“Abril 25–Mayo 1 Exodo 24; 31–34: ‘Addaakto a Sumurot Kenka,’” Umaykayo, Sumurot Kaniak—Para iti Primary: Daan a Tulag 2022 (2021)
“Abril 25–Mayo 1 Exodo 24;31–34,” Umaykayo, Sumurot Kaniak—Para iti Primary: 2022
Ladawan ni Jehova iti panagparangna ken ni Moises ken ti 70 a panglakayen ti Israel, ni Jerry Harston
Abril 25–Mayo 1
Exodo 24; 31–34
“Addaakto a Sumurot Kenka”
Bayat ti panagsagana ni Moises a mangidaulo kadagiti annak ti Israel nga agturong iti naikari a daga, kinuna ti Apo, “Addaakto a sumurot kenka” (Exodo 33:14). Bayat ti panagsaganam a mangisuro kadagiti ubbing iti klasem, ibilangmo no kasano a maawismo ti presensia ti Apo a “sumurot [kadakayo].”
Isuratmo dagiti Impresionmo
Yawis ti Panagbibinninglay
Kiddawem iti tunggal ubing a mangala iti nanumeruan a papel a saanna a pilpilien. Usarem dagitoy a numero a mangikeddeng iti urnos a makaibinglay dagiti ubbing iti maysa a banag a masursuroda manipud kadagiti nasantuan a kasuratan, iti pagtaengan man wenno iti Primary.
Isuro ti Doktrina: In-inaudi nga Ubbing
Maysa a tanda ti ayatko para iti Apo ti panagdayaw iti aldaw ti Sabbath.
Imbaga ti Apo ken ni Moises nga idi nginilin dagiti annak ti Israel ti aldaw ti Sabbath, impakitada Kenkuana a tinarigagayanda ti agbalin a tattaona.
Dagiti Mabalin nga Aktibidad
-
Mangidrowing iti maysa a puso iti pisarra, ket kiddawen kadagiti ubbing no ania ti mabalin a kaipapanan daytoy a simbolo. Tulongam ida a mangpanunot kadagiti dadduma pay a banag a mabalin a maysa a tanda ti ayat, kas iti maysa nga arakup wenno aramid ti panagserbi. Ibasam kadakuada ti Exodo 31:13. Tulongam ida a makaawat a no ngilinentayo a nasantuan ti aldaw ti Sabbath, daytoy ti pagilasinan iti Apo nga ay-ayatentayo Isuna.
-
Isaritam kadagiti ubbing maipapan iti sumagmamano a wagas a pa a mangipakita iti ayatmo para iti Apo iti Sabbath. Paibinglaymo kadakuada no kasano nga aramidenda ken dagiti pamiliada daytoy. Awisem ida a mangusar iti panid ti aktibidad iti daytoy a lawas a mangibinglay iti ad-adu pay a kapanunotan.
Ladawandagiti ubbing ken nagannak iti pagtaenganBabaen ti panagdayaw iti Sabbath, ipakitatayo ti ayattayo iti Apo.
Mabalinko nga ipangruna nga umuna ti Apo iti biagko.
Bayat ti kaadda ni Moises iti Bantay Sinai a makisarsarita iti Apo, pinili dagiti annak ti Israel nga agdaydayaw iti bimmalitok a didiosen imbes koma a Kenkuana. Daytoy nga estoria ti makaipalagip kadagiti ubbing a sursuruam a nasken a ditayo ipalubos nga agbalin a napatpateg kadatayo dagiti dadduma a banag ngem ti Apo.
Dagiti Mabalin nga Aktibidad
-
Irebyu biit ti Sangapulo a Bilin kadagiti ubbing, a mangyunay-unay iti umuna a dua (kitaen iti Exodo 20:3–6). Usarem ti “Dagiti Sangapulo a Bilin” (iti Dagiti Estoria iti Daan a Tulag) a mangibinglay kadakuada iti estoria manipud iti Exodo 32:1–8, 19–24. No mabalin, agpatulongka kadagiti ubbing a mangisarita iti estoria. Tulongam dagiti ubbing a mangkita no ania ti inaramid a biddut dagiti Israelita iti daytoy nga estoria (mabalin a kayatmo nga ipalagip kadagiti ubbing ti umuna a dua kadagiti Sangapulo a Bilin). Ania koma ti nasken nga inaramid dagiti Israelita?
-
Ipakitam ti ladawan ni Jesucristo, karagpin dagiti ladawan dagiti dadduma pay a banag a mabalin a pangbubosan dagiti ubbing iti oras, kas dagiti abalbalay, games, ken dadduma pay. Idawatmo kadagiti ubbing a mangsapul kadagiti ladawan a mangipakita no ania ti nasken a kapatgan kadatayo. Ibinglaymo kadagiti ubbing no kasano a mabendisionanka gapu iti panangipangpagrunam nga umuna ti Apo iti biagmo—uray pay sakbay dagiti dadduma pay a banag a nasayaat.
Nakisao ti Apo ken ni Moises iti sangunsango.
Kalpasan a dinadadael ni Moises ti bimmalitok a baka, nakisao ti Apo ken ni Moises iti sangunsango, a kas makisao ti maysa a tao iti gayyemna.” Ammona a daytoy ti mabalin a mangpatibker iti pammati dagiti ubbing a pudno a tao ti Apo a mangipatpateg kadakuada.
Dagiti Mabalin nga Aktibidad
-
Ibagam kadagiti ubbing no kasano ti riknam no kasaritam ti maysa a nasayaat a gayyem, ket saludsodem kadakuada no kasano ti panagriknada. Ibasam kadakuada ti umuna a binatog iti Exodo 33:11. Idawatmo kadagiti ubbing no kasano iti panagkunada a mabalin a narikna ti propeta Moises. Ibagam kadagiti ubbing maipapan kadagiti panawen a nariknam nga asidegka iti Apo, uray pay no dimo nakita Isuna kadagiti matam.
-
Aggigiddan nga agkansion iti maysa a kanta a mangipeksa no kasano ti rikna ti Nailangitan nga Ama wenno ni Jesus maipapan kadatayo, kas iti “Jesus Is Our Loving Friend” (Children’s Songbook,58). Ipakitam dagiti ladawan ti Mangisalakan a mangipakpakita iti ayat kadagiti dadduma (kitaen iti Libro ti Arte ti Ebanghelio, num. 36, 41–43, 46–47). Allukoyem dagiti ubbing a mangibinglay no kasano ti panagriknada maipapan iti Nailangitan nga Ama ken ni Jesus.
Isuro ti Doktrina: In-inauna nga Ubbing
Maysa a tanda iti ayatko para iti Apo ti panangdayaw iti aldaw ti Sabbath.
Ti panangngilin a nasantuan iti aldaw ti Sabbath ket mabalin a nalaklaka—ken naragrag-o—para kadagiti ubbing no maamirisda a daytoy ti tanda ti panagkumitda iti Apo.
Dagiti Mabalin nga Aktibidad
-
Damagem kadagiti ubbing ti sumagmamano a saludsod a makatulong kadakuada a makaawat no ania ti tanda ti—kas pagarigan, “Ania dagiti tanda a mangipakaammo kenka nga umayen ti panagtutubo wenno mariknamon ti lamiis?” Awisem ida a mangbasa iti Exodo 31:13, 16–17 ken mangsapul iti balikas a “tanda.” Ania ti kinuna ti Apo a maysa a tanda iti nagbaetantayo Kenkuana? Apay a napateg unay daytoy a tanda?
-
Awisem dagiti ubbing nga agsisinnublat a mangilawlawag no apay a kayatda a mangdayaw iti Sabbath. Dagiti video kas iti “The Sabbath Is for You” or “Upon My Holy Day—Honoring the Sabbath” (ChurchofJesusChrist.org) ket makatulong.
-
Awisem dagiti ubbing a mangisurat iti amin a banag a mapanunotda a mabalinda nga aramiden iti Domingo a mangipakita iti Apo nga ay-ayatenda Isuna. Allukoyem ida a mangibinglay iti sumagmamano a banag manipud kadagiti listaanda. Awisem ida a mangyawid iti listaanda, ibinglay kadagiti pamiliada, ken agibasar kadagitoy iti kanito a kasapulanda dagiti kapanunotan maipapan iti no ania ti aramiden iti aldaw ti Sabbath.
Mabalinko nga ipangruna nga umuna ti Apo iti biagko.
Maysa a mensahe manipud iti pakaammuan iti Exodo 32 ti kinapateg iti panagtungpal iti umuna iti dua a Sangapulo a Bilin—saan nga agdaydayaw iti asino man wenno ania man a banag malaksid iti Apo.
Dagiti Mabalin nga Aktibidad
-
Kiddawen kadagiti ubbing a mangibinglay iti ania man a banag nga ammoda maipapan iti estoria ni Aaron nga agar-aramid iti bimmalitok a baka a pagdaydaywan dagiti Israelita. No kasapulanda ti tulong, ibasar kadakuada iti Exodo 32:1–8, 19–24, wenno ibinglaymo kadakuada ti “Dagiti Sangapulo a Bilin” (iti Dagiti Estoria iti Daan a Tulag). Apay a biddut nga agdaydayaw dagiti Israelita iti didiosen? (Mabalinmo nga ibasar dagiti ubbing iti umuna a dua a Sangapulo a Bilin iti Exodo 20: 6.)
-
Tulongam dagiti ubbing nga agpanunot kadagiti pagarigan dagiti banag a mabalin a pakasulisogan dagiti tao a pagdaydayawan imbes nga iti Apo—dagiti banag a mangyadayo iti imatangtayo manipud Kenkuana. Kalpasanna kiddawem kadakuada a mangibinglay kadagiti pagarigan dagiti banag a makatulong kadakuada a mangipamaysa iti Mangisalakan ken agdaydayaw Kenkuana.
Makapagtakderak para iti kinalinteg.
Idi imbaga dagiti Israelita ken ni Aaron nga agaramid iti bimmalitok a didiosen, immanamong nga aramidenna daytoy, uray no biddut daytoy (kitaen iti Deuteronomio 9:20). Ibilangmo no kasano a maallukoymo dagiti ubbing nga agtakder para iti kinalinteg, uray no ipilit dagiti dadduma kadakuada a saan.
Dagiti Mabalin nga Aktibidad
-
Awisem dagiti ubbing a mangbasa iti Exodo 32:1–5, 21–24, a saggaysa wenno iti kada paris, ket ibinglayda no ania iti panagkunada a nasken koma nga inaramid ni Aaron idi kiniddaw dagiti Israelita kenkuana nga agaramid iti bimmalitok a baka. Kasano a mabalin a tinulongan ni Aaron dagiti tao?
-
Tulongam dagiti ubbing a mangpanunot kadagiti kasasaad a mabalin a pakaipasanguanda no kiddawen dagiti dadduma kadakuada a mangaramid iti maysa a banag nga ammoda a biddut. Idawatmo kadagiti ubbing a mangibinglay kadagiti ideya iti tunggal maysa maipapan iti no ania ti aramiden kadagita a situasion.
Yallukoy ti Panagsursuro iti Pagtaengan
Awisem dagiti ubbing a mangibinglay iti pamiliada kadagiti ania man a kapanunotan a nangngeganda ita maipapan iti no kasano a ngilinen a nasantuan ti aldaw ti Sabbath.
Panangpadur-as iti Panangisurotayo
Awisem dagiti ubbing a mangiburay iti pammaneknekda. Makaallukoy dagiti saludsod a damagem kadagiti ubbing tapno ibinglayda no kasano ti panagriknada maipapan iti Mangisalakan ken no kasano a binendisionan ida ti panagbiag iti ebanghelio. No aramidenda daytoy, agiburburayda iti pammaneknek. (Kitaen iti Panangisuro iti Wagas ti Mangisalakan, 11, 32.)