bantay

Ti maysa a bantay iti Egipto ti patien a kasisigud a Bantay ti Sinai.

Abril 18–24

Exodo 18–20

“Amin a Sinao ni Jehova Aramidenminto”

Bayat ti panangbasam iti Exodo18–20, panunotem maipapan kadagiti pagbatayan nga agbalinto a kapatgan kadagiti ubbing. Mabalin a makaparegta kenka a mangyunay-unay iti maysa a pagbatayan ngem dagiti sabali a naisingasing iti baba.

Isuratmo dagiti Impresionmo

icon iti panagbibinninglay

Yawis ti Panagbibinninglay

Awisem dagiti ubbing a mangibinglay iti maysa kadagiti Sangapulo a Bilin (wenno mangrebyu iti sumagmamano a bilin kadakuada) ken no apay a mariknada a napateg ti agtungpal iti dayta a bilin.

icon iti panangisuro

Isuro ti Doktrina: In-inaudi nga Ubbing

Exodo 18:8–12

Ti panangibinglay iti pammaneknekko ket mabalin a mangbendision kadagiti dadduma.

Nagrag-o ni Jetro idi ibinglay ni Moises no ania ti inaramid ti Apo para kadagiti annak ti Israel. Makaparegta daytoy nga estoria kadagiti ubbing a sursuruam a mangibinglay kadagiti dadduma no ania ti ammoda a pudno.

Dagiti Mabalin nga Aktibidad

• Ibasam kadagiti ubbing dagiti sumaganad a balikas manipud iti Exodo 18:8: “Ket ni Moises sinaritana ken katuganganna amin nga inaramid ti Apo.” Saludsodem kadagiti ubbing no malagipda no ania ti inaramid ti Apo a mangtulong kadagiti annak ti Israel nga aglibas manipud sadiay Egipto. (Tapno makatulong kadakuada a manglagip, ipakitam dagiti ladawan wenno dagiti panid ti aktibidad manipud kadagiti napalabas nga adalen). Ania dagiti banag nga inaramid ti Apo a makatulong kadatayo? Tulongam dagiti ubbing a mangammo a kas ken ni Moises, maisaritatayo iti dadduma a tao maipapan kadagiti naindaklan a banag nga inaramid ti Apo para kadatayo.

• Mabalin a maysa a napintas a lugar ti klase ti Primary a pagsanayan dagiti ubbing iti panangibinglay iti simple a pammaneknek. Iburaymo ti pammaneknekmo kadakuada, ken tulongam ida a mangibinglay iti tunggal maysa kadagiti kinapudno ti ebanghelio a patienda.

Exodo 20:3–17

Mangted ti Dios kadagiti bilin gapu ta kayatnak nga agbalin a naragsak.

Dagiti bilin ket dagiti pangiturong ti Nailangitan nga Ama iti panangsapul iti talna iti daytoy a biag ken rag-o iti kinaagnanayon. Kasano a maallukoymo dagiti ubbing nga agtulnog kadagiti bilin ti Dios?

Dagiti Mabalin nga Aktibidad

• Mangipakita kadagiti ladawan manipud iti “The Ten Commandments” (iti Dagiti Estoria iti Daan a Tulag), ket awisem dagiti ubbing a mangibinglay iti ammoda maipapan iti estoria. Tulongam ida a makaawat iti ania man kadagiti paset ti estoria a saanda pay nga ammo.

• Bayat ti panangibasam kadagiti ubbing ti sumagmamano kadagiti bilin manipud iti Exodo 20:3–17 (wenno usarem dagiti balikas a maawatanda), paingatom kadakuada dagiti tanganda [thumbs up] no ti bilin ket maipapan iti maysa a banag a nasken nga aramidentayo ken paibabam dagiti tanganda [thumbs down] no maipapan daytoy iti maysa a banag a nasken a ditayo aramiden. Ibinglaymo dagiti pammaneknekmo maipapan iti kinaragsak a sumangbay manipud iti panagtulnog kadagiti bilin ti Dios (kitaen iti Mosiah 2:41).

• Makipagkanta kadagiti ubbing iti maysa a kanta maipapan iti no kasano a bendisionannatayo ti Nailangitan nga Ama no tungpalentayo dagiti bilin, kas iti “Keep the Commandments” (Children’s Songbook, 146–147). Awisem dagiti ubbing a dumngeg kadagiti balikas tapno maammuan no ania dagiti bendision a maawattayo no agtungpaltayo.

Exodo 20:12

Makapagdayawak kadagiti nagannak kaniak.

Ti panangdayaw kadagiti nagannak ket iramanna ti ad-adu pay ngem iti panagtungpal laeng kadagitoy. Tulongam dagiti ubbing a makaawat kadagiti dadduma pay a wagas a pakadayawanda kadagiti nagannak kadakuada.

Dagiti Mabalin nga Aktibidad

• Tulongam dagiti ubbing a makasursuro iti ragup ti balikas a “Dayawem ni amam ken ni inam” (Exodo 20:12). No kasapulan, ilawlawagmo a ti “agdayaw” iti maysa a tao kaipapananna ti mangipakita iti panagraem kadakuada wenno mangyeg kadakuada iti ragsak. Ania ti inaramid ni Jesus a nagdayaw iti Nailangitan nga Amana? Kasano a dinayawna ti inana? (kitaen iti Lucas 2:48–51; Juan 19:26–27). Tulongam dagiti ubbing nga agpanunot kadagiti banag a mabalinda nga aramiden nga agdayaw kadagiti nagannak kadakuada, ken payakemmo kadakuada dagiti kapanunotanda.

• Awisem dagiti ubbing nga agaramid it maysa a pagyaman a kard [thank-you card] para kadagiti nagannak kadakuada. Mabalinda ti agsurat wenno agdrowing iti uneg ti kard iti maysa a banag nga aramidendanto a pagdayaw kadagiti nagannak kadakuada.

icon iti panangisuro

Isuro ti Doktrina: In-inauna nga Ubbing

Exodo 18:13–26

Makatulongak a “makipagannong” iti aramid ti Apo.

Nasursuro ni Moises a ti panangpadas a mangiturong kadagiti annak ti Israel nga is-isu ket “saan a naimbag” (Exodo 18:17). Ti panagayat ken panagserbi iti tunggal maysa ket makatulong a mapalag-an dagiti dagensen dagiti lidertayo.

Dagiti Mabalin nga Aktibidad

• Awisem dagiti ubbing nga agdrowing iti adu a nagtimbukel iti pisarra a mangibagi kadagiti miembro ti ward. Mangidrowing iti nagtimbukel a namarkaan ti bishop. Apay a problema no ti bishop laeng ti maymaysa laeng a mangtulong iti tunggal maysa? Aggigiddan a basaen ti Exodo 18:13–26 tapno ammuen no ania a balakad ti inted ni Jetro idi padpadasen ni Moises nga aramiden iti amin a banag nga agmaymaysa. Pasuratam kadagiti ubbing ti dadduma pay a nagbubukel a mangibagi iti dadduma pay a lider iti ward ken dagiti miembro a tumultulong iti bishop nga agserbi iti dadduma. Kasano a maaramid dagiti dadduma a lider ken miembro a nalaglag-an ti dagensen ti bishop? Kasano a maaramidtayo ti isu met laeng para kadagiti lider ti wardtayo? para kadagiti nagannaktayo iti pagtaengan?

• Awisem dagiti ubbing a mangilista iti pisarra dagiti lider iti wardyo. Kas maysa a klase, pumili iti maysa ket ilawlawag no ania ti ar-aramiden daytoy a tao a mangipatungpal iti aramid ti Apo ken no ania ti mabalin nga aramiden dagiti ubbing tapno makatulong.

  lalaki a makial-alamano iti maysa a babai

  Ti panagserbi kadagiti dadduma a tao ket maysa a wagas a pakatulongantayo iti aramid ti Apo.

Exodo 20:1–7

Napateg nga ipangpangrunatayo ti Apo iti biagtayo?

Addaantayo amin kadagiti banag a mabalin a pakasulisogantayo nga ipangpangruna sakbay ti Dios iti biagtayo. Kasano a matulongam dagiti ubbing a makaawat no ania ti kayat a sawen ti ipangruna nga umuna ti Nailangitan nga Ama?

Dagiti Mabalin nga Aktibidad

• Aggiddan a basaen ti Exodo 20:1–7, ken ilawlawag a ti ania man a banag nga ipangpangrunatayo sakbay ti Dios iti biagtayo ket agbalin a kas iti “dadduma a dios” ken “kinitikitan a [lad]ladawan” a nadakamat kadagiti bersikulo 3–4. Saludsodemem kadagiti ubbing no apay a kayat ti Nailangitan nga Ama nga Isu ti umuna nga ipangpangrunatayo. Ania dagiti bendision nga ikarina kadatayo no aramidentayo? Saludsodem kadagiti ubbing no kasano a maiipakitatayo iti Nailangitan nga Ama nga Isu ti napatpateg ngem iti ania man a banag iti panagbiagtayo.

• Panunotem ti maysa nga aramid nga addaan iti napateg nga umuna nga addang, kas iti panangbuggo kadagiti imatayo sakbay a mangan wenno panagmedias sakbay nga agsapatos. Ania ti mapasamak no saantayo nga inaramid nga immun-una dagiti napapateg a banag? Kasano a maipada daytoy a panangipangpangruna iti Nailangitan nga Ama iti panagbiagtayo? Ibinglaymo ti pammaneknekmo no kasano a nagbendision kenka ti umuna a panangipangpangruna iti Dios, ken awisem pay dagiti ubbing a mangibinglay iti pammaneknekda.

• Agkanta maipapan iti Nailangitan nga Ama, kas iti “My Heavenly Father Loves Me” (Children’s Songbook, 228–29). Ania ti masursurotayo manipud iti kanta maipapan iti no apay a napateg nga umuna nga ipangpangruna ti Nailangitan nga Ama iti panagbiagtayo?

Exodo 20:3–17

Mangted ti Dios kadagiti bilin gapu ta kayatnak nga agbalin a naragsak.

Ad-adda a managtungpalto dagiti ubbing kadagiti bilin no makitada dagitoy a kas panangipeksa iti ayat ti Dios ken kas gundaway a pangyebkasan iti ayatda para Kenkuana.

Dagiti Mabalin nga Aktibidad

• Mangisaganaka kadagiti akikid ti papel a nasuratan kadagiti bilin iti Exodo 20:3–17 kadagitoy. Isuratmo dagiti numero a maysa agingga iti sangapulo, ket awisem dagiti ubbing nga ipan dagiti akikid a papel iti umisu nga urnos iti pisarra. Isaritam no kasano a masurottayo dagitoy a bilin. Para kadagiti kapanunotan, mabalinda a kitaen iti artikulo ti Gospel Topics “Ten Commandments” (topics.ChurchofJesusChrist.org).

• Awisem dagiti ubbing nga agdrowing kadagiti ladawan dagiti kangrunaan a balikas manipud kadagiti bilin a mangtulong kadakuada a manglagip kadagitoy.

• Isaritam ti estoria maipapan ken ni Chloe manipud iti mensahe ni Sister Carole M. Stephens “If Ye Love Me, Keep My Commandments” (Liahona, Nob. 2015, 118–20). Kasano a matulongannatayo ti estoria a makaawat no apay nga ikkannatayo ti Apo kadagiti bilin? Kasano a mangipakitatayo ti ayattayo iti Dios ti panagbalin a natulnog?

icon iti panagsursuro

Yallukoy ti Panagsursuro iti Pagtaengan

Awisem dagiti ubbing a mangpanunot iti maysa a banag a kayatda nga aramiden gapu iti no ania ti nasursuroda iti klase. Tulongam ida nga agaramid iti maysa a simple a pammalagip iti no ania ti aramidendanto a mayawidda iti pagtaengan.

Panangpadur-as iti Panangisurotayo

Tulongam dagiti ubbing a mangilasin iti Espiritu. Mailasin dagiti ubbing ti impluensia ti Espiritu. Isurom kadakuada a naggapu iti Espiritu Santo dagiti rikna a talna, ayat, ken bara nga adda kadakuada no agsarita wenno agkantada maipapan ken ni Jesucristo ken ti ebangheliona.

panid ti aktibidad: Matungpalko dagiti bilin