akikid a papel nga addaan kadagiti kapanunotan maipapan iti no kasano ti agbalin a managraem. Awisem ida a mangibinglay kadagitoy a kapanunotan kadagiti pamiliada.

• Aggigiddan nga agkansion iti maysa a kanta maipapan iti panagraem, kas iti “Reverence is Love” (Children’s Songbook, 31), ket idawat iti tunggal ubing nga isurat ken ibinglayna ti kaipapanan ti panagraem a maibatay kadagiti balikas ti kanta.

• Usaren ti ladawan ni Jesus a Mangdaldalus iti Temploi (Libro ti Arte ti Ebanghelio, num. 51) a mangisarita iti estoria iti Mateo 21:12–13. Kasano a maigiddiat ti ugali ni Moises iti Exodo 3:1–5 kadagiti ugali dagiti agsuksukat ti kuarta? Apay a tarigagayan ti Mangisalakan a tratuentayo nga addaan iti panagraem dagiti sagrado a banag?

Yallukoy ti Panagsursuro iti Pagtaengan

Tapno matulongam dagiti ubbing a mangibinglay kadagiti nasursuroda manipud iti Exodo 1–6, allukoyem ida nga agdrowing iti maysa a ladawan ti tao a nasursuroda iti klase tapno ibinglay iti pamiliada.

Panangpadur-as iti Panangisurotayo

Mangted iti pagsayaatan kadagiti ubbing ti panangulit-ulit. Saanka nga agbuteng a mangulit kadagiti aktibidad iti mamin-adu a gundaway nangnangruna kadagiti in-inaudi nga ubbing. Daytoyto ti mangtulong kadagiti ubbing a manglagip no ania ti isurom.