“Marso 28–Abril 3. Exodo 7–13: ‘Laglagipenyo Daytoy nga Aldaw Isu a Panagtalawyo iti Egipto’” Umaykayo, Sumurot Kaniak—Para iti Primary: Daan a Tulag 2022 (2021)
“Marso 28–Abril 3. Exodo 7–13,” Umaykayo, Sumurot Kaniak—Para iti Primary: 2022
Panangiladawan kada Moises ken Aaron iti korte ni Faraon, ni Robert T. Barrett
Marso 28–Abril 3
Exodo 7–13
“Laglagipenyo Daytoy nga Aldaw Isu nga Aldaw a Panagtalawyo iti Egipto”
Bayat ti panangbasam iti Exodo 7–13, panunotem no kasano a patibkeren dagiti kinapudno kadagitoy a kapitulo ti pammatim ken ni Jesucristo? Kasano a matulongam dagiti ubbing a sursuruam a maaddaan iti isu met laeng a padas?
Isuratmo dagiti Impresionmo
Yawis ti Panagbibinninglay
Ikabil ti sumagmamano a ladawan a mangibagi kadagiti banag iti Exodo 7–13 (kas iti maysa a tukak, adu a ngilaw, ken maysa a kordero) a naabbongan iti lupot iti rabaw ti lamisaan. Awisem ti sumagmamano nga ubbing a mangala iti maysa kadagiti ladawan manipud iti sirok ti lupot, ken awisem ti klase a mangibinglay no ania ti nasursuroda maipapan iti daytoy a ladawan iti pagtaengan itoy a lawas.
Isuro ti Doktrina: In-inaudi nga Ubbing
Addaan ti Apo iti bileg kadagiti amin a banag.
Nakabalud dagiti Israelita ket dida mawayawayaan ti bagbagida, ngem impakita ti Apo ti bilegna ket inispalna ida. Kasano a mausarmo daytoy nga estoria tapno matulongam dagiti ubbing nga agtalek iti Apo ken ti bilegna?
Dagiti Mabalin nga Aktibidad
-
Basaem dagiti napili a bersikulo manipud iti Exodo 7–11 a mangisuro kadagiti ubbing maipapan ti sangapulo nga angol nga imbaon ti Apo kadagiti taga-Egipto (kitaen met iti “Ni Moises a Propeta,” iti Dagiti Estoria iti Daan a Tulag). Awisem dagiti ubbing nga agdrowing kadagiti ladawan a mangipakita iti sumagmamano kadagiti angol. Kiddawem nga ingato dagiti ubbing dagiti ladawanda bayat ti panangrebyum manen kadagiti angol. Basaem dagiti ragup ti balikas manipud iti Exodo 7:5 ken 9:14 a mangilawlawag no apay imbaon ti Apo dagiti angol iti Egipto.
-
Ibinglay kadagiti ubbing no kasano nga impakita ti Apo kenka “nga awan sabali a kas [Kenkuana] iti amin a daga” (Exodo 9:14). Kiddawem kadagiti ubbing a mangibinglay no kasano nga ammodaa nabileg ti Apo.
Makatulong kaniak ti sakramento a manglagip ken ni Jesus.
Insuro ti Fiesta ti Paskua dagiti Israelita maipapan iti Mangisalakan ken ti sakripisiona nga iti maysa nga aldaw aramidennanto para kadatayo. Ita, makiranudtayo iti sakramento a manglaglagip iti sakripisio ni Jesucristo.
Tulongannatayo ti sakramento a manglagip ken ni Jesucristo.
Dagiti Mabalin nga Aktibidad
-
Babaen ti panangusar iti Exodo 12:1–13, isarita kadagiti ubbing no ania ti imbaga ti Apo kadagiti Israelita nga aramiden tapno maisalakanda manipud iti maudi nga angol (kitaen met iti “Ti Fiesta ti Paskua,” iti Dagiti Estoria iti Daan a Tulag). Ipakita ti ladawan ni Jesus a Mangub-ubba iti Napukaw a Kordero (Libro ti Arte ti Ebanghelio, num. 64), ken ilawlawag dagiti pagpapadaan ti kordero a nausar iti Fiesta ti Paskua ken ni Jesucristo, ti Kordero ti Dios.
-
Kiddawem kadagiti ubbing a manginagan kadagiti banag nga aramidentayo a manglagip kadagiti napapateg a pasamak kas kadagiti panagkasangay ken dagiti fiesta opisial [holiday]. Basaem ti Exodo 13:10, ket ilawlawag nga indawat ti Apo kadagiti annak ti Israel a mangrambak iti Fiesta ti Paskua ti tunggal tawen tapno makatulong kadakuada a manglagip nga Isu ti nangisalakan kadakuada manipud kadagiti Egipsio. Ania dagiti sumagmamano a wagas a mabalin a pakalagipantayo nga insalakannatayo ni Jesus manipud iti basol ken patay?
-
No mabalin, sarungkaram ti lamisaan ti sakramento a kaduam dagiti ubbing, ket isaritam no kasano a tulongannatayo ti sakramento a manglagip ken ni Jesuscristo. Aggigiddan a mangkanta iti “The Sacrament” (Children’s Songbook, 72) wenno sabali pay a naraem a kanta maipapan ken ni Jesucristo. Tulongam dagiti ubbing a mangbigbig iti natalna a riknada no panunotenda maipapan iti Mangisalakan, ken awisem ida a maaddaan iti dayta a rikna no makiranudda iti sakramento.
-
Ikkam dagiti ubbing iti papel a nasuratan iti balikas a “Malagipko ni Jesucristo bayat ti sakramento babaen iti …”a naisurat iti ngato. Awisem dagiti ubbing nga agdrowing kadagiti ladawan a mabalinda a kitaen bayat iti sakramento tapno makatulong kadakuada a manglagip ken ni Jesus.
Isuro ti Doktrina: In-inauna nga Ubbing
Addaan iti bileg ti Apo a mangisalakan kaniak.
Maipasango dagiti ubbing kadagiti karit ken kasapulanda ti Apo a mangtulong kadakuada. Makatulong kadagiti ubbing ti estoria maipapan iti sangapulo nga angol nga impatulod ti Apo kadagiti Israelita tapno maawatan nga adda pay bilegna a mangtulong kadakuada.
Dagiti Mabalin nga Aktibidad
-
Ikkam ti tunggal ubing iti maysa a papel a nabingay iti sangapulo a benneg, ken awisem dagiti ubbing a mangidrowing kadagiti ladawan dagiti angol a nailadawan kadagitoy a bersikulo: Exodo 7:17–18; 8:1–4; 8:16–17; 8:20–22; 9:1–6; 9:8–9; 9:22–23; 10:4–5; 10:21–22; 11:4–7. Ania ti isuro kadatayo dagiti angol maipapan iti bileg ti Dios? Apay a napateg a maammuantayo maipapan ti bilegna?
-
Kiddawem kadagiti ubbing maipapan kadagiti panawen idi nariknada a kasapulanda ti tulong ti Apo. Kasano a matulongannatayo kadagitoy a kasasaad? Allukoyem ida nga agsarita maipapan kadagiti panawen idi napadasanda wenno ti pamiliada ti bileg ti Apo iti biagda. Iburaymo ti pammaneknekmo nga adda bileg ti Apo a mangtulong kadatayo.
Matulongannak ti Apo a maaddaan iti nalukneng a puso.
Pinili ni Faraon a patangkenen ti pusona idi imbaga ti Apo kenkuana a palusposanna dagiti annak ti Israel. Kasano a maparegtam dagiti ubbing a sursuruam a mangpili a maaddaan iti nalukneng a puso tapno natallugodda nga agserbi iti Apo ken agaramid iti pagayatanna?
Dagiti Mabalin nga Aktibidad
-
Mangitugot iti klase iti maysa a natangken a banag, kas iti maysa a bato, ken maysa pay a nalukneng a banag, kas iti maysa nga espongha [sponge]. Basaem a kaduam dagiti ubbing ti sumagmamano a bersikulo a mangiladawan no kasano a nagresponde ni Faraon kadagiti angol nga impatulod ti Apo (kitaen iti Exodo 8:28–32; 9:7), ket damagem kadagiti ubbing no ania a banag ti kasayaatan a mangiladawan iti puso wenno galad ni Faraon. Ania ti kaipapanan ti maaddaan iti nalukneng a puso? (kitaen iti Mosiah 3:17).
-
Kaduam ti klase, ilista ti sumagmamano a tignay a mabalin a mangipakita nga adda natangken a pusotayo (kas pagarigan, pannakiapa iti maysa a kabsat wenno saan a panagtallugod nga agkararag). Kasano a maipakitatayo iti Apo a kayattayo ti maaddaan iti nalukneng a puso?
Isimbolo ti Fiesta ti Paskua ti pangsubbot a bileg ni Jesucristo.
Insuro ti Fiesta ti Paskua kadagiti annak ti Israel nga insalakan ti Apo ida manipud iti Egipto. Isimbolo pay ti Fiesta ti Paskua ti panangsubbot a sakripisio ni Jesucristo, a mangispal kadatayo iti basol ken ipapatay. Ita, tulongannatayo ti sakramento a manglagip iti sakripisio ni Jesucristo para kadatayo. Ti panangisuro kadagiti ubbing maipapan iti Fiesta ti Paskua keti makatulong kadakuada a maaddaan iti napatpateg a padas iti sakramento.
Dagiti Mabalin nga Aktibidad
-
Kiddawem iti sumagmamano nga ubbing a mangbasa iti Exodo 11:5–6 tapno masursuro maipapan iti maudi nga angol nga impatulod ti Apo kadagiti Egipsio. Kiddawem iti dadduma pay nga ubbing a mangbasa iti Exodo 12:3, 5–7, 13 tapno maammuan no kasano a naisalakan dagiti annak ti Israel manipud iti dayta nga angol.
-
Tapno matulongam dagiti ubbing a makaawat a ti Mangisalakan ti Kordero a mangispal kadatayo, mangipakitaka iti ladawan ti maysa a kordero. Awisem dagiti ubbing a mangbasa iti Exodo 12:3–7 tapno maammuan no ania a kita ti kordero ti kayat ti Dios nga usaren dagiti tao para iti makan iti Fiesta ti Paskua. Kasano a maipada daytoy a kordero ken ni Jesucristo? (Kas pagarigan, naan-anay ni Jesus, ken imbukbok ni Jesus ti darana a mangisalakan kadatayo.) Ania dagiti dadduma pay a simbolo a makatulong kadatayo a mangpanunot ken ni Jesucristo?
-
Aggigiddan a basaen dagiti kararag iti sakramento (kitaen iti Doktrina ken Katulagan 20: 77, 79), ken buyaen ti video “Always Remember Him” (ChurchofJesusChrist.org). Kasano a maipada ti sakramento iti Fiesta ti Paskua? Ania ti maaramidtayo a panglaglagip ken ni Jesus kabayatan ti sakramento?
-
Ibinglay kadagiti ubbing ti maysa a paggugustom a himno ti sakramento (kitaen iti Hymns, nos. 169–96), ket isaritam no kasano a nakatulong kenka a manglagip iti sakripisio ti Mangisalakan. Awisem dagiti ubbing a mangibinglay ti maysa a himno a mangaramid iti kasta met laeng kadakuada.
Yallukoy ti Panagsursuro iti Pagtaengan
Awisem dagiti ubbing a mangibinglay iti pamiliada iti maysa a banag a nasursuroda maipapan ken ni Jesucristo iti Primary ita nga aldaw.
Panangpadur-as iti Panangisurotayo
Tulongam dagiti ubbing a mangiladawan iti panunotda maipapan iti estoria. No addaan dagiti ubbing iti bisual a ladawan ti ania man a sursuruenda, ad-adda a malagipda daytoy. Mangsapul kadagiti wagas a pakatulongan kadagiti ubbing a mangiladawan iti panunotda dagiti estoria iti nasantuan a kasuratan nga usaren dagiti pangtulong a ladawan kas dagiti ladawan, drowing, video, puppet, wenno skit.